ខេត្តកណ្តាល ៖ ចោរលួចគាស់ទូរដែកក្រុមហ៊ុន RX (ផលិតឥដ្ឋ) យកលុយអស់ជិត ១៥ ម៉ឺនដុល្លារ ដែលករណីនេះកើតហេតុថ្ងៃពុធ ១១រោច ខែពិសាខ ឆ្នាំកុរឯកស័ក ព.ស២៥៦៣ ត្រូវនឹងថ្ងៃទី២៩ ខែឧសភា ឆ្នាំ២០១៩ វេលាម៉ោង ២និង៥៥នាទី ចំណុចក្នុងបន្ទប់គណនេយ្យ ស្ថិតក្នុងភូមិព្រែកត្រែង ឃុំសិត្បូ ស្រុកស្អាង ខេត្តកណ្ដាល។
នគរបាលស្រុកស្អាង បានឲ្យដឹងថា ជនរងគ្រោះឈ្មោះ ឡៅ ស៊ីហ្គុន ភេទប្រុស អាយុ ៣៥ ឆ្នាំ ជនជាតិខ្មែរ មានទីលំនៅក្រុងភ្នំពេញ មុខរបរជា នាយកក្រុមហ៊ុន RX (ផលិតឥដ្ឋ) ។ ជនសង្ស័យមិនស្គាល់អត្តសញ្ញាណ។ សម្ភារៈបាត់បង់ប្រាក់ដុល្លាចំនួន១៤៥,១០០$ (ដប់បួនម៉ឺនបួនប្រាំពាន់មួយរយដុល្លារ) ។
នគរបាលប្រាប់ពីសភាពរឿងហេតុនេះថា តាមការបំភ្លឺរបស់បុគ្គលិកក្រុមហ៊ុនម្នាក់ បានឲ្យដឹងថា ៖ នៅថ្ងៃទី២៩ ខែឧសភា ឆ្នាំ២០១៩ វេលាម៉ោង ២និង៥៥នាទី មានជនមិនស្គាល់ បានគាស់បង្អួចបន្ទប់ដាក់ទូរដែក (មើលតាមកាំមេរ៉ា) លុះដល់វេលាម៉ោង ៧និង១៥នាទី ក្នុងថ្ងៃទី២៩ ខែឧសភា ឆ្នាំ២០១៩ ទេីបបុគ្គលិកមកបម្រើការងារចាក់សោ ហើយបើកទ្វារមិនរួចមានការសង្ស័យ ក៏ទៅមើលពីក្រោយឃើញស្នាមគាស់បង្អួច ទេីបរាយការណ៍ទៅសមត្ថកិច្ចប៉ុស្តិ៍សិត្បូ ។
ករណីនេះកម្លាំងសមត្ថកិច្ចជំនាញខេត្ត ស្រុក ប៉ុស្តិ៍ សហការខិតខំស្រាវជ្រាវតាមរកជនសង្ស័យ ដើម្បីយកមកផ្តន្ទាទោសតាមច្បាប់ ៕ ដោយ ៖ កូឡាប
