បន្ទាយមានជ័យ ៖ កម្លាំងទាហានឈុខ្មៅថៃ១ក្រុមនៃកងអនុសេនាធំលេខ១២.០៦ ឈរជើងនៅជួរមុខខ្សែ បន្ទាត់ព្រំដែនស្ថិតក្នុងភូមិសាស្ត្រភូមិបាណូនសាវអេ ឃុំផានសឹក ស្រុកអារញ្ញ ខេត្តស្រះកែវ ប្រទេសថៃ បានអញ្ជើញចូលមកសំណេះសំណាល និងពិភាក្សាជាមួយ កងកម្លាំងនគរបាលការពារព្រំដែន កម្ពុជា នៅចំណុចប៉ុស្តិ៍ដើមត្រសេក នៃវរសេនាតូចនគរបាលការពារព្រំដែនគោកលេខ៨១៥ ស្ថិតនៅចំណុច ភូមិបឹងរាំង ឃុំអូរស្រឡៅ ស្រុកម៉ាឡៃ ខេត្តបន្ទាយមានជ័យ ដើម្បីសហការគ្នាចាត់វិធានការបង្ការទប់ ស្កាត់និងបង្ក្រាបបទល្មើសឆ្លងដែនគ្រប់ប្រភេទខុសច្បាប់។
មានសេចក្តីរាយការណ៍ឱ្យដឹងថា កងកម្លាំង ជួរមុខរវាងកម្ពុជា-ថៃ ដែលមានឈរជើងនៅក្នុងភូមិសាស្ត្រស្រុកម៉ាឡៃ ខេត្តបន្ទាយមានជ័យ និងភូមិសាស្ត្រស្រុអារញ្ញ ខេត្តស្រះកែវ កន្លងមកបានសហការគ្នាហើយបង្ក្រាបបទល្មើសឆ្លងដែនជួញដូរអាវុធខុសច្បាប់និងបទល្មើសឆ្លងដែនមួយចំនួនទៀតផងដែរ។
កិច្ចសំណេះសំណាលបានធ្វើឡើងនៅព្រឹកថ្ងៃទី៣០ ខែឧសភា ឆ្នាំ២០១៩ក្រោមការដឹកនាំដោយ នាយប៉ុស្ថិ៍នគរបាលការពារព្រំដែនដើមត្រសេកនៃវរសេនាតូច៨១៥លោកអនុសេនីយ៍ឯកណុប អឿន ចំណែកទាហានឈុតខ្មៅថៃដឹកនាំដោយលោកអនុសេនីយ៍ទោ អាត់ដួង ភីឡា មេបញ្ជាការនៃកងអនុសេនាធំលេខ១២.០៦។
សេចក្តីរាយការណ៍ឱ្យដឹងថា កិច្ចពិភាក្សានោះផងដែរ កងកម្លាំងជួរមុខការពារព្រំដែនទាំង២ ក៏បានជំរុញការទំនាក់ទំនង និងកិច្ចសហប្រតិបត្តិការទៅវិញទៅមក ឱ្យកាន់តែស្និទ្ធស្នាលរឹងមាំ និងមានបញ្ហាអ្វីកើតឡើង នៅតាមបន្ទាត់ព្រំដែនត្រូវជូនដំណឹងគ្នា ដើម្បីពិភាក្សាដោះស្រាយ ឈរលើស្មារតីយោគយល់ បញ្ចៀសបញ្ហាប្រឈមមុខតានតឹងដាក់គ្នា។
សេចក្តីរាយការណ៍ឱ្យដឹងទៀតថា ពាក់ព័ន្ធនិងកងកម្លាំងជួរមុខ រវាងកម្ពុជានិងថៃ ក្នុងភូមិសាស្ត្រស្រុកម៉ាឡៃ ខេត្តបន្ទាយមានជ័យ និងភូមិសាស្ត្រស្រុកអារញ្ញ ខេត្តស្រះកែវ កន្លងមករហូតដល់បច្ចុប្បន្ន បានទំនាក់ទំនងគ្នាបានល្អ មិនតែប៉ុណ្ណោះ បានសម្របសម្រួលឱ្យប្រជាជន នៃប្រទេសទាំង២ ធ្វើដំណើរឆ្លងដែនប្រកបមុខរបររកស៊ី និងធ្វើការងារបានល្អ ៕ ដោយ ៖ កូឡាប