ភ្នំពេញ ៖ សេចក្តីព្រាងច្បាប់ចំនួន៣ មានសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងរវាងព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋប្រជាមានិតបង់ក្លាដេស ស្តីពីការជំរុញ និងការការពារទៅវិញទៅមកនៃវិនិយោគ សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងរវាងព្រះរាជាណាចក្រកម្ពុជា និងសហភាពអារ៉ាប់អេមីរ៉េត ស្តីពីការជំរុញ និងការការពារទៅវិញទៅមកនៃវិនិយោគ និងសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងរវាងព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋតួកគី ស្តីពីការជំរុញ និងការការពារទៅវិញទៅមកនៃវិនិយោគ ត្រូវបានលើកយកមកពិនិត្យសិក្សា រវាងគណៈកម្មការជំនាញរដ្ឋសភា និងតំណាងរាជរដ្ឋាភិបាល នៅព្រឹកថ្ងៃទី២៧ ខែឧសភា ឆ្នាំ២០១៩ នៅវិមានរដ្ឋសភា។
សមាសភាពចូលរួមពិនិត្យសិក្សាសេចក្តីព្រាងច្បាប់ទាំបីខាងលើនេះ ភាគីគណៈកម្មការជំនាញរដ្ឋសភា មាន គណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក ដឹកនាំដោយ ឯកឧត្តម ជា វ៉ាន់ដេត ប្រធានគណៈកម្មការ សហការជាមួយគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន ដឹកនាំដោយ លោកឈាង វុន ប្រធានគណៈកម្មការ។ ចំណែកតំណាងរាជរដ្ឋាភិបាលមាន លោកជិន ប៊ុនស៊ាន ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានក្រុមប្រឹក្សាអភិវឌ្ឍន៍កម្ពុជា។ លោកសុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា(CDC)។
តំណាងរាជរដ្ឋាភិបាល បានជម្រាបរដ្ឋសភាថា សេចក្តីព្រាងខាងលើ មានគោលបំណងជំរុញកិច្ចសហប្រតិបត្តិការសេដ្ឋកិច្ច រវាងប្រទេសកម្ពុជា និងប្រទេសជាមិត្ត អោយកាន់តែទូលំទូលាយឡើង ព្រមទាំង ជាយន្តការមួយដើម្បីទាក់ទងទៅនឹងលំហូរទុនវិនិយោគរវាងប្រទេសកម្ពុជា និងអន្តរជាតិ។
សេចក្តីព្រាងទាំងបីនោះ ក៏នឹងផ្តល់នូវការធានាផ្លូវច្បាប់ដល់ការវិនិយោគបរទេស ដែលចូលមកស្នាក់នៅក្នុងប្រទេសកម្ពុជា ហើយអ្នកវិនិយោគកម្ពុជា ដែលចេញទៅរកស៊ីនៅក្នុងប្រទេសដៃគូ ដោយឈរ លើមូលដ្ឋានស្មើភាព និងផ្តល់ផលប្រយោជន៍ឱ្យគ្នាទៅវិញទៅមក។
តំណាងរាជរដ្ឋាភិបាល បានពន្យល់ដល់គណៈកម្មការជំនាញរដ្ឋសភាបន្ថែមថា ភាគីជាប់កិច្ចសន្យាជាម្ចាស់ផ្ទះក៏មានភារកិច្ចផ្តល់នូវប្រព្រឹត្តិកម្មត្រឹមត្រូវ ស្មើភាព ដើម្បីអ្នកវិនិយោគដែលកំពុងវិនិយោគលើទឹកដីរបស់ខ្លួនទទួលបាននូវការការពារ និងសន្តិសុខពេញលេញ ព្រមទាំងមិនធ្វើឲ្យខូចប្រយោជន៍ ដល់ការគ្រប់គ្រង ការថែរក្សា ការប្រើប្រាស់ ការទទួលផល និងការចាត់ចែងការវិនិយោគដោយវិធានការមិនសមហេតុផល ឬរើសអើងពីភាគីណាមួយឡើយ។
ក្រោយពីបានស្ដាប់ការពន្យល់របស់តំណាងរាជរដ្ឋាភិបាលរួចហើយ លោក ជា វ៉ាន់ដេត ក៏ដូចជា លោកឈាង វុន បានឯកភាពទាំងស្រុងលើខ្លឹមសារសេចក្តីព្រាងច្បាប់ទាំងបីខាងលើ និងបានកោតសរសើរចំពោះរាជរដ្ឋាភិបាល ដែលបានតាក់តែងសេចក្តីព្រាងច្បាប់ទាំងបីនេះឡើង ក៏ដូចជាបានខិតខំ បង្កើនកិច្ចសហប្រតិបត្តិការជាមួយប្រទេសជាមិត្ត ដើម្បីចុះកិច្ចព្រមព្រៀងនានា ក្នុងការជំរុញ និងទាក់ទាញអ្នកវិនិយោគបរទេស ចូលមកកម្ពុជាអោយកាន់ច្រើន។
គណៈកម្មការជំនាញរបស់រដ្ឋសភា បានបញ្ជាក់ថា នឹងបញ្ជូនសេចក្ដីព្រាងច្បាប់ទាំងបីខាងលើ ទៅគណៈកម្មាធិការអចិន្ត្រៃយ៍រដ្ឋសភា ដើម្បីសម្រេចដាក់បញ្ចូលក្នុងរបៀបវារៈសម័យប្រជុំពេញអង្គរដ្ឋសភាធ្វើការពិភាក្សា និងអនុម័តនាពេលខាងមុខ៕ ដោយ៖កូឡាប
