បាងកក ៖ សម្តេចតេជោនាយករដ្ឋមន្ត្រី នៃព្រះរាជាណាចក្រកម្ពុជា ជាស្ថាបនិកសន្តិភាព បានថ្លែងសុន្ទរកថាគន្លឹះ នៅក្នុងសន្និបាតប្រចាំឆ្នាំរបស់គណៈកម្មការសេដ្ឋកិច្ច និងសង្គមកិច្ចសម្រាប់អាស៊ី និងប៉ាស៊ីហ្វិក នៃអង្គការសហប្រជាជាតិ (UN-ESCAP) លើកទី៧៥ ក្រោមប្រធានបទ “ការផ្តល់សិទ្ធិអំណាចជូនប្រជាជន និងការធានានូវបរិយាប័ន្ន និងសមភាព” នាថ្ងៃទី ២៧ ខែ ឧសភា ឆ្នាំ ២០១៩ នៅ ទីក្រុងបាងកក។ នេះគឺជាលើកដំបូងបំផុតក្នុងប្រវត្តិសាស្ត្រ ដែលនាយករដ្ឋមន្ត្រី នៃព្រះរាជាណាចក្រកម្ពុជា ចូលរួមក្នុងសន្និបាតប្រចាំឆ្នាំរបស់ UN-ESCAP ចាប់តាំងពីកម្ពុជាបានចូលជាសមាជិកក្នុងឆ្នាំ ១៩៥៤។
សម្តេចតេជោនាយករដ្ឋមន្ត្រី បានចែករំលែកពីភាពជោគជ័យរបស់កម្ពុជា ក្នុងការបញ្ចប់សង្គ្រាមស៊ីវិល និងការធ្វើបរិយាប័ន្នតាមរយៈ គោលនយោបាយឈ្នះ-ឈ្នះ សម្រាប់ប្រជាជនកម្ពុជាគ្រប់ស្រទាប់វណ្ណៈ និង គ្រប់និន្នាការនយោបាយ។ ដោយសារគោលនយោបាយឈ្នះ-ឈ្នះ សង្គ្រាមដែលបានអូសបន្លាយរយៈពេលជាង ៣០ឆ្នាំ ត្រូវបានបញ្ចប់ទាំងស្រុង។ គោលនយោបាយឈ្នះ-ឈ្នះ បាននាំមកនូវសុខសន្តិភាព ដែលជាបុរេលក្ខខណ្ឌដ៏ចម្បង និងសំខាន់បំផុតសម្រាប់កសាងខឿនសេដ្ឋកិច្ច និងការអភិវឌ្ឍសង្គមជាតិ។ កម្ពុជាបានកសាងសេដ្ឋកិច្ច ពីបាតដៃទទេ ពីពំនូកផេះ រហូតក្លាយជាប្រទេសមួយក្នុងចំណោមប្រទេសដែលមានកំណើនសេដ្ឋកិច្ចលឿនបំផុតក្នុងពិភពលោក ដោយរក្សាបាននូវកំណើនសេដ្ឋកិច្ចជាមធ្យមក្នុងរង្វង់ ៧% ក្នុងមួយឆ្នាំ ចាប់ពីឆ្នាំ ១៩៩៥ ដល់ឆ្នាំ ២០១៨ ហើយកំណើននេះបានធ្វើឲ្យប្រជាជនជាច្រើនលាននាក់បានចាកផុតពីភាពក្រីក្រ។
សន្តិភាព ស្ថិរភាព និងការដឹកនាំប្រកបដោយថាមវន្តរបស់សម្តេច បាននាំមកនូវកំណើនសេដ្ឋកិច្ច ឱកាស និងភាពរុងរឿងដល់ប្រជាជនកម្ពុជា។ ការដឹកនាំប្រកបដោយចក្ខុវិស័យដ៏មុតមាំ របស់សម្តេចតេជោនាយករដ្ឋមន្ត្រី គឺជានិមិត្តសញ្ញានៃសន្តិភាព ស្ថិរភាព នៃប្រទេសកម្ពុជាបែបទំនើប ដែលជាមេដែកក្នុងការទាក់ទាញវិនិយោគនិងភ្ញៀវទេសចរណ៍ពីគ្រប់ទិសទី។
ឆាកជីវិតរបស់ សម្តេចតេជោនាយករដ្ឋមន្ត្រី បានផ្សារភ្ជាប់ទៅនឹងមាតុភូមិរបស់សម្តេច។ ភាពក្រីក្របានបង្រៀនសម្តេចអំពីតម្លៃនៃជីវិត អាណានិគមន៍និយមបានបង្រៀនសម្តេចអំពីការឲ្យតម្លៃចំពោះសេចក្តីថ្លៃថ្នូររបស់ប្រជាជន សង្គ្រាមស៊ីវិលបានបង្រៀនសម្តេចក្នុងការឲ្យតម្លៃដល់សន្តិភាពជាតិមាតុភូមិ។ “ឆាកជីវិតរបស់សម្តេច ពិតជាមានភាពអស្ចារ្យ ហើយសម្តេចពិតជាអ្នកដឹកនាំប្រកបដោយចក្ខុវិស័យ ជាអ្នកបង្កើតសន្តិភាព និងជាអ្នកស្ថាបនាជាតិ ពិតប្រាកដ”។
សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានបង្ហាញគន្លឹះគោលនយោបាយអភិវឌ្ឍន៍ចំនួន៣ របស់កម្ពុជា ក្នុងការសម្រេចគោលដៅ «គ្មាននរណាម្នាក់ត្រូវបានបំភ្លេចចោល»។
គន្លឹះគោលនយោបាយអភិវឌ្ឍន៍ចំនួន៣ ចំណុចសំខាន់ៗ ដែលមានប្រសាសន៍ដោយសម្ដេចតេជោ ហ៊ុន សែន នៅថ្ងៃទី២៧ ខែឧសភា ឆ្នាំ២០១៩នេះ រួមមាន៖ ១ -ការដាក់ចេញនូវ ក្របខ័ណ្ឌគោលនយោបាយជាតិគាំពារសង្គម ២០១៦-២០២៥ ដើម្បីបង្កើតផែនការយុទ្ធសាស្ត្រ ក្នុងការធានាឲ្យមានសុវត្ថិភាព ប្រាក់ចំណូល និងកាត់បន្ថយភាពងាយរងគ្រោះផ្នែកសេដ្ឋកិច្ច និងហិរញ្ញវត្ថុ ព្រមទាំងបង្កើនសុខុមាលភាពរបស់ប្រជាជន និងពង្រឹងសាមគ្គីភាពក្នុងសង្គម។ ២-ការផ្តល់សេវាថែទាំសុខភាព ដែលមានគុណភាព និងមានតម្លៃសមរម្យ តាមរយៈមូលនិធិសមធម៌សុខាភិបាល ដែលបានផ្តល់សេវាថែទាំសុខភាព ដោយឥតគិតថ្លៃ ដល់ប្រជាជនក្រីក្រ ព្រមទាំងការផ្តល់នូវជំនួយឧបត្ថម្ភជាសាច់ប្រាក់ ដល់ស្ត្រីសម្រាលកូន ក៏ដូចជាដល់ស្ត្រីមានផ្ទៃពោះ និងកុមារអាយុក្រោម២ឆ្នាំ នៃគ្រួសារក្រីក្រ និង៣-ការដាក់ចេញនូវគោលនយោបាយជាតិ ស្តីពីមនុស្សវ័យចាស់២០១៧-២០៣០ ដែលសំដៅគាំទ្រ និងដោះស្រាយបញ្ហារបស់មនុស្សវ័យចាស់ ដោយយកចិត្តទុកដាក់លើការប្រែប្រួល នៃកត្តាប្រជាសាស្ត្រ ជាមួយនឹងចក្ខុវិស័យនៃការធានាថា មនុស្សវ័យចាស់អាចចូលរួមដោយសេរី និងមានសេចក្តីថ្លៃថ្នូរ នៅក្នុងគ្រួសារ, សហគមន៍, សកម្មភាពសេដ្ឋកិច, សកម្មភាពសាសនា និងសកម្មភាពនយោបាយ តាមបំណងប្រាថ្នារបស់ពួកគាត់ ហើយប្រជាជនវ័យក្មេង ក៏ត្រូវតែទទួលបានចំណេះដឹង និងជំនាញដែលអាចអនុញ្ញាតឲ្យពួកគេរស់នៅប្រកបដោយផលិតភាព, សុខភាពល្អ មានភាពសកម្ម និងមានសេចក្តីថ្លៃថ្នូរ នៅពេលពួកគេឈានដល់វ័យចំណាស់។
សម្ដេចតេជោនាយករដ្ឋមន្ដ្រី បានបញ្ជាក់ថា បទពិសោធន៍របស់កម្ពុជា បានបញ្ជាក់ច្បាស់ថា សន្ដិភាព និងស្ថិរភាព គឺជាមូលដ្ឋានគ្រឹះមិនអាចខ្វះបានសម្រាប់ការអភិវឌ្ឍ ហើយបញ្ច្រាសមកវិញ ការអភិវឌ្ឍប្រកបដោយបរិយាប័ន្ន និងសមធម៌ គឺលក្ខខណ្ឌដ៏ចាំបាច់សម្រាប់ពង្រឹង និងធានានូវសុខសន្ដិភាព និងស្ថិរភាពសង្គម។ ឈរលើមូលដ្ឋាននៃបទពិសោធន៍នេះ ប្រជាជាតិកម្ពុជាទាំងមូល ផ្ដល់តម្លៃខ្ពស់បំផុតចំពោះការខិតខំបន្ដ ថែរក្សាសន្ដិភាព និងស្ថិរភាព ព្រមទាំងការជំរុញកិច្ចអភិវឌ្ឍន៍ប្រកបដោយបរិយាប័ន្ន ដែលបច្ចុប្បន្ននេះកំពុងហុចផ្លែផ្កាយ៉ាងពិតប្រាកដ ជាប្រយោជន៍ជូនដល់ពលរដ្ឋកម្ពុជា នៅគ្រប់ច្រកល្ហកក្នុងផ្ទៃប្រទេស៕ ដោយ៖កូឡាប