(បន្ទាយមានជ័យ) ៖ កងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ពីបទ រំលោភលើទំនុកចិត្ត ដោយបានមកខ្ចីម៉ូតូរបស់ជនរងគ្រោះ ដើម្បីទៅបើកលុយនៅកន្លែងវីង ពេលជនសង្ស័យបានម៉ូតូហើយក៏ជិះទៅបាត់ មិនឃើញមកវិញអស់រយៈពេលជាច្រើនថ្ងៃ ទៅតុលាការ ដើម្បីចាត់ការទៅតាមនីតិវិធី កាលពី ថ្ងៃទី២៤ ខែឧសភា ឆ្នាំ២០១៩ ។ ចំណែកម៉ូតូ ត្រូវបានកម្លាំងជំនាញ ធ្វើការប្រគល់ជូនទៅម្ចាស់ដើមវិញ ។
កងរាជអាវុធហត្ថខេត្តបន្ទាយមានជ័យ បានឲ្យដឹងថា ថ្ងៃទី២២ ខែឧសភា ឆ្នាំ២០១៩ វេលាម៉ោង ១៣ និង ១៥នាទី នៅចំណុចភូមិទួលពង្រ សង្កាត់ផ្សារកណ្តាល ក្រុងក្រុងប៉ោយប៉ែត ខេត្តបន្ទាយមានជ័យ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ទោ អ៊ុំ សាខន នាយរងសេនាធិការ ប្រចាំការមូលដ្ឋានកងរាជអាវុធហត្ថក្រុង បានចុះប្រតិបត្តិការបង្ក្រាបករណី រំលោភលើទំនុកចិត្ត ដែលប្រព្រឹត្តកាលពីថ្ងៃទី១៧ ខែឧសភា ឆ្នាំ២០១៩ និងឃាត់ខ្លួនជនសង្ស័យបានចំនួន ០១នាក់ ។ បន្ទាប់ពីធ្វើការឃាត់ខ្លួនកម្លាំងជំនាញបានកសាងសំណុំរឿងបញ្ជូនជនសង្ស័យនិងវត្ថុតាងទៅទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្ត។
លោកវរសេនីយ៍ទោ ព្រហ្ម ថេង ប្រធានមន្ទីរយុត្តិធម៌បានឲ្យដឹងថា ៖ យោងតាមបណ្តឹងរបស់ជនរងគ្រោះឈ្មោះ បូណា តេងឡុង ភេទ ប្រុស អាយុ ១៩ឆ្នាំ មានទៅលំនៅភូមិទួលពង្រ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ បានបំភ្លឺឲ្យដឹងថា ៖ នៅថ្ងៃកើតហេតុ ជនសង្ស័យឈ្មោះ អៀក សុខវង្ស ភេទ ប្រុស អាយុ ២០ឆ្នាំ រស់នៅភូមិ/សង្កាត់ជាមួយគ្នា បានមកខ្ចីម៉ូតូរបស់ខ្លួនដើម្បីទៅបើកលុយនៅកន្លែងវីង ពេលជនសង្ស័យបានម៉ូតូហើយក៏ជិះទៅបាត់ មិនឃើញមកវិញអស់រយៈពេលជាច្រើនថ្ងៃ ក៏បានមកដាក់ពាក្យបណ្តឹងនៅមូលដ្ឋានកងរាជអាវុធហត្ថក្រុងតែម្តង ។ លោកវរសេនីយ៍ទោ ព្រហ្ម ថេង បានបញ្ជាក់ទៀតថា ក្រោយពីទទួលបានពាក្យបណ្តឹង និងធ្វើការស្រាវជ្រាវ រហូតកំណត់បានមុខសញ្ញាបានដំណឹងថាជនសង្ស័យបានយកម៉ូតូខ្លួនទៅបញ្ចាំលេងល្បែងបាត់ហើយ កម្លាំងជំនាញបានកោះហៅមកធ្វើការសាកសួរ ។ ក្រោយពីធ្វើការសាកសួរចម្លើយ ជនសង្ស័យបានឆ្លើយសារភាពថា ៖ ខ្លួនពិតជាបានយកម៉ូតូរបស់ជនរងគ្រោះទៅបញ្ចាំក្នុងតម្លៃ ២០.០០០បាត(ពីរម៉ឺនបាត) ដើម្បីយកលុយទៅលេងល្បែងពិតប្រាកដមែន ។ ដោយផ្អែកលើចម្លើយសារភាពរបស់ជនសង្ស័យ និងយោងតាមរបាយការណ៍របស់មូលដ្ឋានកងរាជអាវុធហត្ថក្រុង និងយោងតាមការបំភ្លឺរបស់ជនរងគ្រោះ ឃើញថាមានតម្រុយពិរុទ្ធភាពនៃបទល្មើសយ៉ាងជាក់លាក់ ដូច្នេះជនសង្ស័យខាងលើអាចត្រូវចោទពីបទ រំលោភលើទំនុកចិត្ត។ បច្ចុប្បន្ន កម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ទៅតុលាការដើម្បីចាត់ការទៅតាមនីតិវិធី ។ ចំណែកម៉ូតូ ត្រូវបានកម្លាំងជំនាញ ធ្វើការប្រគល់ជូនទៅម្ចាស់ដើមវិញ ៕ ដោយ៖កូឡាប
