ភ្នំពេញ ៖ បន្ទាប់ពីភ្ញាក់ផ្អើល ជម្លោះរវាងអ្នកសារព័ត៌មាន ពួកក្រុមជាមួយមេគយប៉ុស្តិ៍ព្រែកចាក នៅកំពត លោកស្រីហ៊ុន ស៊ីណាត បានបញ្ចេញប្រតិកម្មភ្លាមៗ ដោយបានបញ្ជាក់ថា អ្នកកាសែតពពាក់ ពពូន មិនដឹងថាគាត់ក្រុមណាខ្លះទេណ៎សំឡេងជេរខ្លាំងម្ល៉េះក្មួយៗព្រះជាម្ចាស់អើយមិនចេះខ្មាសគេសោះ។
លោកស្រីហ៊ុន ស៊ីណាត ដែលជាប្អូនស្រីសម្តេចតេជោហ៊ុនសែន កាលពីថ្ងៃទី២៨ឧសភា បានសរសេរលើហ្វេសប៊ុកថា “ព្រះជាម្ចាស់អើយមិនចេះខ្មាសគេសោះខ្ញុំមិនកាន់ជើងគយទេ តែខ្លួនជាអ្នកកាសែតទៅចូលកន្លែងគេអញ្ចឹងគេត្រូវដកទូរស័ព្ទអញ្ចឹងហើយ ។ ខ្ញុំមើលឃើញមួយរយៈនេះឃើញអ្នកកាសែតពពាក់ពពូន មិនដឹងថាគាត់ក្រុមណាខ្លះទេណ៎សំឡេងអ្នកកាសែតនោះទៀតជេរខ្លាំងម្ល៉េះក្មួយៗអើយ “។
សូមបញ្ជាក់ថា នៅថ្ងៃទី២៨ ខែឧសភា ឆ្នាំ២០១៩ ជម្លោះរវាងអ្នកសារព័ត៌មាន ពួកក្រុមមេគយប៉ុស្តិ៍ព្រែកចាក ឈានដល់សភាពតឹងសរសៃកដាក់គ្នា ដោយអ្នកសារព័ត៌មានបញ្ជាក់ចំៗថា លោក យី ថុល ជាមន្ត្រីគយប្រចាំខេត្តកំពត បានប្រើអំណាចរបស់ខ្លួនឆក់យកទូរស័ព្ទដៃអ្នកកាសែត កំពុងថតយកសកម្មភាពនៅទីនេះ បង្កឲ្យមានការខឹងសម្បាយ៉ាងខ្លាំង អ្នកសារព័ត៌មានបន្តទៀត លោកមេគយបើកដៃឲ្យឈ្មួញដឹកទំនិញចេញដោយមិនបានត្រួតពិនិត្យត្រឹមត្រូវ ពោលគឺយកតែលុយ ប្រព្រឹត្តអំពើពុករលួយ ។
ចំណែកលោកហ៊ុយ វណ្ណៈ រដ្ឋលេខាធិការក្រសួងមហាផ្ទៃ ក៏បានសរសេរហ្វេសប៊ុកថា អ្នកកាសែត និង ក្រមសីលធម៌ពេលចុះយកព័ត៌មាន៖ ១- តើការផ្សាយ Live អំពីបុគ្គលណាម្នាក់ដោយគ្មានការព្រមព្រៀង ឬការអនុញ្ញាត តើ«ខុស»? ចម្លើយ៖ ពិតជា ខុស! គឺខុសនឹងគោលការណ៍ Off Record ដែលជាគោលការណ៍សុំមិនឲ្យបញ្ចេញអត្តសញ្ញាណ។ កុំថាឡើយ បុគ្គលអសាធារណ: សូម្បីតែអ្នកកាសែតសម្ភាសន៍ជាមួយអ្នកនាំពាក្យ ដែលជាមន្ត្រីសាធារណៈក៏ដោយ បើអ្នកនាំពាក្យរូបនោះ សុំ Off Record គឺអ្នកកាសែតត្រូវតែគោរពសំណូមពរ និងគោលការណ៍នេះ។ ចុះបើកាសែតនៅតែបំពាន? បើបំពាន គឺខុស ហើយករណីខ្លះឈានដល់បទល្មើសជាក់ស្តែង គឺភាគីអាចប្តឹងប៉ូលីសឲ្យ វ៉ៃខ្នោះ ឃាត់ខ្លួន រួចចាំដោះស្រាយជាក្រោយ។ អ្នកកាសែត ដែលទទួលបានការបណ្តុះបណ្តាល គឺសុទ្ធតែបានយល់អំពីគោលការណ៍ Off Record និង On Record។ ២- ចុះបើនរណាម្នាក់ ដកហូតសម្ភារៈរបស់អ្នកកាសែត នៅក្នុងពេលបំពេញការងារ តើ «ខុស»? ចម្លើយ៖ ពិតជា ខុស! គឺខុសនឹងសិទ្ធិទទួលបានព័ត៌មាន។ បើទោះត្រូវការដកហូតសម្ភារៈដែលយល់ថា ជាមធ្យោបាយជម្រិតយកព័ត៌មាន ឬជាការលួចថតដោយគ្មានការព្រមព្រៀង គឺគេមិនត្រូវធ្វើដោយខ្លួនឯងទេ ប៉ុន្តែត្រូវប្តឹងបន្ទាន់ទៅប៉ូលីសឲ្យឃាត់ និងដកហូតសម្ភារៈនោះមកត្រួតពិនិត្យ។ សួរថា ទង្វើនេះជាការបំពានអ្នកកាសែត? ចម្លើយ៖ អ្នកដទៃក្រៅពីអ្នកកាសែត ក៏ជាមនុស្ស ហើយមានសិទ្ធិតាមផ្លូវច្បាប់ ក្នុងការការពារតម្លៃរបស់ខ្លួន ដែលមិនអាចត្រូវគេបរិហារ ឬត្រូវគេប្រមាថ ដោយគ្មានមូលដ្ឋាន ឬមិនទុកឱកាសឲ្យការពារខ្លួននោះទេ។ យើងត្រូវថ្លឹងថ្លែងទាំងសិទ្ធិមនុស្ស និងតម្លៃនៃវិជ្ជាជីវៈ។ សូម្បីគ្រូពេទ្យ ក៏មិនអាចថតបង្ហោះរូបភាពវះកាត់ ហើយប៉ូលីស ក៏មិនត្រូវស្រាតខោជនសង្ស័យ ហើយថតបង្ហោះនោះទេ។ តម្លៃមនុស្សគឺការពារដោយសីលធម៌ សុច្ចរិតភាពមុនគេ ៕ ដោយ៖កូឡាប