មនុស្សចំនួន ២នាក់បានស្លាប់ និងយ៉ាងតិចណាស់ ១៦នាក់រងរបួស បន្ទាប់ពីមានហេតុការណ៍វាយប្រហារដោយកាំបិតទៅលើពួកគេ ស្ថិតក្នុងទីក្រុង Kawasaki ប្រទេសជប៉ុន នៅថ្ងៃអង្គារនេះ។ នេះបើតាមការចុះផ្សាយរបស់ BBC។
ក្នុងចំណោមជនរងគ្រោះ មានសិស្សសាលាជាច្រើននាក់ផងដែរ។ ពួកគេទទួលរងការវាយប្រហារដោយបុរសមានកាំបិតម្នាក់ ខណៈពេលកំពុងរងចាំឡានក្រុង។
ជនសង្ស័យត្រូវបានគេរាយការណ៍ថា បានចាក់ករបស់ខ្លួនឯង ហើយក្រោយមកត្រូវបានឃុំខ្លួន។ ជនសង្ស័យបានស្លាប់ដោយសារតែរបួស។
មូលហេតុនៃការវាយប្រហារនេះមិនទាន់ត្រូវបានគេដឹងច្បាស់នៅឡើយទេ។
ប៉ូលីសជប៉ុនដែលអន្តរាគមន៍បានរកឃើញកាំបិតចំនួន ២នៅកន្លែងកើតហេតុ។
បើតាមសេចក្តីរាយការណ៍បានឲ្យដឹងថា បុរសសង្ស័យបានចាប់ផ្តើមធ្វើការវាយប្រហារលើជនរងគ្រោះនៅក្បែរចំណតឡានក្រុង ដែលស្ថិតនៅមិនឆ្ងាយប៉ុន្មានពីស្ថានីយ៍រថភ្លើងនោះទេ។
សូមបញ្ជាក់ថា ជប៉ុនគឺជាប្រទេសមួយដែលមានអត្រាឧក្រិដ្ឋកម្មទាបបំផុតនៅក្នុងពិភពលោក ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ ប្រទេសមួយនេះបានជួបរឿងវាយប្រហារដោយកាំបិតជាច្រើនករណី។
កាលពីឆ្នាំ ២០១៦ មានមនុស្សចំនួន ១៩នាក់ នៅមជ្ឍមណ្ឌលមើលថែអ្នកវិកលចរឹត ត្រូវបានចាក់ដោយអតីតអ្នកបំរើការងារនៅទីនោះ។ ជនសង្ស័យបាននិយាយថា គាត់ចង់ឲ្យអ្នកពិការទាំងនោះសាបសូន្យ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC