ភ្នំពេញ ៖ លោកឃួងស្រេងសមាជិកគណៈកម្មាធិការកណ្តាលគណបក្សប្រជាជនកម្ពុជាអនុប្រធានគណបក្សប្រជាជនកម្ពុជារាជធានីភ្នំពេញនិងជាប្រធានក្រុមការងារពង្រឹងខណ្ឌព្រែកព្នៅកាលពីព្រឹកថ្ងែទី២៤ខែឧសភាឆ្នាំ២០១៩នេះ បានអញ្ចើញជាអធិបតីភាពក្នុងពិធីបិទយុទ្ធនាការឃោសនាបោះឆ្នោតក្រុមប្រឹក្សារាជធានីខណ្ឌអាណត្តិទី៣ដែលបានធ្វើឡើងនៅទីស្នាក់ការគណបក្សប្រជាជនកម្ពុជាខណ្ឌព្រែកព្នៅនិងបានបន្តដឹកនាំដង្ហែក្បួនឃោសនារកសំឡេងឆ្នោតនៅតាមមូលដ្ឋានខណ្ឌព្រែកព្នៅ។
លោកឃួងស្រេងបានមានប្រសាសន៍ថាគណបក្សប្រជាជនកម្ពុជាក្រោមការដឹកនាំរបស់សម្ដេចអគ្គមហាសេនាបតីតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជាតែងតែទទួលបានជ័យជម្នះរាល់ការបោះឆ្នោត។ការដែលទទួលបាននូវភាពជោគជ័យនេះដោយសារតែការដឹកនាំរបស់សម្ដេចតេជោធ្វើឲ្យប្រទេសជាតិមានការអភិវឌ្ឍរីកចម្រើនឥតឈប់ឈរចាប់តាំងពីភូមិរហូតដល់សង្កាត់ខណ្ឌ។ ជាងនេះទៅទៀតសម្តេចបានប្រឆាំងដាច់ខាតចំពោះពួកអ្នកបំភ្លេចបំផ្លាញសុខសន្តិភាពដែលបានមកពីកម្លាំងញើសឈាមរបស់សម្ដេច។សម្ដេចបានការកែទម្រង់ស៊ីជម្រៅទៅលើធនធានមនុស្សនិងហិរញ្ញវត្ថុនិងបានផ្ដល់នូវអំណាចទៅឲ្យថ្នាក់ក្រោមជាតិដើម្បីធ្វើការអភិវឌ្ឍឹ
មូលដ្ឋានផ្ដល់សេវាឲ្យកាន់តែកៀកកិតជាមួយនិងប្រជាពលរដ្ឋនៅក្នុងមូលដ្ឋាន។បានពង្រឹងនិងទប់ស្កាត់រាល់បទល្មើសគ្រប់ប្រភេទបានធ្វើឲ្យជីវភាពរបស់ប្រជាពលរដ្ឋកាន់តែមានជីវភាពធូរធានិងប្រសើរឡើងពីមួយឆ្នាំទៅមួយឆ្នាំ។
លោកឃួងស្រេងក្នុងឱកាសនោះក៏បានសូមឲ្យអង្គបោះឆ្នោតត្រៀមខ្លួនដើម្បីចូលរួមបោះឆ្នោតជ្រើសរើសក្រុមប្រឹក្សារាជធានីខណ្ឌអាណត្តិទី៣នាថ្ងៃអាទិត្យទី២៦ខែឧសភាឆ្នាំ២០១៩ខាងមុខនេះ។
លោកឃួងស្រេងបានថ្លែងបន្តថាបេក្ខជនក្រុមប្រឹក្សាដែលជាអង្គបោះឆ្នោតត្រូវតែទទួលខុសត្រូវគ្រប់គ្រងសតិអារម្មណ៍វត្តមានថែទាំសុខភាពពង្រឹងសាមគ្គីភាពឯកភាពផ្ទៃក្នុងឲ្យបានរឹងមាំម៉ត់ចត់ដើម្បីពង្រឹងការចងចាំថែមទៀតអំពីនីតិវិធីបោះឆ្នោតនិងត្រូវគោរពតាមការណែនាំរបស់គណៈកម្មាធិការជាតិរៀបចំការបោះឆ្នោត។
លើសពីនេះលោកបានថ្លែងកោតសសើរនិងវាយតម្លៃ ខ្ពស់ចំពោះគណៈកម្មាធិការបក្សខណ្ឌសង្កាត់កងកម្លាំងប្រដាប់អាវុធនគរបាលកងរាជអាវុធហត្ថយោធាអាជ្ញាធរដែនដីសមត្ថកិច្ចគ្រប់ថ្នាក់ដែលបានរួមចំណែកអនុវត្តគោលនយោបាយបក្សនិងរាជរដ្ឋាភិបាលដឹកនាំដោយសម្តេចតេជោហ៊ុនសែនធ្វើឲ្យបរិស្ថាននៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សារាជធានីខណ្ឌអាណត្តិទី៣ឆ្នាំ២០១៩ប្រព្រឹត្តទៅដោយសេរីនិងមានសុវត្ថិភាព។
លោកសុខសម្បតិ្តប្រធានគណបក្សប្រជាជនកម្ពុជាខណ្ឌព្រែកព្នៅក្នុងឱកាសនោះដែរក៏បានលើកឡើងពីសកម្មភាពការងារមួយចំនួនរបស់សមាជិកគណបក្សប្រជាជនកម្ពុជាខណ្ឌសង្កាត់ដែលបានចូលរួមនៅក្នុងការបើកយុទ្ធនាការឃោសនាបោះឆ្នោតដែលបានធ្វើឡើងកាលពីថ្ងៃទី១៧ឧសភានៅកោះពេជ្រហើយនឹងបន្តការបង្រៀនគូសសន្លឹកឆ្នោតដល់សមាជិកដែលជាអង្គបោះឆ្នោតនៅតាមមូលដ្ឋានដើម្បីឲ្យចេះគូសសន្លឹកឆ្នោត។លោកថាសម្រាប់ខណ្ឌព្រែកព្នៅសន្លឹកឆ្នោតដែលត្រូវគូសមានលេខរៀងលេខ៣និងសម្រាប់រាជធានីភ្នំពេញមានលេខរៀងលេខ៤។
គួរបញ្ជាក់ថាបើតាមការឲ្យដឹងពីគណៈកម្មការរៀបចំការបោះឆ្នោតរាជធានីភ្នំពេញបញ្ជាក់ថានៅរាជធានីភ្នំពេញមានគណបក្សនយោបាយចំនួន៦បានចុះឈ្មោះជាផ្លូវការក្នុងការចូលរួមប្រកួតប្រជែងសម្រាប់ការបោះឆ្នោតក្រុមប្រឹក្សាអាណត្តិទី៣នេះ។
គណបក្សទាំង៦នោះរួមមានគណបក្សប្រជាជនកម្ពុជា,គណបក្សយុវជនកម្ពុជា,គណបក្សឆន្ទៈខ្មែរ,គណបក្សខ្មែររួបរួមជាតិ,គណបក្សហ្វ៊ុនស៊ិនប៉ិច,គណបក្សសញ្ជាតិកម្ពុជា។តាមការចុះបញ្ជីគណបក្សនយោបាយនិងបេក្ខជនឈរឈ្មោះបោះឆ្នោតក្នុងនោះមណ្ឌលរាជធានីភ្នំពេញមានបេក្ខជនសរុបចំនួន២៧៤រូបស្រីចំនួន១១៥រូបនិងមណ្ឌលខណ្ឌទាំង១៤មានបេក្ខជនសរុបចំនួន១.៣៤៣រូបស្រី៥៣៧រូប។ក្រោយពីមានការជួបជុំនៅកោះពេជ្រអង្គមិទ្ទីងក៏បានបំបែកគ្នាដង្ហែរក្បួនទៅតាមខណ្ឌរៀងៗខ្លួនតាមកម្មវិធីដែលបានគ្រោងទុក ៕ ដោយ ៖ កូឡាប
