ភ្នំពេញ៖ សម្តេចតេជោនាយករដ្ឋមន្ត្រី នឹងបន្តដោះស្រាយបញ្ហាជាប្រឈមជាច្រើនទៀតជូនក្មួយៗ កម្មករ កម្មការិនី។ សម្តេចតេជោ បានបញ្ជាក់ផងដែរថា ការតម្លើងប្រាក់ខែ គឺនឹងតម្លើងនៅរៀងរាល់ឆ្នាំ ហើយសម្តេចបានស្នើដល់កូនក្មួយកម្មករអាចចូលមក Comment/Message ក្នុង Facebook នាយករដ្ឋមន្ត្រី។
ថ្ងៃទី២៧ ខែធ្នូ ឆ្នាំ២០១៧ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជួបសួរសុខទុក្ខកូនក្មួយកម្មករកម្មការនី ចំនួន១៤០៩៩នាក់ មកពីរោងចក្រចំនួន១៥ ស្ថិតនៅតាមបណ្តោយផ្លូវជាតិលេខ៣ ក្នុងខណ្ឌពោធិ៍សែនជ័យ រាជធានីភ្នំពេញ។
នៅថ្ងៃនេះ សម្តេចតេជោ ហ៊ុន សែន សប្បាយរីករាយជាខ្លាំងដែលបានអញ្ជើញមកជួបជុំជាមួយបងប្អូន កូនក្មួយកម្មករកម្មការនីក្នុងការចុះជួបសំណេះសំណាលប្រចាំសប្តាហ៍នេះ ដើម្បីស្វែងយល់ពីសុខទុក្ខរបស់កម្មករនិងដើម្បីដោះស្រាយបញ្ហាប្រឈមនានាមួយចំនួនរបស់កម្មករនិងជំរុញនូវគោលនយោ បាយអភិវឌ្ឍន៍វិស័យឧស្សាហកម្ម (២០១៥-២០២៥) ឲ្យកាន់តែមានប្រសិទ្ធភាពខ្ពស់។
អត្ថប្រយោជន៍ ដែលជាសេវាគាំពារសន្តិសុខសង្គមសម្រាប់កូនក្មួយឆ្លងទន្លេ គឺនឹងទទួលបានចាប់ពីម៉ោង ១២:00 យប់ថ្ងៃទី ១ មករា ឆ្នាំ ២០១៨ នេះតទៅ គឺក្មួយៗកម្មការនីនឹងទទួលបានប្រាក់ឧបត្ថម្ភគាំពារពីបេឡាជាតិដូចដែលបានកំណត់រួចហើយ (កម្មការនីសម្រាលបានកូន(១)គឺទទួល100ដុល្លារ និងពិនិត្យផ្ទៃពោះដោយឥតគិតថ្លៃ។ សម្រាលបានកូនភ្លោះ (២) គឺទទួលបាន 200ដុល្លារ។ សម្រាលបានកូន(៣)គឺបាន 300ដុល្លារ បូកនឹងប្រាក់ឧបត្ថម្ភចំនួន1250ដុល្លារ ថែមទៀតពីសម្តេចតេជោ និងសម្តេចកិត្តិព្រឹទ្ធបណ្ឌិត)។ ប្រសិនបើលើស២អាទិត្យ ឬលើស១ខែក្រោយមក កូនក្មួយនៅមិនទាន់ ទទូលបានប្រាក់ឧបត្ថម្ភខាងលើនេះទេ សូមកូនក្មួយសរសរសារ (Message/Comment) មកកាន់ផេក Page ពូ។
ទន្ទឹមនឹងនេះ សូមរដ្ឋមន្ត្រីក្រសួងការងារ និងរដ្ឋមន្ត្រីក្រសួងសុខាភិបាល តាមដានពិនិត្យជាប្រចាំឲ្យបានហ្មត់ចត់ប្រាកដប្រជា។ រដ្ឋមន្ត្រីពាក់ព័ន្ធនីមួយត្រូវតែទទួលខុសត្រូវចំពោះមុខនាយករដ្ឋមន្ត្រី ដើម្បីធានាអោយបានចំពោះការផ្តល់នូវសេវាគាំពារសង្គមនេះអោយកាន់តែមានប្រសិទ្ឋភាពល្អចំពោះកូនក្មួយកម្មការនី ព្រោះនៅសល់ពេលតែ ៤ ថ្ងៃទៀតតែប៉ុណ្ណោះ។
សម្តេចតេជោ ហ៊ុន សែន បានជូនពរកម្មការិនីមានផ្ទៃពោះទាំងអស់ សូមអោយមានសុខភាពល្អ និងសុវត្តិភាពទាំងពេលសំរាល និងក្រោយពេលសំរាល និងសូមអោយសំរាលបានកូនប្រុស/ស្រី គួរជាទីស្រលាញ់ និងឆ្លាតវៃគ្រប់ៗគ្នា។
រាជរដ្ឋាភិបាលកម្ពុជា ក្រោមការដឹកនាំរបស់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា មិនដែលបាត់បង់ម្ចាស់ការម្តងណាទេ។ រាជរដ្ឋាភិបាល បានខិតខំយកចិត្តទុកដាក់ដោះស្រាយបញ្ហានានាជូនប្រជាពលរដ្ឋបានទាន់ពេលវេលា។ ទន្ទឹមនឹងនេះ គឺហេដ្ឋារចនាសម្ព័ន្ធជាតិជាច្រើនក៏ត្រូវបានកសាងដូចជា ផ្លូវគោក ផ្លូវទឹក ផ្លូវអាកាស និងស្ពានតូចធំ ដូចដែលយើងកំពុងប្រើប្រាស់មកទល់សព្វថ្ងៃនេះ។
នេះហើយជាគោលនយោបាយច្បាស់លាស់របស់ គណបក្សប្រជាជន។ ទោះបីចប់ឬផុតអាណត្តិនៃការដឹកនាំរបស់ សម្ដេចតេជោ គឺអ្នកដឹកនាំក្រោយៗ នៅតែមានផែនទីចង្អុលបង្ហាញផ្លូវកសាងប្រទេស។ នយោបាយច្បាស់លាស់ របស់គណបក្សប្រជាជន គឺធ្វើអោយប្រទេសជាតិមានសុខសន្តិភាព ស្ថេរភាព និង រីកចម្រើនកាន់តែខ្លាំងឡើង។
សម្តេចតេជោ បានបញ្ជាក់ថា កម្ពុជា ចូលរួមរំលែកទុក្ខជាមួយប្រជាពលរដ្ឋហ្វីលីពីន។ ក្នុងរយៈពេលប៉ុន្មានថ្ងៃកន្លងមកនេះ កម្ពុជាក៏បានទទួលរងនូវចំហាយសំពាធព្យុះ ដែលធ្វើអោយមានខ្យល់ត្រជាក់ និងភ្លៀងធ្លាក់ជាបន្តបន្ទាប់។ ទន្ទឹមនឹងនេះដែរ ប្រទេសមួយចំនួនក្នុងតំបន់ក៏កំពុងប្រឈមនូវបាតុភូតធម្មជាតិនេះ គឺរួមទាំងប្រទេសហ្វីលីពីនដែលមានអ្នកស្លាប់ជាង ២០០ នាក់។ ឆ្លៀតក្នុងឱកាសនេះ ក្នុងនាមរាជរដ្ឋាភិបាលកម្ពុជា និងក្នុងនាមខ្ញុំផ្ទាល់ សូមចូលរួមរំលែកទុក្ខដ៏ក្រៀមក្រំបំផុត ជាមួយប្រជាពលរដ្ឋហ្វីលីពីន និងរដ្ឋា ភិបាលហ្វីលីពីន ដែលបានទទួលរងគ្រោះមហន្តរាយធម្មជាតិ ហើយសង្ឈឹម ថា ស្ថានភាពនេះនឹងបានធូរស្រាលក្នុងពេលដ៏ខ្លីខាងមុខជាមិនខានឡើយ។
នៅក្នុងថ្ងៃនេះដែរ សម្តេចតជោបានមានប្រសាសន៍ ទាក់ទងទៅនឹងវិស័យកសិកម្ម ដែលពេលនេះស្រូវរបស់បងប្អូនប្រជាពលរដ្ឋកំពុងប្រមូលផល។ រាជរដ្ឋាភិបាលពេលនេះ ក៏កំពុងរៀបចំបង្កើតធនាគារ សហគ្រាសខ្នាតតូច និងមធ្យម ដើម្បីចូលរួមចំណែកបង្កើនផលិតផលក្នុងស្រុក និងបង្កើនជីវភាពរស់ប្រជាពលរដ្ឋអោយកាន់តែល្អប្រសើរ។
គោលនយោបាយថ្មីរបស់រាជរដ្ឋាភិបាល ត្រូវបានដាក់ចេញជាបន្តបន្ទាប់ ដើម្បីការរីកចម្រើនលូតលាស់ នៃប្រទេសជាតិ និងការរស់នៅរបស់ប្រជាពលរដ្ឋអោយកាន់តែមានភាពល្អប្រសើរ។ កម្ពុជាបានប្រែក្លាយពីប្រទេសក្រីក្រមកជាប្រទេសដែលមានប្រាក់ចំណូលធ្យមកម្រិតទាប និងក្លាយជាប្រទេសដែលមានប្រាក់ចំណូលមធ្យមកម្រិតខ្ពស់ នៅឆ្នាំ ២០៣០ ហើយនិងមានមហិច្ឆតាក្លាយទៅជាប្រទេសដែលមានប្រាក់ចំណូលខ្ពស់នៅឆ្នាំ២០៥០ផងដែរ។
សម្តេចប្រមុខរាជរដ្ឋាភិបាល បានគូសបញ្ជាក់ថា រាជរដ្ឋាភិបាលមិនព្រងើយកន្តើយលើបញ្ហាណាមួយនោះឡើយ។ សម្តេចតេជោ ហ៊ុន សែន បានថ្លែងថា បើទោះបីឆ្នាំចាស់កន្លងផុត តែការងារអភិវឌ្ឍន៍ប្រទេសជាតិ និងលើកកម្ពស់ជីវភាពរបស់ប្រជាពលរដ្ឋជាច្រើនមិនបានបញ្ចប់នោះទេ គឺទាមទារឲ្យមានការខិតខំបន្ថែមទៀត ដើម្បីសម្រេចបានលទ្ធផលដ៏ល្អប្រសើរ។
សម្តេចតេជោ ហ៊ុន សែន បានថ្លែងថា ការរំដោះប្រទេសចេញពីប្រទេសមានចំណាត់ថ្នាក់ក្រីក្រ មកជាប្រទេសមានចំណូលមធ្យមកម្រិតទៀបមិនបានធ្វើឲ្យរាជរដ្ឋាភិបាល ដឹកនាំដោយគណបក្សប្រជាជនកម្ពុជាបានស្កប់ស្កល់នោះឡើយ ហើយនឹងបន្តប្រឹងប្រែងសម្រេចឲ្យបាននូវប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០។
សម្តេចតេជោ បានគូសបញ្ជាក់ថា ការដឹកនាំរាជរដ្ឋាភិបាលនាពេលបច្ចុប្បន្នដោយគណបក្សប្រជាជនកម្ពុជា មិនមែនជាការដឹកនាំដោយលំៗនោះទេ គឺបានដាក់ចេញនូវផែនទីចង្អុលផ្លូវយ៉ាងច្បាស់លាស់ ដើម្បីអភិវឌ្ឍន៍ប្រទេសជាតិ។
សម្តេចតេជោ ហ៊ុន សែន បានថ្លែងគូសបញ្ជាក់ថា វិស័យធំៗ៣កំពុងចូលរួមចំណែកក្នុងការជំរុញកំណើនសេដ្ឋកិច្ចជាតិ ដែលក្នុងនោះរួមមាន៖ វិស័យកសិកម្មរួមចំណែក ២៥ភាគរយ ឧស្សាហកម្មជាង ៣០ភាគរយ និងសេវាកម្ម រាប់ទាំងសេវាកម្មទេសចរណ៍រួមចំណែកជាង ៤៥ភាគរយ។
សម្តេចតេជោ ហ៊ុន សែន បានក្រើនរំលឹកកម្មករ កម្មការិនីថា ដើម្បីរក្សាបានការងារធ្វើ ត្រូវរក្សាឲ្យបាននូវសុខសន្តិភាពមិនត្រូវឲ្យជនណាមួយទាំងជាតិសាសន៍ខ្មែរ និងបរទេសមកបំផ្លាញ នោះឡើយ។ សម្តេចបានគូសបញ្ជាក់ថា មានសន្តិភាព ទើបមានការអភិវឌ្ឍន៍ មានការងារធ្វើដែលជាឆ្នាំងបាយ និងជាអាយុជីវិត។
សម្តេចតេជោ ហ៊ុន សែនផ្តាំទៅក្រសួងពាក់ព័ន្ធ ឲ្យពិនិត្យសេវាកម្មរបស់ក្រុមគ្រូពេទ្យ តាមមន្ទីរពេទ្យរដ្ឋ កុំឲ្យយឺតយ៉ាងក្នុងការពិនិត្យ និងព្យាបាលជូនដល់កម្មករ កម្មារិនី កីឡាការ កីឡាការិនី និងមន្ត្រីរាជការ ដែលត្រូវទទួលសេវាពិនិត្យ និងព្យាបាលដោយមិនគិតថ្លៃ។
សម្តេចតេជោ ហ៊ុន សែន អំពាវនាវដល់សមត្ថកិច្ចគ្រប់ប្រភេទ ជាពិសេសនៅតាមតំបន់ទេសចរណ៍ ត្រូវយកចិត្តទុកដាក់ខ្ពស់ក្នុងការរក្សាសន្តិសុខ សម្រាប់ភ្ញៀវទេសចរជាតិ និងអន្តរជាតិក្នុងឱកាសបុណ្យឆ្លងឆ្នាំសាកលនាចុងសប្តាហ៍នេះ៕ ដោយ៖កូឡាប