ភ្នំពេញ ៖ នៅយប់ថ្ងៃទី២៦ ខែឧសភា ឆ្នាំ ២០១៩ នេះ គណៈកម្មាធិការជាតិរៀបចំការបោះឆ្នោត (គ.ជ.ប) ចេញប្រកាសបញ្ជីលទ្ធផលបឋម នៃការបោះឆ្នោតជ្រើសរើសក្រុមប្រឹក្សា អាណត្តិទី៣ ទាំង២៥រាជធានី-ខេត្ត ទូទាំងប្រទេស។ ជាមួយនឹងព្រឹត្តិការណ៍នេះ គ.ជ.ប.បានបញ្ជាក់ថា ដំណើរការនៃការបោះឆ្នោត និងការរាប់សន្លឹកឆ្នោត បានប្រព្រឹត្តទៅដោយរលួនគ្មានការរាំងស្ទះ គ្មានអំពើហិង្សា គ្មានការគំរាមកំហែង និងមានសន្តិសុខល្អ។
លទ្ធផលបង្ហាញថា ការិយាល័យបោះឆ្នោតមានចំនួន២០៣ អ្នកដែលបានទៅបោះឆ្នោតមានចំនួន ១១,៥៦៥នាក់ ស្មើនឹង៩៩.៩៤ភាគរយ ហើយអ្នកដែលមិនបានទៅបោះឆ្នោតមានតែ៧នាក់ប៉ុណ្ណោះ ក្នុងនោះមានម្នាក់ស្លាប់ ដោយសារគ្រោះថ្នាក់ចរាចរណ៍។
គ.ជ.ប. ក៏បានចេញសេចក្តីប្រកាសព័ត៌មាន លេខ ០៤៩ ព្រឹត្តិការណ៍ទូទៅនៃការបើកការិយាល័យបោះឆ្នោត ការបោះឆ្នោត និនិងការរាប់សន្លឹកឆ្នោតផងដែរ។ នៅថ្ងៃទី ២៦ ខែឧសភាឆ្នាំ ២០១៩ ដែលជាថ្ងៃបោះឆ្នោតជ្រើសរើសក្រុមប្រឹក្សាអាណត្តិទី ៣ ការិយាល័យបោះឆ្នោតទូទាំងប្រទេសដែលមានចំនួន 203 ការិយាល័យបើកដំណើរការនៅម៉ោងប្រព្រឹត្តដោយគ្មានការរាំងស្ទះ។ ដោយសារអ្នកបោះឆ្នោតគឺជាសមាជិកក្រុមប្រឹក្សាឃុំសង្កាត់ក្នុងមុខតំណែងដូចនេះមានការិយាល័យបោះឆ្នោតក្នុងខេត្តខ្លះត្រូវបានបិទបញ្ចប់ការបោះឆ្នោតជាបន្តបន្ទាប់ដោយអ្នកបោះឆ្នោតបានមកបោះឆ្នោតគ្រប់ចំនួន ហើយគណៈកម្មការការិយាល័យបោះឆ្នោតក៏បានបន្តនីតិវិធីជាបន្តបន្ទាប់ដើម្បីរាប់សន្លឹកឆ្នោតជាបន្តទៀត។
គិតត្រឹមម៉ោង ១០ និង ៣០ នាទីព្រឹកក្នុងចំណោមការ៉េមឲ្យបោះឆ្នោតទាំង 203 ការិយាល័យ មានការិយាល័យបោះឆ្នោតចំនួន ១៩៦ ការិយាល័យ ត្រូវបានបិទបញ្ចប់ការបោះឆ្នោតនិងការិយាល័យចំនួន ៧ ទៀតមិនទាន់បានបិទការបោះឆ្នោតមានអ្នកមិនទាន់បានបោះឆ្នោតចំនួន ១០ នាក់ ក្នុងនោះមានអ្នកបោះឆ្នោតចំនួន ២ នាក់បានទទួលមរណភាពដោយគ្រោះថ្នាក់ចរាចរណ៍នៅឃុំក្រែត ស្រុកពញាក្រែកខេត្តត្បូងឃ្មុំ និងមានការិយាល័យរាប់សន្លឹកឆ្នោតចំនួនជាង ៥០ ភាគរយបានបញ្ចប់ការរាប់សន្លឹកឆ្នោត។
គ.ជ.ប.បានបញ្ជាក់ថាសរុបជារួមដំណើរការនៃការបោះឆ្នោតនិងការរាប់សន្លឹកឆ្នោតបានប្រព្រឹត្តទៅដោយរលួនគ្មានការរាំងស្ទះគ្មានអំពើហិង្សាគ្មានការគំរាមកំហែងនិងមានសន្តិសុខសណ្ដាប់ធ្នាប់ល្អ៕ ដោយ៖កូឡាប