ខេត្តព្រះសីហនុ ៖ រដ្ឋមន្ត្រីក្រសួងបរិស្ថាន រួមជាមួយ ថ្នាក់ដឹកនាំរដ្ឋបាលក្រុង-ខេត្តព្រះសីហនុ កាលពីរសៀលថ្ងៃទី២៤ ខែឧសភា ឆ្នាំ២០១៩ បានបើកកិច្ចប្រជុំបន្ទាន់មួយ ដោយលើកយកបញ្ហាកាកសំណល់សំរាម នៅក្នុងក្រុងព្រះសីហនុ យកមកធ្វើជាប្រធានបទ សម្រាប់កិច្ចពិភាក្សា ដើម្បីរួមគ្នាដោះស្រាយបញ្ហាសំរាមកកស្ទះ នៅតាមផ្ទះ និងតាមចិញ្ចើមផ្លូវសាធារណៈ ឲ្យបានប្រសើរជាងរាល់ថ្ងៃនេះ។
កិច្ចប្រជុំនេះ រៀបចំនៅសាលប្រជុំ របស់សាលាក្រុងព្រះសីហនុ ដឹកនាំដោយ លោក សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមការងារថ្នាក់ជាតិ ចុះជួយខេត្តព្រះសីហនុ។
នៅក្នុងកិច្ចប្រជុំនោះ លើកយកប្រធានបទលើការងារគ្រប់គ្រងសំរាម និងសំណល់ការដ្ឋាននៅក្រុងព្រះសីហនុ មកពិភាក្សា ដោយមានការចូលរួមពី លោក យន្ត មីន អភិបាលខេត្តព្រះសីហនុ , លោក អ៊ី សុខឡេង អភិបាលក្រុងព្រះសីហនុ , លោក ចេង ស្រុង ប្រធានមន្ទីររៀបចំដែនដីខេត្តព្រះសីហនុ, លោក សាមុត សុធារិទ្ធ ប្រធានមន្ទីរបរិស្ថាន, ព្រមទាំងមន្ត្រីថ្នាក់ដឹកនាំស្ថាប័នពាក់ព័ន្ធ និងចៅសង្កាត់ មេភូមិជាច្រើនទៀតបានចូលរួម។
តាមការលើកឡើង របស់លោក ដេ វីត តំណាងក្រុមហ៊ុនប្រមូលសំរាម KSWM ប្រចាំក្រុងព្រះសីហនុ បានឲ្យដឹងថា កន្លងមកនេះ ក្រុមហ៊ុនខ្លួន បានប្រជុំពិភាក្សាជាមួយមន្ត្រីជាថ្នាក់ដឹកនាំសង្កាត់ទាំង៤ និងមេភូមិ នាក្រុងព្រះសីហនុ ដើម្បីរកទីតាំងដាក់ធុងកុងតឺន័រ ហើយជាលទ្ធផលយើងកំណត់បានទីតាំងចំនួន ៣៥ សម្រាប់ដាក់ទូរកុងតឺន័រ ដើម្បីងាយស្រួលឡានដឹកជញ្ជូនសំរាម ចេញ ទៅកាន់ទីលានចាក់សំរាមបានទាន់ពេលវេលា។ លោកបន្តថាម្យ៉ាងទៀតក្រុមហ៊ុន KSWM នឹងរៀបចំកម្មវិធីថ្មី គឺការប្រមូលសំរាមចេញពីទីប្រជុំជនក្រុងព្រះសីហនុ ចាប់ពីម៉ោង ៨យប់ រហូត ដល់ម៉ោង ៦ព្រឹក។ ប៉ុន្តែដោយឡែក ចំពោះពេលព្រឹកក្រុមហ៊ុន KSWM នឹងប្រមូលសំរាមតាមគោលដៅសំខាន់ៗ ក្នុងក្រុង ដើម្បីកាត់បន្ថយបរិមាណសំរាមនៅក្នុងទីប្រជុំជនក្រុងព្រះសីហនុ ឲ្យបានប្រសើរឡើង។
លោក ដេ វីត បន្តថា ចប្ចុប្បន្ននេះ ក្រុមហ៊ុនមានស្ថានីយស្តុបសំរាម ចំនួន២កន្លែង ដើម្បីបញ្ចៀសសំរាម នៅពេលមានការកកស្ទះចរាចរណ៍តាមផ្លូវឆ្ពោះទៅកាន់ទីលានចាក់សំរាម។
នៅក្នុងកិច្ចប្រជុំនោះដែរ លោក សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមការងារថ្នាក់ជាតិ ចុះជួយខេត្តព្រះសីហនុ ក៏បានសន្យាថា នឹងផ្ដល់ធុងកុងតឺន័រ ដាក់សំរាមចំនួន ៥០ធុង និងជួយចាក់សាបបេតុង សម្រាប់ដាក់ធុងកុងតឺន័រ នៅតាមសង្កាត់ទាំង ៤ចំនួន ៣៥កន្លែង ដើម្បីងាយស្រួលក្នុងការប្រមូលសំរាម និងសំណល់ការដ្ឋានចេញពីទីប្រជុំជនក្រុងព្រះសីហនុ ដើម្បីឈានទរក្សាសោភណភាព បរិស្ថាន និងអនាម័យ នាទីក្រុងព្រះសីហនុ ដែលជាក្រុងទេសចរណ៍ ដ៏សំខាន់ របស់ប្រទេសកម្ពុជា ឲ្យកាន់តែប្រសើរឡើងថែមទៀត ដើម្បីឲ្យសាកសម្យជា “តារារះនាទិនារតី” នៃព្រះរាជាណាចក្រកម្ពុជា៕ ដែន សីមា
