ស្ថាបនិក និងជានាយកប្រតិបត្តិរបស់ក្រុមហ៊ុន Huawei លោក Ren Zhengfei បានថ្លែងថាវិធានការសឹងសឹករបស់រដ្ឋាភិបាលចិនចំពោះក្រុមហ៊ុន Apple ទំនងជាមិនកើតមាននោះទេ ហើយប្រសិនជាវាកើតឡើង លោកនឹងធ្វើការប្រឆាំងទៅនឹងវិធានការនោះ។
លោក Ren Zhengfei បានចាត់ទុកក្រុមហ៊ុនបច្ចេកវិទ្យាអាមេរិច Apple ជាគ្រូដែលមានការអភិវឌ្ឍន៍ខ្លាំង ដូច្នេះក្នុងនាមជាសិស្ស មិនគួរសងសឹកនឹងគ្រូឡើយ។ នេះជាការថ្លែងរបស់លោកនៅក្នុងកិច្ចសម្ភាន៍ជាមួយទូរទស្សន៍ Bloomberg Television នៅថ្ងៃច័ន្ទនេះ។
នៅពេលសួរថា តើរដ្ឋាភិបាលចិនគួរធ្វើការសងសឹកលើ Appleទេ លោកបានឆ្លើយថា លោកនឹងធ្វើការប្រឆាំងចំពោះរាល់វិធានការណាមួយដែលនឹងធ្វើដោយទីក្រុងប៉េកាំង។
លោកថ្លែងថា “ទី ១ វិធានការប្រឆាំងនឹង Apple នឹងមិនកើតឡើងនោះទេ។ ទី ២ ប្រសិនវាកើតឡើង លោកនឹងធ្វើជាមនុស្សដំបូងគេប្រឆាំងនឹងវិធានការនោះ។
“Apple គឺជាគ្រូរបស់ខ្ញុំ។ វាមានការអភិវឌ្ឍន៍ខ្លាំងមុនយើង។ ក្នុងនាមជាសិស្ស តើហេតុអ្វីខ្ញុំត្រូវប្រឆាំងជាមួយនឹងគ្រូ។ ខ្ញុំនឹងមិនធ្វើវានោះទេ”។
លោកថ្លែងថា ពួកយើងនឹងបាត់បង់គោលដៅរីកចម្រើន ប៉ុន្តែពួកយើងនៅតែរីកចម្រើនទៅមុខ។ ការតស៊ូក្នុងស្ថានភាពលំបាក វាឆ្លុះបញ្ជាំងឲ្យឃើញពីភាពអស្ចារ្យរបស់យើង។
សូមបញ្ជាក់ថា កាលពីពេលថ្មីៗនេះ រដ្ឋភិបាលអាមេរិចបានដាក់បញ្ជូល Huawei ក្នងបញ្ជីខ្មៅ ដែលមិនអាចអោយក្រុមហ៊ុនអាមេរិចណាមួយធ្វើជំនួញជាមួយបានឡើយ ហើយជាលទ្ធផល ក្រុមហ៊ុន Google របស់អាមេរិចបានប្រកាសផ្តាចទំនាក់ទំនងជាមួយ Huawei។ ក្រុមហ៊ុនផ្សេងៗទៀត ដែលជាអ្នកផ្គត់ផ្គងដ៏សំខាន់របស់ Huawei ក៏បានប្រកាសឈប់ធ្វើជំនួញជាមួយក្រុមហ៊ុនយក្សនោះ
ផងដែរ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
