រដ្ឋាភិបាលចិនបានធ្វើការរិះគន់យ៉ាងខ្លាំងលើអាមេរិចដោយសារតែធ្វើការទំនាក់ទំនងជាមួយនឹងតៃវ៉ាន់ និងបានបញ្ជាឲ្យរដ្ឋបាលរបស់លោក ដូណាល់ ត្រាំ បញ្ឈប់ទំនាក់ទំនងការទូតជាមួយនឹងកោះតៃវ៉ាន់ ក្រោយមានការធ្វើកិច្ចប្រជុំសារធារណៈរវាងមន្ត្រីជាន់ខ្ពស់អាមេរិច និងតៃវ៉ាន់។
ក្នុងខែឧសភានេះ ទីប្រឹក្សាសន្តិសុខជាតិអាមេរិច លោក John Bolton បានជួបពិភាក្សាជាមួយនឹងមន្ត្រីជាន់ខ្ពស់តៃវ៉ាន់ម្នាក់គឺលោក David Lee ដែលជាអគ្គលេខាធិការក្រុមប្រឹក្សាសន្តិសុខជាតិតៃវ៉ាន់ នៅក្នុងទីក្រុវ៉ាស៊ីនតោន។ ទីភ្នាក់ងារសារពត៌មានតៃវ៉ាន់ CNA បានរាយការណ៍ថា វាគឺជាកិច្ចប្រជុំលើកដំបូង រវាងទីប្រឹក្សាសន្តិសុខនៃរដ្ឋាភិបាលទាំងពីរ ចាប់តាំងពីឆ្នាំ ១៩៧៩មកម្លេះ។
នៅថ្ងៃច័ន្ទដើមសប្តាហ៍នេះ អ្នកនាំពាក្យក្រសួងការបរទេសចិន លោក Lu Kang បានថ្លែងថា “ទីក្រុងប៉េកាំងជំទាស់ដាចខាតទៅនឹងកិច្ចប្រជុំនោះ” និងបានជំរុញអាមេរិចឲ្យឈប់ធ្វើទំនាក់ទំនងផ្លូវការ និងបង្កើនទំនាក់ទំនងជាមួយនឹងតៃវ៉ាន់។
សូមបញ្ជាក់ថា តៃវ៉ាន់ និងចិន បានដាច់ចេញពីគ្នាក្នុងកំឡុងសង្គ្រាមស៊ីវិលក្នុងឆ្នាំ ១៩៤៩។ តៃវ៉ាន់ដែលប្រកាន់របបប្រជាធិបតេយ្យ តែងតែចង់ប្រកាសឯករាជ្យ ប៉ុន្តែត្រូវបានរដ្ឋាភិបាលក្រុងប៉េកាំង ព្រមានប្រើយោធាវាយយក ប្រសិនជាតៃវ៉ាន់ហ៊ានធ្វើបែបនោះ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
