មានករណីផ្ទុះយន្តហោះអត់មានមនុស្សបើកធ្លាក់មកលើដីនៅព្រំដែនកម្ពុជា-ឡាវ ចំណុចខាងក្រោយប៉ុស្តិ៍ នគរបាល រដ្ឋបាល ឃុំអូរស្វាយ ស្រុកថាឡាបរិវ៉ាត់ ខេត្តស្ទឹងត្រែងនាវេលាម៉ោង ៦ព្រឹក ថ្ងៃទី ២៣ ខែឧសភា ឆ្នាំ ២០១៩ ។
ករណីផ្ទុះពីលើអាកាស គេបានសង្កេតឃើញមានបំណែក សារធាតុដែក ធ្លាក់រាយប៉ាយនៅជុំវិញព្រំដែនចម្ងាយប្រហែលបួនគីឡូម៉ែត្រ ខណៈនេះ នគរបាលរដ្ឋបាលប៉ុស្តិ៍ ឃុំអូរស្វាយ ប្រមូលមកទុកនៅប៉ុស្តិ៍រដ្ឋបាលឃុំ ។
បើតាមប្រភពពីសមត្ថកិច្ចនៅតាមព្រំដែនបាននិយាយថា កាលពីព្រលឹមស្រាងៗមានឮសូរសំឡេងដូចជាផ្គរលាន់ប្រដេញគ្នានៅលើ ផ្ទៃមេឃ បន្ទាប់មក ក៏មានបំណែកដែកធ្លាក់មកលើផ្ទៃដីនៅចំណុចភូមិខាងលើដែលធ្វើឲ្យមានការភ្ញាក់ផ្អើលផងដែរ ។
សមត្ថកិច្ចបានបន្តទៀតថា បន្ទាប់ពីមានបំណែកធ្លាក់មកលើដី កម្លាំងរបស់សមត្ថកិច្ចបានធ្វើការប្រមូលវត្ថុតាងដែលធ្លាក់នៅពាសពេញដីដែលមានបំណែកជាច្រើន ត្រូវបានប្រមូលយកមកទុកដើម្បីរៀបចំត្រួតពិនិត្យ និងរាយការណ៍ជូនថ្នាក់លើ។
បំណែកទាំងនោះ យើងមិនទាន់ដឹងថា ជាបំណែកអ្វីច្បាស់លាស់នៅឡើយទេ ។ កំពុងតែប្រមូលយកមករក្សាទុក ដើម្បី ត្រួតពិនិត្យ ទៅតាមបច្ចេកទេសឲ្យដឹងថា បំណែកនោះជាបំណែកអ្វី បច្ចុប្បន្នកំពុងរក្សាទុកនៅប៉ុស្តិ៍រដ្ឋបាលឃុំអូរស្វាយ រង់ចាំជំនាញសមត្ថកិច្ច ត្រួតពិនិត្យ ៕ ដោយ៖កូឡាប
