ខេត្តស្វាយរៀង ៖ ម្ចាស់គណនីហ្វេសប៊ុករបស់ឈ្មោះគឹម បញ្ញា (Kim Panha) ដែលសរសេរពាក្យជេរប្រមាថលើអង្គព្រះមហាក្សត្រ និងសម្ដេច ហ៊ុន សែន សម្ដេច ជា ស៊ីម ត្រូវសមត្ថកិច្ចបានបញ្ជូនទៅឃុំឃាំងបណ្តោះអាសន្ននៅពន្ធនាគារខេត្តស្វាយរៀង។
កាលពីថ្ងៃទី២២ ខែឧសភា ឆ្នាំ២០១៩ កម្លាំងសមត្ថកិច្ចនៃស្នងការដ្ឋាននគរបាលខេត្តស្វាយរៀង បានធ្វើការចាប់ខ្លួនបុរសម្នាក់ ជាម្ចាស់គណនីហ្វេសប៊ុករបស់ឈ្មោះគឹម បញ្ញា (Kim Panha) ភេទប្រុស អាយុ៣២ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិតាពៅ សង្កាត់បាវិត ក្រុងបាវិត នាំមកចាត់ការតាមផ្លូវច្បាប់ ពីបទសរសេរបរិហារកេរ្តិ៍ ប្រមាថព្រះមហាក្សត្រ និងថ្នាក់ដឹកនាំកំពូល បង្ហោះតាមបណ្តាញសង្គមទំនាក់ទំនងសង្គមហ្វេសប៊ុក។
សមត្ថកិច្ច បានឲ្យដឹងថា ជនសង្ស័យខាងលើត្រូវសមត្ថកិច្ចចាប់ខ្លួន នៅចំណុចភូមិតាពៅ សង្កាត់បាវិត ក្រុងបាវិត នាំមកសាកសួរ ។ ជនសង្ស័យ បានឆ្លើយសារភាពថា នៅក្នុងអំឡុងឆ្នាំ២០១៨ រូបគេបានចូលធ្វើការនៅក្រុមហ៊ុនកាស៊ីណូបាវិត ម៉ុកបាយ ស្ថិតក្នុងភូមិបាវិតកណ្ដាល សង្កាត់បាវិត ក្រុងបាវិត ហើយបានបង្កើតគណនីហ្វេសប៊ុកឈ្មោះគឹម បញ្ញា (Kim Panha) ដើម្បីសរសេរពាក្យជេរប្រមាថលើអង្គព្រះមហាក្សត្រ និងសម្ដេច ហ៊ុន សែន សម្ដេច ជា ស៊ីម មានខ្លឹមសារ «ពួកអាចុះហត្ថលេខា ពួកអាកាត់ទឹកដីកោះត្រល់អោយយួន» ។ ជាពិសេស សម្ដេចហ៊ុន សែន ច្រើនជាងគេ។
ជនសង្ស័យខាងលើ ត្រូវសមត្ថកិច្ចបានបញ្ជូនទៅឃុំឃាំងបណ្តោះអាសន្ននៅពន្ធនាគារខេត្ត ដើម្បីចាត់ការបន្តតាមនីតិវិធីច្បាប់៕ ដោយ ៖ កូឡាប
