បុរសជនជាតិបារាំងចំនួន ៣នាក់ ត្រូវបានតុលាការក្នុងប្រទេសអ៊ីរ៉ាក់កាត់ទោសប្រហារជីវិត ដោយសារតែពួកគេបានចូលរួមជាមួយនឹងក្រុមសកម្មប្រយុទ្ធរដ្ឋអ៊ីស្លាម (IS)។
បុរសទាំងនោះត្រូវបានគេស្គាល់ឈ្មោះថា Kévin Gonot, Léonard Lopez, Salim Machou។ ពួកគេមានរយៈពេល ៣០ថ្ងៃ ដើម្បីធ្វើការប្តឹងទាស់នឹងការសម្រេចរបស់តុលាការ។
បុរសទាំងនោះស្ថិតក្នុងចំណោមជនជាតិបារាំងចំនួន ១២នាក់ ដែលត្រូវបានចាប់ខ្លួនក្នុងប្រទេសស៊ីរី។ កាលពីខែកុម្ភៈ ពួកគេត្រូវបានបញ្ជូនទៅកាន់ប្រទេសអ៊ីរ៉ាក់ដើម្បីធ្វើការកាត់ទោស។
រហូតមកដល់ពេលនេះ ប្រទេសបារាំងមិនទាន់មានប្រតិកម្មអ្វីឡើយទៅនឹងសេចក្តីសម្រេចកាត់ទោសប្រហារជីវិតរបស់តុលាការក្នុងទីក្រុងបាដាដ ប៉ុន្តែកាលពីខែកុម្ភៈ ប្រធានាធិបតីបារាំង Emamanuel Macron ធ្លាប់បានបដិសេធមិនបញ្ចេញមតិអ្វីឡើយ ដោយគាត់គ្រាន់តែលើកឡើងថា វាគឺជាបញ្ហាអធិបតេយ្យភាពរបស់អ៊ីរ៉ាក់។
ចំណែកក្រុមអង្គការសិទ្ធិមនុស្សបានធ្វើការរិះគន់យ៉ាងខ្លាំងទៅលើការកាត់ទោសក្រុមជនសង្ស័យ IS នៅក្នុងប្រទេសអ៊ីរ៉ាក់។
សកម្មជនសិទ្ធិមនុស្សបាននិយាយថា តុលាការជារឿយៗ ពឹងផ្អែកទៅលើភស្ថុតាងមិនគ្រប់គ្រាន់ ឬការសារភាពដែលធ្វើឡើងក្រោមការបង្ខិតបង្ខំ ឬហិង្សា៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC