ខេត្តព្រសីហនុ៖ កម្លាំងនគរបាល នៃស្នងការដ្ឋាននគរបាលខេត្តព្រះសីហនុ ឲ្យដឹងថា សមត្ថកិច្ចបានបន្តចុះបង្ក្រាបបទល្មើសគ្រឿងញៀន៣ករណី និងឃាត់ខ្លួនជនសង្ស័យពាក់ព័ន្ធបទល្មើសនេះចំនួន៣នាក់។
កម្លាំងនគរបាលប្រឆាំងគ្រឿងញៀន នៃស្នងការដ្ឋានខេត្តព្រះសីហនុ បានឲ្យថា នៅយប់រំលងអាធ្រាត្រ ឆ្លងចូលថ្ងៃទី២៥ ខែឧសភា ឆ្នាំ២០១៩នេះ កម្លាំងជំនាញបានចុះបង្ក្រាបបទល្មើសគ្រឿងញៀនចំនួន ៣ករណី ដាច់ដោយឡែកពីគ្នា ដែលជនសង្ស័យបានធ្វើសកម្មភាព ក្នុង នាទីប្រជុំជនក្រុងព្រះសីហនុ។
យុទ្ធនាការនេះ សមត្ថកិច្ចបាន ឃាត់ខ្លួនជនសង្ស័យ ៣នាក់គឺ៖ ឈ្មោះសុខ បារាំង ភេទប្រុសអាយុ ២៤ ឆ្នាំ ជនជាតិខ្មែរ មុខរត់ម៉ូតូឌុប ទីកន្លែងកំណើត ភូមិបន្ទាយចារ ឃុំ ឆ្នាល់មាន់ ស្រុកគាស់ក្រឡ ខេត្តបាត់ដំបង។ វត្ថុតាង ដែលសមត្ថកិច្ចដកហូតបាន រួមមាន៖ ម្សៅពណ៌សថ្លាសង្ស័យជាសារធាតុញៀនចំនួន ២ កញ្ចប់, ទរស័ព្ទចំនួន២ គ្រឿង និងសម្ភារៈវេចខ្ចប់មួយចំនួនទៀត។
ឈ្មោះ សុិម សុខឃីម ភេទប្រុស អាយុ ២៩ ឆ្នាំ ជនជាតិខ្មែរ មុខរបរម៉ៅការសំណង់ ទីកន្លែងកំណើតភូមិ កោះអណ្តែត ឃុំ ត្រពាំងជង ស្រុកបាកាន ខេត្តពោធិសាត់។ វត្ថុតាងសមត្ថកិច្ចដកហូតបានរួមមាន៖ ម្សៅពណ៌សរថ្លាសង្ស័យជាសារធាតុញៀនចំនួន៥កញ្ចប់ (២ កញ្ចប់ធំ) ទូរស័ព្ទ១ គ្រឿង ជញ្ជីញថ្លឹង១គ្រឿង និងសម្ភារៈវេចខ្ចប់មួយចំនួនទៀត និងឈ្មោះ ប៉ោ សំឡុង ភេទប្រុសអាយុ ២៤ឆ្នាំ ជនជាតិខ្មែរ មុខរបរជាងសំណង់ ទីកន្លែងកំណើត ស្រុកពញាក្រែក ខេត្តត្បូងឃ្មុំ។ ចំណែកវត្ថុតាង ដែលសមត្ថកិច្ចដកហូតបានមាន៖ ម្សៅពណ៌សរថ្លាសង្ស័យជាសារធាតុញៀនចំនួន ១២ កញ្ចប់, ទូរស័ព្ទចំនួន១ គ្រឿង , ម៉ូតូ១គ្រឿង និងសម្ភារៈវេចខ្ចប់មួយចំនួនទៀត។
មន្ត្រីនគរបាលខេត្តព្រះសីហនុ បានឲ្យដឹងថា បច្ចុប្បន្ននេះ ជនសង្ស័យទាំង៣នាក់ ត្រូវកម្លាំងនគរបាលប្រឆាំងបទល្មើសគ្រឿងញៀនខេត្តព្រះសីហនុ កំពុងសាកសួរ និងត្រៀមបញ្ជូនសំរឿងខាងលើនេះ ទៅកាន់សាលាដំបូងខេត្តព្រះសីហនុ ដើម្បីចាត់ការនីតិវិធីច្បាប់៕ ដែន សីមា
