សៀមរាប ៖ អាជ្ញាធរជាតិអប្សរាតែងតែយកចិត្តទុកដាក់ថែរក្សាព្រៃឈើដែលមានស្រាប់ និងដាំបន្ថែមតាមតំបន់ជុំវិញប្រាសាទដែលជាតំបន់ព្រៃការពារ ដោយមូលហេតុតំបន់ខ្លះត្រូវបានទន្ទ្រានពីប្រជាជន ភ្លើងឆេះព្រៃ និងក្រោយពីកាត់មែកឈើងាប់ដែលអាចបង្ករហានីភ័យផ្សេងៗដល់មនុស្ស សត្វ ប្រាសាទ និងបរិស្ថាន។
លោក ស៊ិន ពិសី មន្ត្រីបច្ចេកទេសនៃនាយកដ្ឋានគ្រប់គ្រងព្រៃឈើ ទេសភាពវប្បធម៌ និង បរិស្ថានបានឱ្យដឹងថា ព្រៃឈើក្នុងឧទ្យានអង្គរ បែងចែកជាបីសំខាន់ៗគឺ តំបន់ឧទ្យានបន្ទាយស្រី តំបន់ឧទ្យានកណ្តាល និងតំបន់ឧទ្យានរលួស លើផ្ទៃដី៤០១គីឡូម៉ែត្រក្រឡា និងចែកជា១៤បុស្តិ៍ ដែលមានបុគ្គលិកចំនួន៨៤នាក់ ចុះយាមល្បាតជាប្រចាំ ថែទាំ ព្រមទាំងព្យាលបាលដើមឈើពេលមានជំងឺ លើកលែងតែតំបន់ប្រាសាទបេងមាលា ស្ថិតនៅក្រៅតំបន់ឧទ្យានអង្គរ។
លោកបន្តទៀតថា ក្រុមភ្នាក់ងារគ្រប់គ្រងព្រៃឈើតែងមានកម្មវិធីដាំកូនឈើជារៀងរាល់ឆ្នាំ ហើយមួយលើកៗជាច្រើនរយដើម ដោយមានការចូលរួមពីថ្នាក់ដឹកនាំអាជ្ញាធរជាតិអប្សរា ស្ថាប័នរដ្ឋ ស្ថាប័នអន្តរជាតិ វិស័យឯកជន សហគមន៍ ព្រះសង្ឃ និងសិស្សសាលាជាដើម បំពេញនូវទីតាំងដែលគ្មានព្រៃឈើ សរុបប្រមាណ៣ម៉ឺនដើមក្នុងមួយឆ្នាំៗនៅឧទ្យានអង្គរ។
លើសពីនេះអាជ្ញាធរជាតិអប្សរាក៏បានចែកកូនឈើដល់ស្ថាប័នផ្សេងៗ ព្រះសង្ឃ និងប្រជាជនក្នុងតំបន់អង្គរទៅដាំក្នុងវត្ត ភូមិ ឃុំ មូលដ្ឋានរបស់ខ្លួនដើម្បីបង្កើនចំនួនព្រៃឈើ បង្កើនគម្របបៃតងដល់បរិស្ថានឱ្យមានបរិយាកាសស្រស់ថ្លា ពិសេសគឺទាក់ទាញទេសចរ។
លោក ពិសី បញ្ជាក់ថា ព្រៃឈើមានសារៈសំខាន់ទាំងបរិស្ថាន និងសោភ័ណភាពសម្រាប់មនុស្សជាតិ។ លោកក៏បានអំពាវនាវដល់អាជ្ញាធរមូលដ្ឋានជួយអប់រំដល់ប្រជាជនកុំឱ្យកាប់ទន្ទ្រានដីព្រៃធ្វើជាកម្មសិទ្ធិ ចូលរួមដាំដើមឈើឱ្យបានច្រើនជាងបំផ្លាញ និងពេលដុតចម្ការត្រូវគ្រប់គ្រងភ្លើងឱ្យបានត្រឹមត្រូវ ចៀសវាងមានគ្រោះថ្នាក់ និងមានហានីភ័យដល់ព្រៃឈើក្នុងតំបន់ឧទ្យានអង្គរ៕ ដោយ៖ បញ្ញាស័ក្តិ