តាកែវ ៖ លោក មូល វិចិត្រ អភិបាលរងខេត្តតាកែវ បានធ្វើការក្រើនរំលឹកតាស់តឿន ទៅដល់សិស្សានុសិស្សចៀសឲ្យឆ្ងាយពីគឿងញៀន កុំចង់សាកឬចង់ដឹងពីរសជាតិរបស់វាអី ព្រោះគឿងវាអាចបំផ្លាញអនាគតប្អូនៗបានគ្រប់ពេល នៅថ្ងៃណាដែលប្អូនៗធ្លាក់ក្នុងអន្ទាក់វានោះ ។
ការលើកឡើងបែបនេះក្នុងពេលដែរលោក មូល វិចិត្រ អភិបាលរងខេត្តតាកែវ ចូលរួមក្នុងពិធីផ្សព្វផ្សាយអបំរំ អំពីគ្រោះថ្នាក់នៃការប្រើប្រាស់គ្រឿងញៀនខុសច្បាប់ និងសុវត្ថិភាពចរាចរណ៍ផ្លូវគោក នៅតាមគ្រឹះស្ថានសិក្សា នៅសាលប្រជុំមជ្ឈមណ្ឌលគរុកោសល្យវិក្រិតការខេត្ត នាព្រឹកថ្ងៃទី ២៤ ខែឧសភា ឆ្នាំ ២០១៩ ដោយមានសិស្សានុសិស្សចូលរួមស្តាប់ជាច្រើននាក់ ។
លោក មូល វិចិត្រ បានមានប្រសាសន៏ទៀតថា ៖ ក្នុងនាមយើងជាយុវជនជាអ្នកបន្តវេនរបស់ប្រទេសជាតិទៅថ្ងៃខាងមុខ សូមប្អូនៗ ត្រូវតែឆ្លើយថាទេចំពោះគឿងញៀន ព្រោះគ្រឿងញៀននេះហើយដែលនាំឲ្យខូចនៅអនាគតរបស់ប្អូនៗ និងអ្នកដែលបានប្រើប្រាស់វា ហើយម្យ៉ាងទៀតនោះ វានាំឲ្យយើងហ៊ានប្រព្រឹត្តនៅអំពើផ្សេងៗដូចជា លួចឆក់ប្លន់ កាប់ សម្លាប់ ដែលនាំឲ្យមានការជាប់នៅទោសទណ្ឌថែមទៀត ។ ដូច្នេះហើយប្អូនយុវជនដែលជាទំពាំងស្នងឬស្សីទាំងអស់ គប្បីត្រូវចៀសឲ្យឆ្ងាយពីសារធាតុញៀនទាំងទ្បាយ ហើយងាកមកគិតអំពីការសិក្សាវិញ ទើបជាការល្អដែលនាំឲ្យយើងមានអនាគត និងអាចជួយដល់សង្គមជាតិ និងប្រទេសជាតិយើងឲ្យរីកចម្រើនជឿនលឿនទៅមុខបាន ។
លោកបន្តថា ប្អូនត្រូវធ្វើជាកូនល្អ សិស្សល្អ ជាពលរដ្ឋរស់នៅក្នុងសង្គមល្អ ចេះស្តាប់បង្គាប់ឪពុកម្តាយ លោកគ្រូអ្នកគ្រូ ហើយត្រូវឧស្សាព្យាយាម ក្នុងការសិក្សា កុំចង់ដឹងឬចង់សាករសជាតិរបស់គ្រឿងញៀនអី វាគ្មានទៅឆ្ងាញ់អីនោះទេ ផ្ទុយទៅវិញមានតែបំផ្លាញលុយកាក់ទ្រព្យសម្បត្តិ និងខូចអនាគត និងក្លាយជាជនដែលសង្គមស្អប់ខ្ពើមតែប៉ុណ្ណោះ ។
ជាចុងក្រោយ លោក មូល វិចិត្រ ក៏បានធ្វើការផ្តាំផ្ញើរទៅដល់ប្អូនៗទាំងអស់ ត្រូវចូលរួមគោរពច្បាប់ចរាចរណ៍នៅពេលធ្វើដំណើរទៅណាមកណា ត្រូវពាក់មួកការពារ ឬជិះរថយន្តត្រូវដាក់ខ្សែក្រវ៉ាត់ឲ្យបានត្រឹមត្រូវ និងត្រូវចេះមានការយោគយល់អធ្យាស្រាយចំពោះគ្នាទៅវិញទៅមកទើបជាការល្អផងដែរ ៕ ដោយ ៖ តាកែវ