ខេត្តស្វាយរៀង ៖ យុវជនម្នាក់បានស្លាប់ភ្លាមៗនៅនឹងកន្លែង និងយុវជនម្នាក់ទៀតរងរបួសធ្ងន់ដោយសារជិះម៉ូតូ មិនប្រយ័ត្នបុកគូទរយន្តពីក្រោយលាន់ដូចរន្ទះទាំងកណ្តាលរាត្រី ។
ហេតុការណ៍នេះនៃគ្រោះថ្នាក់ខាងលើនេះបានកើតឡើង កាលពីវេលាម៉ោង១ រំលងអាធ្រាតថ្ងៃទី ២៧ ខែ ឧសភា ឆ្នាំ ២០១៩ ស្ថិតក្នុងភូមិបាក់រនាស់ សង្កាត់សង្ឃ័រក្រុងស្វាយរៀង តាមបណ្តោយផ្លូវជាតិលេខ១។
សមត្ថកិច្ចនគរបាល ក្រុងស្វាយរៀងបានឲ្យដឹងថា មានករណីគ្រោះថ្នាក់ចរាចរណ៍មួយកើតឡើងរវាងរថយន្ដ និងម៉ូតូព្រលះគ្នាលាន់ដូចរន្ទះ បណ្តាលឲ្យយុវជនម្នាក់ស្លាប់ និងយុវជនម្នាក់ទៀតរបួសធ្ងន់ ត្រូវបានបញ្ជូនៅសង្គ្រោះនៅមន្ទីរពេទ្យខេត្ត។ សមត្ថកិច្ចបានបន្តទៀតថា រថយន្ដដែលម៉ូតូបុកពីក្រោយ មិនស្គាល់ម៉ាកនោះទេ គ្រាន់តែដឹងថា ជារថយន្ដប្រភេទដឹកទំនិញធុនធំ បើកបរពីលិចទៅកើត ក្រោយកើតហេតុ អ្នកបើកបរមិនស្គាល់អត្តសញ្ញាណ បើករត់គេចពីកន្លែងកើតហេតុបាត់ស្រម៉ោល។
ចំណែកម៉ូតូម៉ាក្ស ហុងដា PCX ពណ៌ខ្មៅ ពាក់ផ្លាកលេខ ស្វាយរៀង ១ O ៤៨៤៩ (ផ្លាកលេខក្លែងក្លាយ) បើកបរដោយឈ្មោះ វ៉ោន សំណាង ភេទប្រុស អាយុ ២០ ឆ្នាំ មុខរបរកម្មកររោងចក្រ រស់នៅភូមិប្រសូត្រ ឃុំប្រសូត្រ ស្រុកស្វាយទាប ខេត្តស្វាយរៀង មិនពាក់មួកសុវត្ថិភាព+គ្មានកញ្ចក់មើលក្រោយ បើកបរពីលិចទៅកើត (ស្លាប់នៅកន្លែងកើតហេតុ) ម៉ូតូខូចខាតធ្ងន់ និងអ្នករួមដំណើរឈ្មោះ យស់ វ៉ាន់ណេត ភេទ ប្រុស អាយុ ២០ ឆ្នាំ មុខរបរ កម្មកររោងចក្រ រស់នៅភូមិ ពោធិ៍វង្ស ឃុំប្រសូត្រ ស្រុកស្វាយទាប ខេត្តស្វាយរៀង មិនពាក់មួកសុត្ថិភាពរងរបួសធ្ងន់ (បាក់ជើងឆ្វេង)។
បច្ចុប្បន្នមធ្យោបាយ រក្សាទុកនៅអធិការក្រុងស្វាយរៀង រីឯអ្នករបួស សម្រាកព្យាបាលនៅមន្ទីរពេទ្យខេត្តស្វាយរៀង សាកសពត្រូវបានប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណី៕ ដោយ ៖ វ៉ៃកូ