កំពត ៖ បញ្ជាការដ្ឋានកងរាជអាវុធហត្ថខេត្តកំពត នៅថ្ងៃទី២៧ឧសភា២០១៩នេះ បានឲ្យដឹងថា កម្លាំងសមត្ថកិច្ចអាវុធហត្ថខេត្តកំពតនិងខេត្តព្រះសីហនុ បានសហការខ្លួនជនជាតិចិនពីរនាក់និងជនជាតិខ្មែរម្នាក់ពាក់ព័ន្ធករណីឃាតកម្មនៅខេត្តព្រះសីហនុកាលពីពេលថ្មីៗនេះដែលបានរត់ទៅលាក់ខ្លួននៅទឹកដីខេត្តកំពត។
បញ្ជាការដ្ឋានបានឲ្យដឹងថា នៅវេលាម៉ោង១៩និង១៥នាទី ថ្ងៃទី២៦ ឧសភា២០១៩ កម្លាំងមន្ទីរយុត្តិធម៌កងរាជអាវុធហត្ថខេត្តកំពត បានសហការជាមួយខេត្តព្រះសីហនុធ្វើការឃាត់ខ្លួនជនសង្ស័យចំនួន ៣នាក់មានឈ្មោះ ដូចខាងក្រោម៖
1-LIU SHENG ភេទ ប្រុស ជនជាតិ ចិន អាយុ 30ឆ្នាំ មុខរបរ លក់នំប៉័ង
2-XU JUN JUN ភេទស្រី ជនជាតិ ចិន អាយុ 32ឆ្នាំ និង
3-អ័រ ប្រុស ភេទ ប្រុស អាយុ 20 ឆ្នាំ ជនជាតិខ្មែរ រស់នៅភូមិរបងក្រាស ឃុំកំពង់ត្រាចខាងកើត ស្រុកំពង់ត្រាច ខេត្តកំពត និង រថយន្តម៉ាកហាយលែនឌើ ពណ៌ស ពាក់ស្លាកលេខ ភ្នំពេញ 2AA 6145 នៅចំណុចគល់ស្ពានព្រែកកំពង់បាយ ស្ថិតក្នុងភូមិកំពង់បាយខាងត្បូង សង្កាត់កំពង់បាយ ក្រុងកំពត ខេត្តកំពត។
សមត្ថកិច្ចអាវុធហត្ថបានបញ្ជាក់ថាការចាប់ខ្លួនជនល្មើសទាំង ៣ នាក់ខាងលើនេះ ពាក់ព័ន្ធអំពីករណីឃាតកម្មកាលពីវេលាម៉ោង ១៧និង១៥នាទី ថ្ងៃទី២៥ ខែឧសភា ឆ្នាំ២០១៩ នៅចំណុចឆ្នេរអូរឈើទាល សង្កាត់៤ ក្រុងព្រះសីហនុ ខេត្តព្រះសីហនុ។
បច្ចុប្បន្ន ជនសង្ស័យនិង វត្ថុតាង បានប្រគល់ជូនកម្លាំងជំនាញ អហ ខេត្តព្រះសីហនុ ដើម្បីចាត់ការតាមនីតិវិធី ៕ ដោយ៖កូឡាប
