ខេត្តស្វាយរៀង ៖ បុរសជនជាតិវៀតណាមម្នាក់ត្រូវបានប្រជាពលរដ្ឋប្រទះឃើញដេកស្លាប់កាលពីវេលាម៉ោង១៦និង១០នាទី ថ្ងៃទី២៦ខែឧសភា ឆ្នាំ២០១៩។
សមត្ថកិច្ចបានអោយដឹងថា ៖ ដោយសារមានប្រជាពលរដ្ឋឈ្មោះសំ សាភុចភេទប្រុសអាយុ៤៨ឆ្នាំរស់នៅភូមិបាត់ថង់ ឃុំគគីរសោម ស្រុកស្វាយទាប ខេត្តស្វាយរៀងបានរាយការណ៍ថា ៖ មានមនុស្សដេកស្លាប់និងមានម៉ូតូលេខវៀតណាម១គ្រឿងផង នៅចំណុចជិតភូមិចាស់ ក្នុងឃុំខាងលើ ។
ប្រភពខាងលើបានបន្តអោយដឹងទៀតថា៖ក្រោយពីទទួលព័ត៍មានភ្លាមកម្លាំងជំនាញនៃអធិការដ្ឋាននគរបាលស្រុកស្វាយទាប បានចុះដល់កន្លែងកើតហេតុខាងលើនិងបានសហការជាមួយកម្លាំងជំនាញការិយាល័យនគរបាលព្រហ្មទណ្ឌកម្រិតធ្ងន់ និងកម្លាំងជំនាញបច្ចេកទេស ព្រមទាំងជាមួយគ្រូពេទ្យបង្អែកស្រុកស្វាយទាប ដោយការសម្របសម្រួលពីលោក គង់ ច័ន្ទខេមរិទ្ធ ព្រះរាជអាជ្ញាអមសាលាដំបូងខេត្ត បាន ចុះពិនិត្យសាកសពដល់កន្លែងកើតហេតុនៅវេលាម៉ោង ៦ ល្ងាច។
ប្រភពដដែលបានបន្តទៀតថាៈលទ្ធផលនៃការពិនិត្យសាកសព ឃើញថា សាកសព មានឈ្មោះគូ វ៉ាន់ប៊ឿក ភេទប្រុស អាយុ៥៣ឆ្នាំ ជនជាតិវៀតណាម មានទីលំនៅភូមិភឿកតី ឃុំឡុងភឿក ស្រុកបែនកូវ ខេត្តតៃនិញ ដែលមករកស៊ីទាក់សត្វ។ នៅលេីខ្លួនប្រាណសាកសពពុំមានស្លាកស្នាមអ្វីនោះទេ។
តាមការបំភ្លឺរបស់ក្រុមគ្រួសារសាកសពបញ្ជាក់ថា សាកសពរូបនេះ ធ្លាប់មានជម្ងឺលេីសឈាម និងជម្ងឺបេះដូងជាយូរឆ្នាំមកហើយ។
ឆ្លងតាមការពិនិត្យកន្លែងកើតហេតុ និងសាកសព ព្រមទាំងសមត្ថកិច្ចជំនាញខេត្ត និងលោកវេជ្ជបណ្ឌិត ចាន់ សំណាង ប្រធានផ្នែកជម្ងឺកុមារ នៃមន្ទីរពេទ្យបង្អែកស្រុកស្វាយទាប សន្និដ្ឋានថា: សាកសពឈ្មោះ គូ វ៉ាន់ប៊ឿក ស្លាប់ដោយសារជម្ងឺគាំងបេះដូង។
ក្រោយពីសមត្ថកិច្ចធ្វើការពិនិត្យចប់សព្វគ្រប់ សាកសព ត្រូវបានប្រគល់សាកសពអោយទៅឈ្មោះ គូ ធីប៊ី ភេទស្រី អាយុ២៩ឆ្នាំ និងឈ្មោះ ជាវ ហ៊ួធឿ ភេទប្រុស អាយុ៣៩ឆ្នាំ ជនជាតិវៀតណាម មានទីលំនៅភូមិហ្គ័រណូយឃុំឌិនឌៀង ស្រុកចូវថាញ់ ខេត្តតៃនិញ ត្រូវជាកូនរបស់សពយកទៅធ្វើបុណ្យតាមប្រពៃណី៕ ដោយ ៖ វ៉ៃកូ
