ខេត្តកណ្ដាល ៖ បុរសម្នាក់បានស្លាប់ដោយធ្លាក់ពីលើដើមត្នោត នៅភូមិត្រពាំងអណ្តូង ឃុំសំរោងលើ ស្រុកអង្គស្នួល ខេត្តកណ្តាល ស្លាប់ចោលប្រពន្ធនិងកូនពីរនាក់ នៅវេលាម៉ោង១៣និង៣៥នាទី ថ្ងៃព្រហស្បតិ៍ ទី២៣ ខែឧសភា ឆ្នាំ២០១៩។
ប្រពន្ធរបស់សពបានឲ្យដឹងថា ៖ គាត់បានពឹងបងថ្លៃឲ្យជួយទៅរកមើលប្តីគាត់ ព្រោះបាត់យូរពេក ពេលនោះបងថ្លៃឈ្មោះ លៀង រីម ភេទប្រុស អាយុ៥៨ឆ្នាំ មុខរបរកសិករ នៅភូមិ-ឃុំ កើតហេតុខាងលើ បានមកប្រាប់គាត់ថាប្តីរបស់ឯងបានធ្លាក់ពីលើដើមត្នោតស្លាប់បាត់ហើយ ពេលឮបងថ្លៃនិយាយដូចនេះ គាត់ក៏ទៅមើលឃើញប្តីធ្លាក់ពីលើដើមត្នោតស្លាប់មែន ។
ជនរងគ្រោះ ឈ្មោះ កែវ លាក់ ភេទប្រុស អាយុ៥៩ឆ្នាំ រស់នៅភូមិកើតហេតុ។
សមត្ថកិច្ចស្រុកអង្គស្នួល បានចុះមកដល់កន្លែងកើតហេតុ ដោយមានចូលរួមពីនគរបាលប៉ុស្តិ៍រដ្ឋបាល លោកក្រុមប្រឹក្សាឃុំ គ្រូពេទ្យ មេភូមិ ប្រពន្ធសព បានធ្វើការពិនិត្យលើសពឃើញថាគ្មានស្លាកស្នាមអ្វីផ្សេងទេ ដោយលោកគ្រូពេទ្យ និងជំនាញ បានសន្និដ្ឋានថា ពិតជាស្លាប់ដោយសារ ធ្លាក់ពីលើដើមត្នោតប្រាកដមែន៕ ដោយ៖កូឡាប
