នាយករដ្ឋមន្ត្រីឥណ្ឌាលោក Narendra Modi បានថ្លែងអំណរគុណទៅដល់ប្រជាជនឥណ្ឌាទាំងអស់ ដែលផ្តល់ឱកាសដល់លោកឲ្យបានកាន់តំណែងមួយអាណត្តិទៀត មានរយៈពេល ៥ឆ្នាំ ក្រោយពេលទទួលជ័យជម្នះភ្លូកទឹកភ្លូកដី ក្នុងការបោះឆ្នោតជាតិ ។
“ពួកយើងចង់បានឥណ្ឌាថ្មី ។ ខ្ញុំសូមអរគុណអ្នកទាំងអស់គ្នា”។ លោកថ្លែងបែបនេះទៅកាន់អ្នកគាំទ្រ។
សូមបញ្ជាក់ថាគណបក្ស Bharatiya Janata Party របស់លោក Narendra Modi ត្រូវបានគេប៉ាន់ប្រមាណថាអាចដណ្តើមបានកៅអីចំនួន ៣០០ក្នុងចំណោម ៥៤៣ នៅក្នុងរដ្ឋសភា។
សម្ព័ន្ធគណបក្សប្រឆាំង ដែលដឹកនាំដោយលោក Rahul Gandhi បានទទួលស្គាល់ពីភាពបរាជ័យក្នុងការបោះឆ្នោត។
គណបក្សរបស់លោក Narendra Modi អាចនឹងឈ្នះបាន ៣០០កៅអី ហើយបើបូកផ្សំនឹងកៅអីរបស់គណបក្សសម្ព័ន្ធ ចំនួនកៅអីអាចកើនដល់ចំនួន ៣៥០។
ចំណែកគណបកប្រឆាំងឈ្មោះ Congress Party ត្រូវគេមើលឃើញថាឈ្នះបានអសនៈតិចជាង ៦០។
បើតាមច្បាប់ក្នុងប្រទេសឥណ្ឌា គណបក្សនយោបាយមួយ ឬសម្ព័ន្ធគណបក្សត្រូវការកៅអីចំនួនយ៉ាងតិច ២៧២ ដើម្បីឈ្នះសម្លេងភាគច្រើនក្នុងចំណោមកៅអីទាំងអស់ចំនួន ៥៤៣នៅក្នុងរដ្ឋសភា៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
