កណ្តាល៖ ការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តកណ្តាល បានឲ្យដឹងថា នគរបាលបានឃាត់ខ្លួនបុរសម្នាក់ករណីគំរាមកំហែងហែកកេរ្ដិ៍ នៅពេលបុរសរូបនោះ បានដេករួមរ័កជាមួយស្ត្រីរងគ្រោះ តែងតែលួចថតរូបភាព អាសអាភាស
ក្រោយមកទើបដឹងថាបុរសនោះមានប្រពន្ធកូនហើយ ទើបជនរងគ្រោះបានសុំផ្តាច់ទំនាក់ទំនងជាមួយ ប៉ុន្តែបុរសនោះ នៅតែតាមទំនាក់ទំនងជនរងគ្រោះ ថែមទាំងប្រើពាក្យសម្តីមកគំរាមកំហែងបង្ហោះរូបអាសអាភាស ដែលបានលួចថត ហើយបានឆាតទៅឲ្យហ្វ្រេននៅក្នុង Facebook និងផ្ញើរូបភាពទាំងនោះឲ្យពួកគេមើលថែមទៀតផង។
ទីកន្លែងកើតហេតុ ភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្ដាល ពេលវេលាកើតហេតុ កាលពីថ្ងៃទី២១ ខែឧសភា ឆ្នាំ២០១៩ វេលាម៉ោង១៥និង០០នាទី។ ជនរងគ្រោះ ឈ្នោះស.វ.ន ភេទស្រី អាយុ២៧ឆ្នាំ ជនជាតិខ្មែរ សញ្ជាតិខ្មែរ ដែលមានទីលំនៅភូមិកំពង់សំណាញ់ សង្កាត់កំពង់ សំណាញ់ ក្រុងតាខ្មៅ ខេត្តកណ្ដាល មុខរបរមេផ្ទះ ។ ជនសង្ស័យឈ្មោះ មាស ចំរើន ភេទប្រុស អាយុ៣៣ឆ្នាំ រស់នៅភូមិត្រយូងពង ឃុំជើងព្រៃ ស្រុកបាឆាយ ខេត្តកំពង់ចាម (ឃាត់ខ្លួន) ដែលប្រើអាខោន Facebook ៖ ១.ឈ្មោះ
ចង់បានប្ដីណាស់ ២.ឈ្មោះ ចំរើន ស៊ីណា ៣.ឈ្មោះ ទឹក ហូរមិនហត់។ វត្ថុតាងចាប់យក ទូរស័ព្ទដៃមួយគ្រឿង ម៉ាក SAMSUNG (Galaxy Grand MaX) ។
នគរបាលក្រុងតាខ្មៅ បានរៀបរាប់ពីសភាពនៃរឿងហេតុនេះថា នៅថ្ងៃមិនចាំ ខែ កុម្ភៈ ឆ្នាំ២០១៩ ជនរងគ្រោះបានបើក Facebook លេងស្រាប់តែមានអាខោន Facebook ឈ្មោះទឹកហូរមិនហត់ បានអេដ មកជនរងគ្រោះ ហើយម្ចាស់អាខោននោះ បានឆាតមកនិយាយគ្នាលេងបានប្រហែលជាមួយខែក្រោយមក ឈ្មោះ មាស ចំរើន ( Facebook ទឹកហូរមិន ហត់ ប្តូរឈ្មោះទៅដាក់ឈ្មោះ ចំរើន ស៊ីណា) បានសុំស្រឡាញ់ជនរងគ្រោះ ហើយជនរងគ្រោះបាន និយាយថាបើស្រឡាញ់មកជួបសិនមកចាំស្រឡាញ់គ្នា។ ថ្ងៃមិនចាំ ខែមីនា ឆ្នាំ២០១៩ វេលាម៉ោង១៧និង០០នាទី ឈ្មោះ មាស ចំរើន បានមកជួបជនរងគ្រោះ នៅចំណុចរង្វង់មូលតាខ្មៅ បន្ទាប់មកជនរងគ្រោះបានជូនឈ្មោះនេះទៅដេកផ្ទះសំណាក់តែម្នាក់ឯងទេ។
លុះព្រឹកឡើងជនរងគ្រោះ បាននាំឈ្មោះ មាស ចំរើន ទៅលេងបងប្រុស នៅស្រុកកោះធំ បានចំនួន៥ថ្ងៃ ហើយជនរងគ្រោះ បានដេករួមរ័ក នៅជាមួយឈ្មោះ មាស ចំរើន ដូចប្តីប្រពន្ធជារៀងរហូត ប៉ុន្តែនៅពេលដេកនៅជាមួយគ្នា ឈ្មោះ មាស ចំរើន តែងតែលួចថតរូបភាពអាសអាភាស ជនរងគ្រោះដេក ដោយមិនឲ្យជនរងគ្រោះដឹងខ្លួនឡើយ ។
ក្រោយមកទើបដឹងថាឈ្មោះ មាស ចំរើន មានប្រពន្ធកូនហើយ ទើបជនរងគ្រោះបានសុំផ្តាច់ទំនាក់ទំនងជាមួយ ប៉ុន្តែឈ្មោះ មាស ចំរើន នៅតែតាមទំនាក់ទំនងជនរងគ្រោះ ថែមទាំងប្រើពាក្យសម្តីមកគំរាមកំហែងបង្ហោះរូបអាសអាភាស (រូបភាពដែលឈ្មោះ មាស ចំរើន បានលួចថត) ហើយបានឆាតទៅឲ្យ ហ្វ្រេននៅក្នុង Facebook និងផ្ញើរូបភាពទាំងនោះឲ្យពួកគេមើលថែមទៀតផង។
នៅចំពោះមុខសមត្ថកិច្ចឈ្មោះ មាស ចំរើន បានសារភាពថា ខ្លួនពិតជាបានប្រព្រឹត្តអំពើដូចរៀបរាប់ខាងលើពិតប្រាកដមែន ពីព្រោះខ្លួនចង់ឲ្យជនរងគ្រោះខ្មាសគេ ហើយមកទំនាក់ទំនងជាមួយខ្លួនវិញ ។ ករណីនេះការិយាល័យព្រហ្មទណ្ឌកម្រិតស្រាល កំពុងបន្តចាត់ការតាមនីតិវិធី ៕ ដោយ៖កូឡាប