អ្នកទោសចំនួន ៤០នាក់ ត្រូវបានគេប្រទះឃើញស្លាប់ដោយការរឹតកនៅក្នុងគុកចំនួន ៤ កន្លែង ក្នុងប្រទេសប្រេស៊ីល។ នេះបើតាមការបញ្ជាក់របស់អាជ្ញាធរប្រេស៊ីលនៅថ្ងៃច័ន្ទម្សិលមិញ។
ការស្លាប់អ្នកគុកចំនួនយ៉ាងច្រើនបែបនេះ កើតឡើងតែមួយថ្ងៃប៉ុណ្ណោះក្រោយពេលមានកុប្បកម្មក្នុងគុក បណ្តាលឲ្យអ្នកទោស ១៥នាក់ស្លាប់។
អ្នកស្លាប់ភាគច្រើនត្រូវបានគេរកឃើញនៅក្នុងគុក ស្ថិតនៅក្បែរទីក្រុង Manaus ក្នុងរដ្ឋ Amazonas។
ភ្នាក់ងារគុកនៃរដ្ឋ Amazonas បាននិយាយថា អ្នកទោសដែលស្លាប់ គឺមានបង្ហាញសញ្ញាថប់ខ្យល់។
សូមបញ្ជាក់ថា ការប៉ះទង្គិចគ្នានៅក្នុងគុក តែងកើតមានជាញឹកញាប់នៅក្នុងប្រទេសប្រេស៊ីល។ កាលពីខែ មករា ឆ្នាំ ២០១៧ មានការប៉ះទង្គិចគ្នានៅក្នុងគុក ដែលមានរយៈពេល ២០ម៉ោង បណ្តាលឲ្យអ្នកទោសចំនួន ៥៦នាក់ស្លាប់៕
អត្ថបទប្រែសម្រួលដោយ៖ សុភ័ក្រ
ប្រភព៖ aljazeera