(បន្ទាយមានជ័យ) ៖ អាវុធហត្ថខេត្តបន្ទាយមានជ័យ បានឃាត់ខ្លួនជនសង្ស័យចំនួន ០១នាក់ ពីបទហិង្សាដោយចេតនា ប្រព្រឹត្តដោយសហព័ទ្ធ គឺក្នុងករណីប្ដីប្រើដំបងវាយប្រពន្ធ ហើយនៅថ្ងៃទី 28 ឧសភានេះត្រូវបានកសាងសំណុំរឿងបញ្ជូនទៅតុលាការ។
ថ្ងៃទី២៧ ខែឧសភា ឆ្នាំ២០១៩ វេលាម៉ោង ១០ និង ០០នាទី នៅចំណុចភូមិប្រជាធម្មលិច សង្កាត់ផ្សារកណ្តាល ក្រុងក្រុងប៉ោយប៉ែត ខេត្តបន្ទាយមានជ័យ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ទោ អ៊ុំ សាខន នាយរងសេនាធិការ ប្រចាំការមូលដ្ឋានកងរាជអាវុធហត្ថក្រុង បានចុះប្រតិបត្តិការបង្ក្រាបករណី ហិង្សាដោយចេតនា ប្រព្រឹត្តដោយសហព័ទ្ធ ដែលប្រព្រឹត្តកាលពីវេលាម៉ោង ១៦ និង ៣០នាទី នៅថ្ងៃទី២៦ ខែឧសភា ឆ្នាំ២០១៩ និងឃាត់ខ្លួនជនសង្ស័យបានចំនួន ០១នាក់ ។ បន្ទាប់ពីធ្វើការឃាត់ខ្លួនកម្លាំងជំនាញបានកសាងសំណុំរឿងបញ្ជូនជនសង្ស័យនិងវត្ថុតាងទៅទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្ត។
លោកវរសេនីយ៍ទោ ព្រហ្ម ថេង ប្រធានមន្ទីរយុត្តិធម៌បានឲ្យដឹងថា ៖ យោងតាមបណ្តឹងរបស់ជនរងគ្រោះឈ្មោះ សាន លាភា ភេទ ស្រី អាយុ ២៨ឆ្នាំ មានទៅលំនៅភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ បានបំភ្លឺឲ្យដឹងថា ៖ ជនសង្ស័យ មានឈ្មោះ ប៉ន ភារម្យ ភេទ ប្រុស អាយុ ៣៣ឆ្នាំ ស្នាក់នៅភូមិ/សង្កាត់កើតហេតុខាងលើ ត្រូវជាប្តីរបស់ខ្លួន(ជនរងគ្រោះ) តែងរករឿងឈ្លោះប្រកែកគ្នា ជេរប្រមាថ និងវាយដំមកលើរាងកាយជាញឹកញាប់ នៅថ្ងៃកើតហេតុ ជនសង្ស័យ(ប្តី) បានមកទទួលខ្លួនចេញពីកន្លែងធ្វើការ ហើយបានឈ្លោះប្រកែកគ្នាតាមផ្លូវ រហូតឈានដល់ប្រើហិង្សា ទះកំភ្លៀង វាយចំផ្ទៃមុខជាច្រើនដៃ និងបានយកបន្ទះឈើ វាយមកលើខ្លួនជាច្រើនទៀតផង ដោយខ្លួនស៊ូទ្រាំលែងបាន ទើបមកដាក់ពាក្យបណ្តឹងតែម្តង ។
លោកវរសេនីយ៍ទោ ព្រហ្ម ថេង បានបញ្ជាក់ទៀតថា ក្រោយពីទទួលបានពាក្យបណ្តឹង និងធ្វើការស្រាវជ្រាវ រហូតកំណត់បានមុខសញ្ញាជនសង្ស័យ កម្លាំងជំនាញបានកោះហៅមកធ្វើការសាកសួរ ។ ក្រោយពីធ្វើការសាកសួរចម្លើយ ជនសង្ស័យបានឆ្លើយសារភាពថា ៖ ខ្លួនពិតជាបានប្រើហិង្សាទៅលើប្រពន្ធពិតប្រាកដមែន ដោយសារខ្លួនមានការសង្ស័យ និងប្រចណ្ឌប្រពន្ធពេក ។ ដោយផ្អែកលើចម្លើយសារភាពរបស់ជនសង្ស័យ និងយោងតាមរបាយការណ៍របស់មូលដ្ឋានកងរាជអាវុធហត្ថក្រុង និងយោងតាមការបំភ្លឺរបស់ជនរងគ្រោះ ឃើញថាមានតម្រុយពិរុទ្ធភាពនៃបទល្មើសយ៉ាងជាក់លាក់ ដូច្នេះជនសង្ស័យខាងលើអាចត្រូវចោទពីបទ ហិង្សាប្រព្រឹត្តដោយសហព័ទ្ធ ។
បច្ចុប្បន្ន កម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ទៅតុលាការដើម្បីចាត់ការទៅតាមនីតិវិធី ៕ ដោយ៖កូឡាប
