ខេត្តព្រះសីហនុ ៖ មន្ត្រីនគរបាលស្រុកព្រៃនប់ បានឲ្យដឹងថា មានគ្រោះថ្នាក់ចរាចរណ៍មួយករណី បានកើតឡើង នៅម៉ោងប្រមាណ ៥ព្រឹកថ្ងៃទី២៧ ខែឧសភា ឆ្នាំ២០១៩នេះ បណ្តាលឲ្យស្លាប់មនុស្សម្នាក់។
សមត្ថកិច្ចបន្តថា គ្រោះថ្នាក់នេះ កើតឡើងនៅភូមិតានៃ ឃុំតានៃ ស្រុកព្រៃនប់ ខេត្តព្រះសីហនុ តាមផ្លូវជាតិលេខ៤ ចន្លោះបង្គោលគីឡូម្រ៉ែតលេខ ១៦១-១៦២ រវាងរថយន្ត១គ្រឿង ម៉ាក LEXUS RX300 ពណ៌ស ពាក់ផ្លាកលេខ ភ្នំពេញ 2AZ-0795 ដែលមានទិសដៅពីខេត្តព្រះសីហនុ ឆ្ពោះទៅរាជធានីភ្នំពេញ។ រថយន្តបង្កខាងលើនេះ បើកបរដោយ ឈ្មោះ វង់ នាងសិន ភេទប្រុស អាយុ ៥២ឆ្នាំ មានទីលំនៅ ក្រុង-ខេត្តព្រះសីហនុ (ជនជាតិចិន) និងអ្នករួមដំណើរម្នាក់ ឈ្មោះ ប៊ុន ម៉ាប់ ភេទប្រុស អាយុ ៣៣ឆ្នាំ មានទីលំនៅរាជនីភ្នំពេញ។
រថយន្តនេះ ពេលធ្វើដំណើរមកដល់ចំណុចកើតហេតុខាងលើ ក៏បានរេចង្កូតមកខាងឆ្វេងដៃ ស្របពេលមានរថយន្ត ១គ្រឿងម៉ាក FREIGHTER ពណ៌ត្រួយចេក,ស ពាក់ផ្លាកលេខ 3C-7354 បើកបរមានទិសដៅផ្ទុយគ្នា ហើយបានមកដល់កន្លែងកើតហេតុ ក៏បានបុកគ្នាតែម្តង។
សមត្ថកិច្ចបន្តថា អ្នកបើកបររថយន្តខាងលើនេះ មានឈ្មោះ ឈុន បូរ៉ា ភេទប្រុស អាយុ ៣៣ឆ្នាំ មានទីលំនៅភូមិតែប៉ែ ឃុំស្រែចារ ស្រុកស្នួល ខេត្តក្រចេះ និង អ្នករួមដំណើរម្នាក់ទៀតមានឈ្មោះ យិន នីតា ភេទស្រី អាយុ ២០ឆ្នាំ មានទីលំនៅភូមិពូទុង ឃុំចុងផ្លាស់ ស្រុកកែវសីមា ខេត្តមណ្ឌលគីរី។
គ្រោះថ្នាក់ចរាចរណ៍ខាងលើនេះ បណ្ដាលឲ្យមនុស្សស្លាប់មនុស្សម្នាក់ ឈ្មោះ ឈុន ប៉រ៉ា អ្នកបើកបររថយន្ត ធំម៉ាក FREIGHTER ស្លាប់នៅកន្លែងកើតហេតុ ដោយសារពេលបុកធ្លាក់ចេញតាមទ្វាររថយន្តមកដី។
សមត្ថកិច្ចនគរបាលស្រុកព្រៃនប់ បានឲ្យដឹងបន្តថា គ្រោះថ្នាក់ចរាចរណ៍ខាងលើនេះ មន្ត្រីជំនាញកំពុងបន្តនីតិវិធីដោះស្រាយ តាមផ្លូវច្បាប់៕ ដែន សីមា