ភ្នំពេញ ៖ ចៅក្រមស៊ើបសួរ សាលាដំបូងរាជធានីភ្នំពេញ លោកស្រី ស៊ លីនណា នៅថ្ងៃទី២៨ ខែឧសភា ឆ្នាំ២០១៩នេះ បានចេញដីកាសម្រេចឃុំខ្លួន ម្តាយ និងកូនស្រីបង្កើត ដែលបានរួមគ្នា ប្រើកាំបិត កាប់ចាក់សម្លាប់ប្ដី ដោយសារជម្លោះពាក្យសម្ដីរឿងលុយ១ម៉ឺនរៀល ដាក់ពន្ធនាគារបណ្ដោះអាសន្ន ក្រោមការចោទប្រកាន់ពីបទឃាតកម្ម។
មន្ត្រីតុលាការបញ្ជាក់ថា ម្តាយ និងកូនទាំង២នាក់នេះ ត្រូវបានចោទប្រកាន់ពីបទឃាតកម្ម តាមមាត្រា ១៩៩ នៃក្រមព្រហ្មទណ្ឌ ហើយបើសិនជាតុលាការរកឃើញទោសកំហុសដូចការចោទនោះមែន ជនជាប់ចោទ អាចប្រឈមមុខការជាប់ពន្ធនាគារ ពីពី១០ ទៅ១៥ឆ្នាំ។
ហេតុការណ៍ឃាតកម្មនេះ កើតឡើងកាលពីវេលាម៉ោង៨យប់ ថ្ងៃទី២៤ ខែឧសភា ឆ្នាំ២០១៩ នៅចំណុចបន្ទប់ជួល ក្នុងភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ។ ជនសង្ស័យ២នាក់រួមមាន ឈ្មោះ គង់ ធីតា ភេទស្រី អាយុ៤៩ឆ្នាំ ជាម្ដាយ និងកូនស្រី ឈ្មោះ ង៉ូយ សុម៉ារី អាយុ២០ឆ្នាំ។ ចំណែកជនរងគ្រោះ ឈ្មោះ គឹម យ៉ត ភេទប្រុស អាយុ២៩ឆ្នាំ មុខរបរបុគ្គលិកក្រុមហ៊ុនឯកជន។
មុនពេលកើតហេតុ ជនសង្ស័យឈ្មោះ ង៉ូយ សុម៉ារី និងជនរងគ្រោះ បានរៀបការជាមួយគ្នា នៅថ្ងៃទី២៦ ខែមករា ឆ្នាំ២០១៩ ជនសង្ស័យឈ្មោះ ង៉ូយ សុម៉ារី បាននិយាយជាមួយជនរងគ្រោះ ទៅចុះសំបុត្រអាពាហ៍ពិពាហ៍នឹងគ្នា ប៉ុន្តែភាគីខាងប្ដីមិនព្រម ដោយយកលេសថាចាំ២ឆ្នាំក្រោយសិន។ នៅថ្ងៃទី២៣ ខែឧសភា ឆ្នាំ២០១៩ ពេលល្ងាចជនសង្ស័យ ឈ្មោះ ង៉ូយ សុម៉ារី បានទៅយកម្តាយរបស់ខ្លួន ឈ្មោះគង់ ធីតា ស្នាក់នៅសង្កាត់ទន្លេបាសាក់ ខណ្ឌដូនពេញ មកស្នាក់នៅជាមួយខ្លួន ដើម្បីជួយមើលជនរងគ្រោះ មានអាការៈមិនសូវស្រួលខ្លួន រហូតដល់ថ្ងៃទី២៤ ខែឧសភា ឆ្នាំ២០១៩ ជនសង្ស័យឈ្មោះ ង៉ូយ សុម៉ារី បានសុំលុយជនរងគ្រោះ ១ម៉ឺនរៀល ហើយជនរងគ្រោះមិនព្រមឲ្យ ក៏មានជម្លោះជាមួយគ្នាតែម្តង។
បន្ទាប់មកជនរងគ្រោះ បានយកដៃទៅច្របាច់កជនសង្ស័យ ឈ្មោះ ង៉ូយ សុម៉ារី ហើយជនសង្ស័យ ង៉ូយ សុម៉ារី បានស្រែកឲ្យម្តាយជួយ ហើយជនសង្ស័យ ឈ្មោះ គង់ ធីតា បានកាន់កាំបិតបុ័ងតោមកកាប់ជនរងគ្រោះចំកញ្ចឹងក បណ្តាលឲ្យស្លាប់ ហើយជនសង្ស័យ ឈ្មោះ ង៉ូយ សុម៉ារី បានយកខ្សែភ្លើង ស្កុតចងរុំដៃជើងជនរងគ្រោះ រួចយកកូនកាំបិតចុងស្រួច ចាក់ជនរងគ្រោះ បណ្តាលឲ្យស្លាប់នៅនឹងកន្លែងតែម្តង។
រហូតដល់វេលាម៉ោង២១និង០០នាទីយប់ ជនសង្ស័យទាំង២នាក់ បានចូលខ្លួនមកសារភាព នៅប៉ុស្តិ៍នគរបាលរដ្ឋបាលទឹកថ្លា រួចសមត្ថកិច្ចបានធ្វើការឃាត់ខ្លួនទាំង២នាក់តែម្តង៕ ដោយ ៖ កូឡាប
