ភ្នំពេញ ៖ លោក David Kaatrud នាយកម្មវិធីស្បៀងអាហារពិភពលោក ប្រចាំតំបន់អាស៊ី និង ប៉ាស៊ីហ្វិក បានបញ្ជាក់ការគាំទ្រគំនិតផ្តួចផ្តើមបង្កើតប្រព័ន្ធសុវត្ថិភាពស្បៀងអាហារ លើកឡើងដោយ លោកសាយ សំអាល់ រដ្ឋមន្ត្រីក្រសួងបរិស្ថាន។
នៅក្នុងជំនួបនាទីស្តីការក្រសួងបរិស្ថាន នាព្រឹកថ្ងៃព្រហស្បតិ៍ ១២រោច ខែពិសាខ ឆ្នាំកុរ ព.ស ២៥៦៣ ត្រូវនឹងថ្ងៃទី៣០ ខែឧសភា ឆ្នាំ២០១៩ ជាមួយលោករដ្ឋមន្ត្រី លោក David Kaatrud បានឱ្យដឹងថា គម្រោងកម្មវិធីយុទ្ធសាស្ត្រនៃអង្គការ WFP ធ្វើការជាមួយរាជរដ្ឋាភិបាលកម្ពុជាបន្តទៀត សម្រាប់រយៈពេល ៥ ឆ្នាំទៅមុខ (២០១៩-២០២៣) ដើម្បីបង្កើនសមត្ថភាពរបស់ខ្លួនក្នុងការផ្តល់សេវាសង្គម និងពង្រឹងប្រព័ន្ធចំណីអាហារនៅថ្នាក់ក្រោមជាតិ ក្នុងការកាត់បន្ថយហានិភ័យ នៃសន្តិសុខស្បៀង។ លោក David Kaatrud បានបង្ហាញការគាំទ្រចំពោះផែនការក្រសួងបរិស្ថាន ដែលលើកទឹកចិត្តឱប្រជាពលរដ្ឋខិតខំបង្កបង្កើនផល ជាពិសេសការដាំដុះបន្លែបបង្ការ នៅជុំវិញផ្ទះតាមសហគមន៍ ដើម្បីផ្គត់ផ្គង់ស្បៀងដល់គ្រួសារគ្រប់គ្រាន់ កាត់បន្ថយចំណាយ និងផលិតផលមានសុវត្ថិភាពសម្រាប់សុខភាពល្អ។
ក្នុងឱកាសនោះ លោកសាយ សំអាល់ មានប្រសាសន៍ថា ប្រទេសកម្ពុជា មានសុខសន្តិភាព ស្ថេរភាពនយោបាយ និងការរីកចម្រើននៃការទទួលព័ត៌មាន ហើយសម្រេចបានកំណើនសេដ្ឋកិច្ចប្រកបដោយចីរភាព ក្នុងរយៈពេល ២ ទសវត្សរ៍កន្លងមកនេះ។ លោកបន្តថា សន្ដិសុខស្បៀង និងអាហារូបត្ថម្ភ ប្រឈមនឹង វិបត្ដិបរិស្ថានម្ហូបអាហារ ដែលផ្លាស់ប្តូរយ៉ាងឆាប់ រហ័ស និងសុវត្ថិភាពនៅក្នុងប្រព័ន្ធចំណីអាហារ ដែលបង្កប៉ះពាល់ដល់សុខភាពរបស់ប្រជាពលរដ្ឋផងដែរ។ លោកសាយ សំអាល់ បានបន្ថែមថា សុវត្ថិភាពនៃប្រព័ន្ធស្បៀងអាហារ លើកទឹកចិត្តឱ្យកសិករផលិតស្បៀងសរីរាង្គ ចូលរួមកាត់បន្ថយចំណាយ និងកាត់បន្ថយការបរិភោគអាហារមិនមានសុវត្ថិភាព ដូចជាបង្កើនទម្លាប់ដាំដំណាំផ្សេងៗនៅក្បែរផ្ទះ ចិញ្ចឹមសត្វជាដើម។ ជាមួយគ្នានេះលោករដ្ឋមន្ត្រីក្រសួងបរិស្ថាន បានស្នើសើឱ្យមានកិច្ចសហប្រតិបត្តិការ លើការផ្សព្វផ្សាយ និងបណ្តុះបណ្តាលប្រជាពលរដ្ឋនៅតាមសហគមន៍ នូវបច្ចេកទេស និងការដាំដុះដំណាំ ធានាសុវត្ថិភាពស្បៀង និងប្រកបដោយសុវត្ថិភាព។ សូមបញ្ជាក់ថា អង្គការកម្មវិធីស្បៀងអាហារពិភពលោក World Food Programme (WFP) សហការជាមួយក្រសួងបរិស្ថាន និងរៀបចំកិច្ចពិភាក្សាជាមួយដៃគូអភិវឌ្ឍន៍ និងភាគីពាក់ព័ន្ធ ដើម្បីប្រមូលធាតុចូលថែមទៀត សម្រាប់ការបង្កើតគម្រោងប្រព័ន្ធសុវត្ថិភាពស្បៀងអាហារ ក្នុងនោះចំណុចអាទិភាព ជំរុញឲ្យសហគមន៍ ដែលងាយរងគ្រោះដោយការប្រែប្រួលអាកាសធាតុ នៅក្នុងប្រទេសកម្ពុជា អាចទិញ ឬទទួលបានអាហារ ដែលមានសុវត្ថិភាពចម្រុះ មានតម្លៃសមរម្យ ៕ ដោយ៖ កូឡាប
