ខេត្តព្រះសីហនុ ៖ សមត្ថកិច្ចនគរបាលស្រុកស្ទឹងហាវ ខេត្តព្រះសីហនុ បានឲ្យដឹងព័ត៌មានបឋមមកថា មានគ្រោះថ្នាក់ចរាចរណ៍មួយករណីទៀត រវាងរថយន្តធំ និងរថយន្តលុចសុីស RX300 បានបុកគ្នា នៅលើវិថីសម្តេច ហ៊ុន សែន កែវផុស ស្ថិតក្នុងស្រុកស្ទឹងហាវ នៅម៉ោងជាង ១២ថ្ងៃទី២៧ ខែឧសភា ឆ្នាំ២០១៩នេះ ។
មន្ត្រីនគរបាលបន្តថា រថយន្តដែលបានបុកគ្នាខាងលើនេះ គឺរថយន្តធំមាន ម៉ាក HINO ពណ៌ បៃតង ផ្លាកលេខតាកែវ 3A-1109 និងរថយន្តមួយគ្រឿងទៀត ម៉ាក LEXUS RX300 ផ្លាកលេខភ្នំពេញ 2W-6115 ជិះគ្នាចំនួន៣នាក់ ។
គ្រោះថ្នាក់ចរាចរណ៍នេះ បានបណ្តាលឲ្យមនុស្សចំនួន ២នាក់ស្លាប់ និងម្នាក់ទៀតរងរបួសធ្ងន់ធ្ងរ ត្រូវបញ្ជូនទៅសង្គ្រោះបន្ទាន់នៅមន្ទីរពេទ្យ។ សមត្ថកិច្ចបញ្ជាក់ថា ជនរងគ្រោះទាំងបីនាក់ បានជិះនៅលើរថយន្តតូច។
សមត្ថកិច្ចឲ្យដឹងថា ចំពោះអ្នកបើកបររថយន្តធុនធំ សមត្ថកិច្ច ឲ្យដឹងថា បានរត់គេចខ្លួនក្រោយកើតហេតុភ្លាមៗ ហើយសមត្ថកិច្ចក៏មិនទាន់ស្គាល់អត្តសញ្ញាណនៅឡើយដែរ។
ដោយឡែក ជនរងគ្រោះទាំងបីនាក់ សមត្ថកិច្ច ក៏ពុំទាន់ស្គាល់អត្តសញ្ញាណដែរ។ ហើយថា ករណីនេះ សមត្ថកិច្ចនគរបាល ស្រុកស្ទឹងហាវ កំពុងស្រាវជ្រាវ ដើម្បីឈានទៅបន្តនិតិវិធីដោះស្រាយតាមផ្លូវច្បាប់ជាបន្តទៀត៕ ដែន សីមា
