ភ្នំពេញ ៖ នារី២នាក់ ត្រូវចាប់ខ្លួន និងដកហូតក្រាមសថ្លា សង្ស័យជាសារធាតុញៀន ចំនួនសរុប២២កញ្ចប់តូចធំ និងវត្ថុតាង ពាក់ព័ន្ធគ្រឿងញៀនមួយចំនួនធំ។ មេក្លោងជួញដូរគ្រឿងញៀន ត្រូវបានកម្លាំងនគរបាលមន្ទីរគ្រឿងញៀន សហការជាមួយកម្លាំងនគរបាលស្នងការរាជធានីភ្នំពេញ និងកម្លាំងនគរបាលខណ្ឌឫស្សីកែវ ឃាត់ខ្លួននៅក្នុងផ្ទះកាត់ដេរសំលៀកបំពាក់មួយកន្លែង នៅវេលាម៉ោង២និង៣០នាទីរសៀល ថ្ងៃអាទិត្យ ទី២៦ ខែឧសភា ឆ្នាំ២០១៩នេះ នៅចំណុចផ្ទះលេខ៣៦ (យីហោ រចនា កាត់ដេរសំលៀកបំពាក់) តាមផ្លូវបេតុងលេខ៩៣ ក្រុម១៤ ភូមិចុងខ្សាច់ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ។
នគរបាលខណ្ឌឫស្សីកែវ បានឲ្យដឹងថា ជនសង្ស័យទី១-ឈ្មោះ ហ៊ុម ពៅ ភេទស្រី អាយុ២៥ឆ្នាំ និងជនស្ស័យទី២- ឈ្មោះ ហ៊ឹម ជូរ ភេទស្រី អាយុ៣១ឆ្នាំ។
បន្ទាប់ពីសមត្ថកិច្ចនគរបាល ធ្វើការឃាត់ខ្លួននារី២នាក់ និងឆែកឆេររកឃើញវត្ថុតាងដូចជា ក្រាមសថ្លាសង្ស័យជាសារធាតុញៀន ចំនួន២២កញ្ចប់ (ក្នុងនោះមាន៦កញ្ចប់ធំ), ជញ្ជីងសម្រាប់ថ្លឹងថ្នាំញៀន ចំនួន២គ្រឿង, ថង់វេចខ្ចប់គ្រឿងញៀនមួយចំនួន និងឧបករណ៍សម្រាប់ប្រើប្រាស់គ្រឿងញៀនមួយចំនួនទៀត។
បច្ចុប្បន្ន ជនសង្ស័យឃាត់ខ្លួនបណ្តោះអាសន្ន នៅមន្ទីរគ្រឿងញៀន នៃអគ្គស្នងការដ្ឋាននគរបាលជាតិ ដើម្បីចាត់ការតាមនីតិវិធី៕ ដោយ ៖ កូឡាប
