ខេត្តព្រះសីហនុ៖ ទីបញ្ជាការមូលដ្ឋានសមុទ្រ បានរៀបចំពិធីបិទវគ្គហ្វឹកហ្វឺនបណ្តុះបណ្តាលក្បាច់គុនតៃក្វាន់ដូ និងក្បាច់គុនយុទ្ធគុនក្រមខម របស់កងអន្តរាគមន៍ថ្មើរជើងមូលដ្ឋានសមុទ្រ មានទីតាំងនៅសមុទ្ររាម ខេត្តព្រះសីហនុ។
ពិធីនេះបានរៀបចំឡើងកាលពីថ្ងៃចន្ទ ទី២៧ ខែឧសភា ឆ្នាំ២០១៩ ក្រោមអធិបតីភាព លោកឧត្តមនាវីឯក អ៊ុក សីហា មេបញ្ជាការរងកងទ័ពជើងទឹក មេបញ្ជាការមូលដ្ឋានសមុទ្រ និងថ្នាក់ដឹកនាំមួយចំនួនទៀត។
តាមរបាយការណ៍បូកសរុបលទ្ធផលហ្វឹកហ្វឺនបណ្តុះបណ្តាលរបស់ការិយាល័យហ្វឹកហ្វឺនមូលដ្ឋានសមុទ្រ បានឱ្យដឹងថា វគ្គហ្វឹកហ្វឺននេះមានរយៈពេល៩១ថ្ងៃ។ ក្នុងនោះហ្វឹកហ្វឺនជាក់ស្តែងមានរយៈពេល ៦៥ថ្ងៃ និងរៀនក្បាច់គុនតៃក្វាន់ដូ មានរយៈពេល៣០ថ្ងៃ ឬស្មើ២៥០ម៉ោង ព្រមទាំងក្បាច់គុនយុទ្ធក្រមខម មានរយៈពេល៣៣ថ្ងៃ ឬស្មើនឹង ២៣១ម៉ោង។ ចំពោះការប្រឡងត្រួតពិនិត្យមានរយៈពេល០២ថ្ងៃ ឬស្មើនឹង១៤ម៉ោង ហើយមានសិក្ខាកាមសរុបចំនួន ៦០នាក់ និងយោធាចារ្យចំនួន០៥នាក់។
នាឱកាសនោះដែរ លោកឧត្តមនាវីឯក អ៊ុក សីហា មានប្រសាសន៍ថា ក្រៅពីការងារជំនាញ ក្នុងមួយឆ្នាំៗ កងទ័ពជើងទឹកមូលដ្ឋានសមុទ្រ បានបើកវគ្គហ្វឹកហ្វឺនជំនាញកងទ័ពជើងទឹក ទៅតាមផែនការ របស់ក្រសួងការពារជាតិ អគ្គបញ្ជាការដ្ឋាន និងសច្ចាប័ន របស់បញ្ជាការដ្ឋានកងទ័ពជើងទឹក ប្រយោជន៍ដើម្បីបណ្តុះបណ្តាល និងបំប៉ន នូវគ្រប់ជំនាញបច្ចេកទេស រៀនសូត្រវគ្គនយោបាយ អប់រំចិត្តសាស្ត្រ ជំនាញមុជទឹក (ស្គូបា) និងយុទ្ធគុននានាជាដើម។
លោកបន្តថា ជាក់ស្តែង ពេលនេះ កងទ័ពជើងទឹកមូលដ្ឋានសមុទ្រ បានធ្វើពិធីបិទបញ្ចប់វគ្គហ្វឹកហ្វឺនបណ្តុះបណ្តាលក្បាច់គុនតៃក្វាន់ដូ និងក្បាច់គុនយុទ្ធក្រមខម ដើម្បីលើកកំពស់សមត្ថភាពជំនាញ របស់កងទ័ពជើងទឹកកម្ពុជា ឲ្យមានគុណភាព ដើម្បីបំរើដល់កិច្ចការពារបូរណភាពដែនសមុទ្រ កោះ ជ្រោយនៃមាតុភូមិ ការពារនូវសុខសន្តិភាព រួមចំណែកក្នុងកិច្ចការពារនូវសន្តិសុខ សុវត្ថិភាព សណ្តាប់ធ្នាប់សង្គម និងការអភិវឌ្ឍប្រទេសជាតិ ឲ្យបានកាន់តែល្អប្រសើរថែមទៀតនាថ្ងៃខាងមុខ៕ ដែន សីមា
