ខេត្តព្រះសីហនុ៖ រដ្ឋបាលខេត្តព្រះសីហនុ បានបើកកិច្វប្រជុំត្រួត ពិនិត្យ ទៅលើការគ្រប់គ្រងផ្សព្វផ្សាយផ្លាកសញ្ញាពាណិជ្ជកម្ម និងទីតាំង ដែលត្រូវតម្លើងបង្គោលវ៉ាណូ នៅរាមទីតាំងនីមួយៗ ក្នុងខេត្តព្រះសីហនុ។
កិច្ចប្រជុំនេះធ្វើឡើងនៅថ្ងៃទី២៩ ខែឧសភា ឆ្នាំ២០១៩ នាសាលប្រជុំសាលាខេត្តព្រះសីហនុ ហើយដឹកនាំដោយ លោក គង់ វិតាណៈ អភិបាលរងខេត្តព្រះសីហនុ ព្រមទាំងមន្ត្រីនៅតាមមន្ទីរជំនាញពាក់ព័ន្ធ នៃរដ្ឋបាលខេត្តនេះបានចូលរួមផង។
នាឱកាសនោះ លោក គង់ វិតាណ: បានឲ្យដឹងថា តាមចរាចរណ៍ជូនដំណឹង របស់ក្រសួងវប្បធម៌ និងវិចិត្រសិល្បៈ គឺរាល់ការសរសេរអក្សរលើផ្ទាំងយីហោ, ផ្ទាំងផ្សាយពាណិជ្ជកម្ម និងផ្ទាំងសញ្ញាផ្សេងៗ ត្រូវគោរពតាមគោលការណ៍ ដោយប្រើអក្សរជាតិជាសំខាន់។ ប៉ុន្តែលោកថា ក្នុងករណីមានអក្សរបរទេស គឺដាច់ខាតត្រូវមានអក្សរ ជាតិ នៅជួរខាងលើនៃអក្សរបរទេសនោះ ហើយទំហំអក្សរជាតិ ក៏ត្រូវសរសេរឲ្យធំជាងអក្សរបរទេសពីរដង..។
លោក គង់ វិតាណៈ ឲ្យដឹងដូច្នេះ រួចសង្កត់ធ្ងន់ថា ចំពោះអក្ខរាវិរុទ្ធ ក៏ត្រូវគោរពតាមក្បួនខ្នាត វេយ្យាករណ៍ និងវចនានុក្រមខ្មែរ របស់សម្ដេចព្រះសង្ឃរាជ ព្រះមហាសុមេធាអិបតីជោតញ្ញាណោ ជួន ណាត ឲ្យបានត្រឹមត្រូវ។
ត្រង់ចំណុចនេះ លោក គង់ វិតាណៈ បញ្ជាក់ថា កន្លងមកនេះ ដោយសារតែមានស្លាកយីហោ និងផ្ទាំងផ្សព្វផ្សាយពាណិជ្ជកម្មមួយចំនួន ដែលមិនបានអនុវត្តតាមការជូនដំណឹង របស់រដ្ឋបាលខេត្តព្រះសីហនុ ទើបត្រូវក្រុមការងារ របស់រដ្ឋបាលខេត្ត បានចុះធ្វើការអប់រំ និងផ្សព្វផ្សាយបន្ត ដល់ម្ចាស់ស្លាកយីហោមួយចំនួន ឲ្យចូលរួមគោរពតាមច្បាប់រដ្ឋធម្មនុញ្ញ នៃព្រះរាជាណាចក្រកម្ពុជាឲ្យបានត្រឹមត្រូវ។
លោកថា ចំពោះស្លាកយីហោទាំងឡាយណា ដែលមិនគោរពតាមការណែនាំ របស់រដ្ឋបាលខេត្តព្រះសីហនុទេ លោក វិតាណៈ អះអាងថា ត្រូវក្រុមការងាររដ្ឋបាលក្រុង-ខេត្តព្រះសីហនុ ចុះរុះរើទម្លាក់ចុះ ប្រយោជន៍ដើម្បីចូលរួមថែរក្សាអភិរក្សអក្សរសាស្ត្រជាតិ ប្រកបដោយអនាម័យ សោភ័ណភាព និងមានបរិស្ថានល្អ ឲ្យសាកសមជាទីក្រុងទេសចរណ៍ដ៏ស៊ីវិល័យ ដែលរដ្ឋាភិបាលឲ្យប្រសិទ្ធនាមថា ជា “តារារះ នាទិសនិរតី”។
លោក គង់ វិតាណៈ អភិបាលរងខេត្តព្រះសីហនុ បញ្ជាក់បន្ថែមថា បញ្ហាខាងលើនេះ គឺក្រុមការងារ នៃរដ្ឋបាលខេត្ត បានចុះណែនាំ និងតម្រូវឲ្យម្ចាស់ស្លាកយីហោ ឲ្យធ្វើការផ្លាស់ប្តូរជើងទម្រ និងស្លាកប៉ាណូ ឬផ្ទាំងផ្ព្ធផ្សាយពាណិជ្ជកម្មចាស់ៗ ដោយតម្រូវឲ្យដូរចេញ នូវស្លាកយីហោ បង្គោលប៉ាន់ណូ របារផ្សាយពាណិជ្ជកម្មកាត់ទទឹងផ្លូវថ្នល់ និងផ្ទាំងរូបភាពផ្សព្វផ្សាយពាណិជ្ជកម្មផ្សេងៗជាថ្មី។ ជាពិសេសតម្រូវឲ្យមកសុំច្បាប់អនុញ្ញាតពីអាជ្ញាធរ ចំពោះរាល់ការដាក់តាំងការផ្សព្វផ្សាយពាណិជ្ជកម្ម នៅតាមផ្លូវសាធារណៈ។
ករណីនេះ លោក គង់ វិតាណៈ បញ្ជាក់ថា នឹងដាក់ឲ្យក្រុមការងារជំនាញ ចុះតាមដាន និងគ្រប់គ្រងការប្រមូលចំណូលចូលរដ្ឋបាលខេត្តព្រះសីហនុ ទៅលើទីតាំង និងសេវាផ្សព្វផ្សាយពាណិជ្ជកម្ម ទាក់ទងស្លាកយីហោ , បង្គោលប៉ាណូ, របារកាត់ទទឹងផ្លូវ និងផ្ទាំងរូបភាពផ្សព្វផ្សាយពាណិជ្ជកម្មផ្សេងៗ ឲ្យមានប្រសិទ្ធភាព និងឲ្យមានតម្លាភាពនាថ្ងៃអនាគត៕ ដែន សីមា
