ភ្នំពេញ ៖ នៅព្រឹកថ្ងៃទី២៤ ខែឧសភា ឆ្នាំ២០១៨នេះ ក្រុមឆ្មាំពន្ធនាគារ បាននាំខ្លួនជនជាប់ចោទ លោកឡាយ វណ្ណ: អតីតអភិបាលខេត្តតាកែវ លោកឡាយ ណារិទ្ធ អតីតស្នងការរងខេត្តតាកែវ និងឈ្មោះ ម៉េន សាម៉ៃ ជាតៃកុងឡានរបស់លោក ឡាយ វណ្ណ: ឈ្មោះ ជឹម វុធ មកធ្វើការជំនុំជម្រះ សួរដេញបន្តទៀត ករណីសម្លាប់ជនរងគ្រោះឈ្មោះ ចែវ សុវឌ្ឍនា ។ ក្រោយសវនាការនេះបានបញ្ចប់ការសួរដេញដោល លោក ហម ម៉េងសែ ប្រធានក្រុមប្រឹក្សារជំនុំជម្រះ បានលើកយកសំណុំរឿងនេះ ទៅបន្តជំនុំជម្រះនៅថ្ងៃទី២០ ខែមិថុនា ឆ្នាំ២០១៩។
ក្នុងអង្គសវនាការ នាព្រឹកមិញនោះ លោកឧត្តមសេនីយទោ ទិត្យ ប៊ុណ្ណា អនុប្រធានអង្គភាពបច្ចេកទេសវិទ្យាសាស្ត្រ បានបញ្ជាក់នៅចំពោះមុខតុលាការថា ការពិនិត្យលើស្ថានភាពសាកសព កន្លែងខ្សែចំណង ខ្សែរីដូ និងវីស២គ្រប់ដែលចាប់ជើងខ្សែរីដូ និងស្ថានភាពរាយប៉ាយខ្នើយ ទូរស័ព្ទ ២គ្រឿង ធ្លាក់រប៉ាត់ប៉ាយ និងស្នាមសើម ដោយសារទឹកនោម នៅលើពួកអាចធ្វើឱ្យកម្លាំងជំនាញសន្និដ្ឋានថា ជនរងគ្រោះ នាង ចេវ សុវឌ្ឍនា ស្លាប់ដោយសារការថប់ដង្ហើម ពោលមិនមែនចងកធ្វើអត្តឃាត ដោយខ្លួនឯងនោះទេ។
ឧត្តមសេនីយទោ ទិត្យ ប៊ុណ្ណា ជាមន្ត្រីជំនាញរបស់ក្រសួងមហាផ្ទៃ ដែលឡើងបំភ្លឺនៅតុលាការថា ក្នុងការអង្កេតនៅកន្លែងកើតហេតុ ចំណុចត្រង់ចំណង បត់ចន្ទាសចងករ ជារូបភាពព្យួរ ហើយទំហំដែករីដូ និងវីស២ មិនអាចទ្រនឹងទម្ងន់មនុស្សពេលទម្លាក់ខ្លួនមកក្រោមបានទេ។ គ្មានបន្សល់ស្លាកស្នាមឡើងតាមបងបង្អូច ដើម្បីបានចងកទេ ចំំណែកលើផ្ទៃមុខសព មានស្នាមបែកគ្រាប់ឈាមតូចៗ បង្ហាញពីការថប់ដង្ហើម ទាំងនេះបញ្ជាក់ថា គឺស្លាប់ដោយថប់ដង្ហើម ។ បន្ថែមលើសនេះ ភស្តុតាងកាន់តែស៊ីសង្វាក់ គឺដូចដែលចម្លើយឈ្មោះ ម៉េន សាម៉ៃ និង ជឹម វុធ សារភាពមុនពេលត្រូវឃាត់ខ្លួន ក្នុងរបាយការណ៍បញ្ជាក់ថា លើពូក និងអាវខោរបស់ជនរងគ្រោះមានស្នាមសើមដោយទឹកនោម ដូច្នេះនាង ចេវ សុវឌ្ឍនា គឺស្លាប់លើគ្រែពូកដោយថប់ដង្ហើម។
ចំណែកលោក ចេវ សារ៉េត ជាឪពុកសពនាង ចេវ សុវឌ្ឍនា បានប្រាប់ចៅក្រមថា លោកមិនបានប្តឹងប្តល់ចំពោះបុគ្គលណាមួយទេ គឺអាស្រ័យទៅលើកម្មផល និងព្រេងវាសនា ហើយលោកបានសម្តែងអំណរគុណ ដល់រាជរដ្ឋាភិបាល និងសមត្ថកិច្ចដែលបានជួយរកយុត្តិធម៌ដល់គ្រួសាររបស់លោក។
ជនរងគ្រោះឈ្មោះ ចែវ សុវឌ្ឍនា ត្រូវគេប្រទះឃើញចងកស្លាប់ក្នុងបន្ទប់គេងរបស់នាង នៅក្នុងផ្ទះជួលដ៏ធំមួយដែលលោក ឡាយ វណ្ណៈ ជាអ្នកជួលឲ្យនៅក្នុងភូមិផ្សារតាកោរ សង្កាត់រការក្នុង ក្រុងដូនកែវ ខេត្តតាកែវ កាលពីល្ងាចថ្ងៃទី២៦ ខែមករា ឆ្នាំ២០១៨។ សមត្ថកិច្ចសន្និដ្ឋានថា ជារឿងអត្តឃាត ព្រោះតែវិបត្តិស្នេហា៕ ដោយ ៖ កូឡាប