ឧត្តរមានជ័យ ៖ កងរាជអាវុធហត្ថស្រុកត្រពាំងប្រាសាទ បានអះអាងថា ករណីឃាតកម្មប្តីកាប់ប្រពន្ធជាច្រើនកាំបិតស្លាប់ក្នុងថ្លុកឈាម មកពីប្តីជក់គ្រឿងញៀនហើយក៏ពុំមានទំនាស់ដែរ។
ករណីឃាតកម្មបានកើតឡើងកាលពីវេលាម៉ោង១៣និង៣០នាទី ថ្ងៃទី២៧ ខែឧសភា ឆ្នាំ២០១៩ ត្រង់ចំណុចភូមិស្រែក្រសាំង ឃុំ-ស្រុកត្រពាំងប្រាសាទ ខេត្តឧត្តរមានជ័យ ។
សមត្ថកិច្ចបានឲ្យដឹងថា ជនសង្ស័យ ឈ្មោះ អង រ័ត្ន ភេទប្រុស អាយុ២៧ឆ្នាំ មានទីលំនៅ ភូមិដំណាក់ថ្មី ឃុំតាគង់ ស្រុកម៉ាឡៃ ខេត្តបន្ទាយមានជ័យ ចំណែកជនរងគ្រោះឈ្មោះ ម៉ាប់ ស្រីមុំ ភេទស្រី អាយុ២៥ឆ្នាំ ជាប្រពន្ធរបស់ជនសង្ស័យមានទីលំនៅ ភូមិ-ឃុំជាមួយគ្នា មានកូនចំនួន០១នាក់ ឈ្មោះ ម៉ាប់ ង៉ា ភេទប្រុស អាយុ០៤ឆ្នាំ។
ជនសង្ស័យបានប្រើកាំបិតផ្គាក់ដងឈើ កាប់ទៅលើជនរងគ្រោះ ដែលត្រូវជាប្រពន្ធរបស់ខ្លួនត្រូវចំនួន០៤កន្លែង (ត្រូវចំត្រចៀកខាងស្តាំ០១កន្លែង ស្មាខាងស្តាំ០១កន្លែង ក្រោយកញ្ចឹងក០១កន្លែង និងដើមដោះទាំងសងខាង០១កន្លែង) បណ្តាលឲ្យស្លាប់ភ្លាមៗនៅនឹងកន្លែងកើតហេតុ។
សមត្ថកិច្ចបានបន្តថា ក្រោយធ្វើសកម្មភាព ជនសង្ស័យ ត្រូវបានប្រជាពលរដ្ឋក្នុងភូមិព័ទ្ធចាប់ប្រគល់ទៅឲ្យកងរាជអាវុធហត្ថស្រុកត្រពាំងប្រាសាទ។ ចំពោះចំពោះមូលហេតុដែលនាំឲ្យកើតមានការប្រព្រឹត្តិអំពើឃាតកម្មនេះ កងកម្លាំងអាវុធហត្ថស្រុក បានដាក់សង្ស័យថា ជនសង្ស័យបែកថ្នាំ ដោយជនសង្ស័យបានឆ្លើយសារភាពថា ខ្លួនខ្លួនបានជក់គ្រឿងញៀន០២ថ្ងៃកន្លងមកហើយ ព្រោះនៅមុនពេលកើតហេតុ ប្តីប្រពន្ធ មួយគូនេះពុំមានជម្លោះ ឈ្លោះប្រកែកគ្នាអ្វីទាំងអស់។ ជនសង្ស័យ កំពុងកសាងសំណុំរឿងនៅមូលដ្ឋានកងរាជអាវុធហត្ថស្រុកត្រពាំងប្រាសាទ៕ ដោយ៖កូឡាប
