កណ្ដាល៖លោកហុក វ៉ាន់ធីណាចៅក្រមស៊ើបសួរសាលាដំបូងខេត្តកណ្តាល បានសម្រេចដីកាបង្គាប់ឲ្យនគរបាលខេត្តកណ្តាល នៅព្រឹកថ្ងៃទី២៧ ខែធ្នូនេះ កម្ទេចមាន់ជល់ចំនួន៩២ក្បាល ដែលបង្ក្រាបបាននៅឃុំអរិយក្សត្រ ស្រុកល្វាឯម ដែលមានម្ចាស់ទីតាំងឈ្មោះ ថៃ ផានី ហៅម៉ាប់ កូនប្រសាលោក ហ៊ុន សាន ។ មាន់ជល់ចំនួន៩២ក្បាល ត្រូវបានអារកសម្លាប់ជាក់ស្តែង។
យោងតាមដីកាសម្រេចរបស់លោកហុក វ៉ាន់ធីណា ប្រធានសាលាដំបូងខេត្តកណ្តាល និងជាចៅក្រមស៊ើបសួរ យល់ឃើញថាសំណុំរឿងព្រហ្មទណ្ឌលេខ១៥២៣អក ចុះថ្ងៃទី៥ខែធ្នូឆ្នាំ២០១៧ ដែលមានជនត្រូវចោទឈ្មោះថៃ ផានី ហៅម៉ាប់ កើតឆ្នាំ១៩៧២ ត្រូវបានដាក់ឲ្យស្ថិតនៅក្រោមការពិនិត្យពីបទបើកកន្លែងលេងល្បែងស៊ីសងខុសច្បាប់ ប្រព្រឹត្តនៅឃុំអរិយក្សត្រ ស្រុកល្វាឯម ខេត្តកណ្តាល បទល្មើសព្រហ្មទណ្ឌដែលមានចែងឲ្យផ្តន្ទាទោសតាមបញ្ញតិ្តមាត្រា ០៥ នៃច្បាប់ស្តីពីការបង្ក្រាបល្បែងស៊ីសង។ នៅក្នុងប្រតិបត្តិការចុះបង្ក្រាបទីតាំងលេងល្បែងស៊ីសងខុសច្បាប់ (ជល់មាន់) នោះ សមត្ថកិច្ចបានដកហូតនូវវត្ថុតាងមួយចំនួន ដែលក្នុងនោះក៏រួមមានមាន់ជល់ចំនួន៩២ក្បាលផងដែរ និងរក្សាទុកនៅស្នងការដ្ឋាននគរបាលខេត្តកណ្តាល។ ការថែរក្សានូវមាន់ជល់ចំនួន៩២ក្បាល មានការលំបាកនិងចំណាយសោហ៊ុយផ្សេងៗនិងដើម្បីបង្ការកុំឱ្យមានបទល្មើសមានជាថ្មី និង ដើម្បីពន្លឿននីតិវិធីនៃការស៊ើបសួរឱ្យបានឆាប់រហ័ស គប្បីចៅក្រមស៊ើបសួរកម្ទេចចោលនូវមាន់ជល់ចំនួន៩២ក្បាលនេះ។
គួររំលឹកថា ម្ចាស់សង្វៀនជល់មាន់ដ៏ធំ នៅឃុំអរិយក្សត្រ ខេត្តកណ្ដាល និង នៅស្រុកបាទី ខេត្តតាកែវ លោក ថៃ ផានី ហៅម៉ាប់អូស្ត្រាលី ត្រូវបានបញ្ជូនទៅពន្ធនាគារហើយ កាលពីល្ងាចថ្ងៃទី៥ ខែធ្នូ ឆ្នាំ២០១៧ ដើម្បីរង់ចាំការស៊ើបសួរបន្តទៀត ។ រីឯអ្នកលេងល្បែងជល់មាន់៦៤នាក់ ត្រូវបានតុលាការតុលាការជំនុំជម្រះភ្លាម រួចផ្តន្ទាទោសមួយខែតែទោសនេះត្រូវព្យួរ ហើយដោះលែងឱ្យមានសេរីភាពឡើងវិញ ៕ ដោយ ៖ កូឡាប
