ភ្នំពេញ ៖ ប្រពន្ធសុំលុយប្តី ១០.០០០រៀល ហើយជនរងគ្រោះមិនព្រមឲ្យ ក៏មានជម្លោះជាមួយគ្នា បន្ទាប់មកជនរងគ្រោះបានយកដៃទៅច្របាប់កប្រពន្ធ ហើយម្តាយមកជួយ ដោយបានកាន់កាំបិតបុ័ងតោមកកាប់ជនរងគ្រោះចំកញ្ចឹងក បណ្តាលឲ្យស្លាប់។
នៅថ្ងៃទី២៤ ឧសភា ២០១៩ វេលាម៉ោង២០ នគរបាលប៉ុស្តិ៍រដ្ឋបាលទឹកថ្លា បានធ្វើការឃាត់ខ្លួនជនសង្ស័យ២នាក់ ម្តាយនិងកូនស្រី ករណីឃាតកម្មទំនាស់ប្រើកាំបិតកាប់ចាក់សម្លាប់កូនប្រសា នៅចំណុចក្នុងបន្ទប់ជួលផ្ទះសង់ថ្មី ផ្លូវបេតុង ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ ។
ជនសង្ស័យ០២នាក់ រួមមាន ៖ ១-ឈ្មោះ គង់ ធីតា ភេទស្រី អាយុ៤៩ឆ្នាំ ជាម្តាយ ជនជាតិខ្មែរ មុខរបរនៅផ្ទះ ស្នាក់នៅផ្ទះលេខ២៣J ផ្លូវបេតុង ក្រុម៧៦ ភូមិ១៣ សង្កាត់ទន្លេរបាសក់ ខណ្ឌចំការមន ។ ២-ឈ្មោះ ង៉ូយ សុម៉ារី ភេទស្រី អាយុ២០ឆ្នាំ ជាកូនស្រី ជនជាតិខ្មែរ មុខរបរនៅផ្ទះ ស្នាក់នៅបន្ទប់ជួល ផ្លូវបេតុង ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ ។
ជនរងគ្រោះ ឈ្មោះ គឹម យ៉ត ភេទប្រុស អាយុ២៩ឆ្នាំ ជាកូនប្រសា ជនជាតិខ្មែរ មុខរបរបុគ្គលិកក្រុមហ៊ុនឯកជន ស្នាក់នៅបន្ទប់ជួល ផ្លូវបេតុង ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ ស្លាប់នៅក្នុងផ្ទះកើតហេតុខាងលើ ។ សម្ភារៈបន្សល់ទុកនៅកន្លែងកើតហេតុ កាំបិតបុ័ងតោចំនួន១ កូនកាំបិតចុងស្រួចដងឈើចំនួន១ ខ្សែភ្លើងជាប់ព្រី១ខ្សែ ភួយចំនួន២ សារ៉ុងពណ៌ផ្ទៃមេឃចំនួន១ ស្កុតរុំ១ដុំ ខ្សែជ័រនីឡុងពណ៌ផ្កាឈូកចំនួន១ និងរូបថត១សន្លឹក ។
នគរបាលប៉ុស្តិ៍ទឹកថ្លា បានរៀបរាប់ពីដំណើររឿងហេតុនេះថា ៖ មុនពេលកើតហេតុ ជនសង្ស័យឈ្មោះ ង៉ូយ សុម៉ារី និងជនរងគ្រោះ គឹម យ៉ត បានរៀបការជាប្តីប្រពន្ធជាមួយគ្នា នៅថ្ងៃទី២៦ មករា ២០១៩។ ជនសង្ស័យឈ្មោះ ង៉ូយ សុម៉ារី បាននិយាយជាមួយជនរងគ្រោះ ដោយសុំចុះសំបុត្រអាពាហ៍ពិពាហ៍ (អេតាស៊ីវិល) នឹងគ្មា ហើយជនរងគ្រោះបាននិយាយថា ចាំការបាន២ឆ្នាំចាំទៅចុះសំបុត្រអាពាហ៍ពិពាហ៍ ដោយមានចិត្តប្រច័ណ្ឌជាមួយប្តី ហើយក៏ចេះតែមានទំនាស់នឹងគ្នាជាញឹកញ៉ាប់ ។
លុះដល់នៅថ្ងៃទី២៣ឧសភា២០១៩ ពេលល្ងាច ជនសង្ស័យឈ្មោះ ង៉ូយ សុម៉ារី បានទៅយកម្តាយរបស់ខ្លួន ឈ្មោះគង់ ធីតា ស្នាក់នៅសង្កាត់ទន្លេបាសាក់ ខណ្ឌដូនពេញ ដើម្បីមកស្នាក់នៅជាមួយខ្លួន ដើម្បីឲ្យ ជួយមើលប្តីព្រោះមានអាការៈមិនសូវស្រួលខ្លួន ។ បន្ទាប់មកនៅថ្ងៃទី២៤ឧសភា២០១៩ ជនសង្ស័យឈ្មោះ ង៉ូយ សុម៉ារី បានសុំលុយជនរងគ្រោះ(ប្តី) ១០.០០០រៀល ហើយជនរងគ្រោះមិនព្រមឲ្យ ក៍មានជម្លោះជាមួយគ្នាតែម្តង។
បន្ទាប់មកជនរងគ្រោះ បានយកដៃទៅច្របាប់កជនសង្ស័យឈ្មោះ ង៉ូយ សុម៉ារី ហើយជនសង្ស័យ ង៉ូយ សុម៉ារី បានស្រែកឲ្យម្តាយមកជួយ ហើយជនសង្ស័យឈ្មោះ គឹម ធីតា បានកាន់កាំបិតបុ័ងតោ មកកាប់ជនរងគ្រោះចំកញ្ចឹងក ហើយជនសង្ស័យឈ្មោះ ង៉ូយ សុម៉ារី បានខ្សែភ្លើង ស្កុតចងរុំដៃជើងជនរងគ្រោះ រួចយកកូនកាំបិតចុងស្រួចចាក់ជនរងគ្រោះបណ្តាលឲ្យស្លាប់នៅហ្នឹងកន្លែងតែម្តង ។ បន្ទាប់កាប់សម្លាប់ហើយ ទើបនៅថ្ងៃទី២៤ឧសភា២០១៩ វេលាម៉ោង២១ ជនសង្ស័យទាំង២នាក់ បានចូលខ្លួនមកសារភាពនៅប៉ុស្តិ៍នគរបាលរដ្ឋបាលទឹកថ្លា រួចសមត្ថកិច្ចនគរបាល ធ្វើការឃាត់ខ្លួនជនសង្ស័យទាំង២នាក់តែម្តង។
ជនសង្ស័យកំពុងឃាត់ខ្លួន នៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនីតិវិធី ៕ ដោយ៖កូឡាប
