វៀតណាម ៖ ក្នុងថ្ងៃទី១នៃដំណើរទស្សនកិច្ចនៅប្រទេសវៀតណាម នៅរសៀលថ្ងៃទី២៨ ខែឧសភា ឆ្នាំ២០១៩ ម្តេចអគ្គមហាពញាចក្រី ហេង សំរិន ប្រធានរដ្ឋសភា បានជួបសវនាការ និងពិភាក្សាការងារជាមួយ លោកជំទាវ ង្វៀន ធីគីមងិន (Nguyen Thi Kim Ngan) ប្រធានរដ្ឋសភាវៀតណាម នៅវិមានរដ្ឋសភាវៀតណាម ដើម្បីពង្រឹងពង្រីកកិច្ចសហប្រតិបត្តិការរវាងរដ្ឋសភាប្រទេសទាំងពីរឲ្យរឹងមាំ និងគ្រប់ជ្រុងជ្រោយទាំងនៅក្នុងក្របខណ្ឌទ្វេភាគី និងពហុភាគី។
សម្តេចអគ្គមហាពញាចក្រី ហេង សំរិន បានជម្រាបប្រធានរដ្ឋសភាវៀតណាមថា រដ្ឋសភាកម្ពុជានៅក្នុងនីតិកាលទី៦បានកំពុងបន្តពង្រឹង និងពង្រីកទំនាក់ទំនងការទូតសភាតាមរយៈសកម្មភាពចូលរួមក្នុងវេទិកាសភាអន្តរជាតិនានា សំដៅរួមចំណែកលើកកម្ពស់ថែរក្សាសន្តិភាព ស្ថិរភាព និងការអភិវឌ្ឍនៅក្នុងក្របខណ្ឌតំបន់ និងសកលលោក។ ជាក់ស្តែងនៅឆ្នាំ២០២០ខាងមុខនេះ សភាកម្ពុជានឹងធ្វើជាម្ចាស់ផ្ទះកិច្ចប្រជុំភាពជាដៃគូសភាអាស៊ី-អឺរ៉ុប លើកទី១១។
សម្តេចបានមានប្រសាសន៍បន្តថា រដ្ឋសភាកម្ពុជាបានពង្រីកបន្ថែមទៀតនូវក្រុមមិត្តភាពសភាកម្ពុជាជាមួយបណ្តាសភាប្រទេសជាមិត្តក្នុងតំបន់ និងសកលលោក តាមការស្នើសុំពីសភាប្រទេសជាមិត្តភាព និងភាពចាំបាច់របស់រដ្ឋសភាកម្ពុជាខ្លួនឯង។ រដ្ឋសភាកម្ពុជាបានបង្កើតក្រុមសភាជាតិកម្ពុជា នៃអ្នកនយោបាយសភាស្ដ្រី តាំងពីឆ្នាំ២០១៥ សម្រាប់ជាសេនាធិការរបស់រដ្ឋសភា ក្នុងគោលដៅអនុវត្ដគោលនយោបាយលើកកម្ពស់សមភាពយេឌ័រ និងផ្ដល់ភាពអង់អាចដល់ស្ដ្រី ចូលរួមក្នុងវិស័យនយោបាយ និងសកម្មភាពសង្គមគ្រប់កម្រិត។
ចំពោះទំនាក់ទំនងរវាងរដ្ឋសភាកម្ពុជា និងវៀតណាម សម្តេចប្រធានរដ្ឋសភា បានគូសបញ្ជាក់ថា រដ្ឋសភានៃប្រទេសទាំងពីរ បានបង្កើនកិច្ចសហប្រតិបត្តិការជាមួយគ្នាបានយ៉ាងល្អប្រសើរ ដើម្បីផ្លាស់ប្តូរបទពិសោធន៍លើការងារសភា ទាំងក្នុងកម្រិតថ្នាក់ដឹកនាំ គណៈកម្មការជំនាញ និងមន្ត្រីបច្ចេកទេស នៃអគ្គលេខាធិការដ្ឋានរដ្ឋសភា។ រដ្ឋសភាកម្ពុជាបានគាំទ្រគ្នាទៅវិញទៅមកក្នុងវេទិកាអន្តរសភា។
លោកជំទាវ ង្វៀន ធីគីមងិន បានគាំទ្រប្រសាសន៍លើកឡើងរបស់សម្តេចប្រធានរដ្ឋសភា និងបានប្តេជ្ញាចិត្តថានឹងខិតខំជំរុញទំនាក់ទំនងប្រទេស និងរដ្ឋសភានៃប្រទេសទាំងពីរដែលមានតាំងពីយូរលង់ និងជាប្រពៃណីស្រាប់នេះ ឲ្យកាន់តែរឹងមាំឡើង។ លោកជំទាវ បានគូសបញ្ជាក់ថា ក្នុងការគាំទ្រគ្នាទៅវិញទៅមក ក្នុងផលប្រយោជន៍សកល ក៏ដូចជាផលប្រយោជន៍រវាងប្រទេសទាំងពីរ លោកជំទាវនឹងលៃលកពេលវេលាដើម្បីមកចូលរួមកិច្ចប្រជុំភាពជាដៃគូសភាអាស៊ី-អឺរ៉ុប (ASEP) លើកទី១១ ដែលសភាកម្ពុជាធ្វើជាម្ចាស់ផ្ទះនៅឆ្នាំ២០២០ខាងមុខនោះ។
លោកជំទាវបានជម្រាបសម្តេចប្រធានរដ្ឋសភាដែរថា នៅក្នុងឆ្នាំ២០២០នោះ ប្រទេសវៀតណាមនឹងទទួលធ្វើជាម្ចាស់ផ្ទះកិច្ចប្រជុំកំពូលអាស៊ាន និងកិច្ចប្រជុំអន្តរសភាអាស៊ាន(អាយប៉ា)ផងដែរ។ លោកជំទាវ ង្វៀន ធីគីមងិន បានស្នើសុំរដ្ឋសភាកម្ពុជាគាំទ្រ និងចូលរួមកិច្ចប្រជុំខាងលើនេះដែរ។ នៅក្នុងការពង្រឹងពង្រីកចំណងមិត្តភាព និងកិច្ចសហប្រតិបត្តិការរវាងរដ្ឋសភាប្រទេសទាំងពីរ លោកជំទាវប្រធានរដ្ឋសភា សំណូមពរសម្តេចអគ្គមហាពញាចក្រី ហេង សំរិន ជំរុញការផ្លាស់ប្តូរទស្សនកិច្ចរវាងសមាជិករដ្ឋសភាវ័យក្មេង និងសមាជិករដ្ឋសភាស្ត្រី រួមនិងការផ្លាស់ប្តូរ ចែករំលែកបទពិសោធន៍រវាងគណៈកម្មការជំនាញគ្រប់វិស័យ និងនៅក្នុងកម្រិតអគ្គលេខាធិការដ្ឋានផងដែរ ពិសេសការបន្តជំរុញដល់ដំណើរការរៀបចំសន្និសីទប្រចាំឆ្នាំរវាងគណៈកម្មការសេដ្ឋកិច្ច គណៈកម្មការកិច្ចការបរទេស និងគណៈកម្មការការពារជាតិ រវាងរដ្ឋសភាកម្ពុជា ឡាវ និងវៀតណាម ឲ្យបានទៀងទាត់ដើម្បីគាំទ្រ និងជំរុញដល់ការអភិវឌ្ឍតំបន់ត្រីកោណអភិវឌ្ឍន៍ដែលរដ្ឋាភិបាលកម្ពុជា ឡាវ និងវៀតណាមបានបង្កើតឡើងនោះ។
ប្រធានរដ្ឋសភាវៀតណាម បានស្នើសុំភាគីកម្ពុជាជួយសម្រួលដល់ការងារស្វែងរកអដ្ឋិធាតុកងទ័ពស្ម័គ្រចិត្តវៀតណាម នៅក្នុងប្រទេសកម្ពុជាដើម្បីធ្វើមាតុភូមិនិវត្តន៍មកកាន់ប្រទេសវៀតណាមវិញ។
លោកជំទាវ ង្វៀន ធីគីមងិន បានមានជំនឿយ៉ាងមុតមាំថា ក្រោមម្លប់ដ៏ត្រជាក់របស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងក្រោមការដឹកនាំរដ្ឋសភារបស់ សម្តេចអគ្គមហាពញាចក្រី ហេង សំរិន និងការដឹកនាំរាជរដ្ឋាភិបាល របស់សម្តេចអគ្គមហាសេនាបតីតេជោ ហ៊ុន សែន ប្រទេសនិងប្រជាជនកម្ពុជានឹងទទួលបានសមិទ្ធផលថ្មីៗបន្តបន្ទាប់ទៀត។
សម្តេចអគ្គមហាពញាចក្រី ហេង សំរិន បានអបអរសាទរ និងវាយតំលៃខ្ពស់ ចំពោះសមិទ្ធផលដ៏ធំធេង ដែលរដ្ឋាភិបាល និងប្រជាជនវៀតណាមសម្រេចបាន ក្នុងការកសាងអភិវឌ្ឍន៍សេដ្ឋកិច្ចសង្គមរីកចម្រើន ជឿនលឿនយ៉ាងឆាប់រហ័ស ស្របតាមទិសដៅ នៃមហាសន្និបាតលើកទី១២ របស់បក្សកុំម្មុយនីស្តវៀតណាម។ សម្តេចបានអរគុណដល់ការគាំទ្ររបស់ប្រទេសវៀតណាមចំពោះកម្ពុជា ពិសេសរដ្ឋសភាកម្ពុជា រាប់តាំងពីការជួយបណ្តុះបណ្តាលធនធានមនុស្ស និងជំនួយអគាររដ្ឋបាលក្នុងទឹកប្រាក់ ២៥លានដុល្លារដែលនឹងលេចជារូបរាងនៅពេលខាងមុខនេះ។
បន្ទាប់មកសម្តេចអគ្គមហាពញាចក្រី ហេង សំរិន និងលោកជំទាវ ង្វៀន ធីគីមងិន បានចុះហត្ថលេខាលើឯកសារអនុស្សរណៈយោគយល់គ្នារវាងរដ្ឋសភាប្រទេសទាំងពីរ និងបានអញ្ជើញជាអធិបតីភាពក្នុងពិធីចុះហត្ថលេខាលើអនុស្សរណៈយោគយល់គ្នា ស្តីពីកិច្ចសហប្រតិបត្តិការរវាងអគ្គលេខាធិការដ្ឋានរដ្ឋសភាកម្ពុជា និងវៀតណាម ដែលចុះហត្ថលេខាដោយ ឯកឧត្តម ឡេង ប៉េងឡុង អគ្គលេខាធិការរដ្ឋសភាកម្ពុជា និង ឯកឧត្តម ង្វៀន ហាញ់ហ្វុក ប្រធានខុទ្ទកាល័យរដ្ឋសភាវៀតណាមផងដែរ៕ ដោយ ៖ កូឡាប
