បុរសជនជាតិជប៉ុនម្នាក់បានស្លាប់នៅលើយន្តហោះ ដែលធ្វើដំណើរចេញពីទីក្រុងម៉ិចស៊ីកូ ក្រោយពេលគាត់បានលេបថ្នាំកូកាអ៊ីនអស់ចំនួន ២៤៦កញ្ចប់។
ការហោះហើរដែលមានគោលដៅទៅកាន់ព្រលាន Narita របស់ជប៉ុនត្រូវបានធ្វើការចុះចតភ្លាមៗ នៅក្នុងរដ្ឋ Sonara របស់ប្រទេសម៉ិចស៊ីកូ ក្រោយពេលបុរសជប៉ុនរូបនោះចាប់ផ្តើមមានអាការៈប្រកាច់។
អាជ្ញាធរម៉ិចស៊ីកូបាននិយាយថា បុរសរូបនោះមានឈ្មោះថា Udo N។ គាត់បានស្លាប់ដោយសារការហើមខួរក្បាល ដែលបង្កឡើងដោយសារការប្រើប្រាស់ថ្នាំលើសកម្រិត។
បើតាមសេចក្តីប្រកាសរបស់អគ្គមេធាវីនៃរដ្ឋ Sonora បានបញ្ជាក់ថា កញ្ចប់ថ្នាំដែលមានប្រវែង ២,៥សង់ទីម៉ែត្រ និងទទឹង ១សង់ទីម៉ែត្រ ត្រូវបានរកឃើញក្នុងពោះរបស់ជនរងគ្រោះក្នុងពេលធ្វើកោសលវិច្ឆ័យ។
ក្រោយពេលមានហេតុការណ៍អ្នកដំណើរស្លាប់ អ្នកដំណើរដែលនៅសល់ចំនួន ១៩៨នាក់ទៀត បានបន្តដំណើររបស់ពួកគេទៅទៀត ក្រោយពេលជើងហោះហើរបានចុះចតនៅទីក្រុង Hermosilo។
អាជ្ញាធរម៉ិចស៊ីកូនឹងធ្វើការស៊ើបអង្កេតលើករណីនោះ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
