(ភ្នំពេញ) ៖ សម្តេចពញាចក្រី ហេង សំរិន ប្រធានរដ្ឋសភា នឹងដឹកនាំគណៈប្រតិភូជាន់ខ្ពស់រដ្ឋសភា អញ្ជើញបំពេញទស្សនកិច្ចជាផ្លូវការ និងមិត្តភាព នៅប្រទេសវៀតណាម និងឡាវ រយៈពេល៣ថ្ងៃ ចាប់ពីថ្ងៃទី៣០ ខែឧសភា ដល់ ថ្ងៃទី១ ខែមិថុនា ឆ្នាំ២០១៩ ។
បើយោងតាមសេចក្តីជូនដំណឹងស្តីអំពីគណៈប្រតិភូជាន់ខ្ពស់រដ្ឋសភា នៃព្រះរាជាណាចក្រកម្ពុជា អញ្ជើញទៅបំពេញទស្សនកិច្ចជាផ្លូវការ និងមិត្តភាព នៅសាធារណរដ្ឋសង្គមនិយមវៀតណាម និងសាធារណរដ្ឋប្រជាធិបតេយ្យប្រជាមានិតឡាវ ការបំពេញទស្សនកិច្ចរបស់សម្តេច ហេង សំរិន នេះធ្វើឡើងតាមការអញ្ជើញ របស់ប្រធានរដ្ឋសភានៃប្រទេសទាំង២។ ក្នុងដំណើរទស្សនកិច្ចនោះ សម្តេចប្រធានរដ្ឋសភាកម្ពុជា នឹងជួបពិភាក្សាការងារទ្វេភាគី និងសម្តែងការគួរសម ជាមួយថ្នាក់ដឹកនាំសំខាន់ នៃប្រទេសទាំង២ ៕ ដោយ៖កូឡាប