ប្រទេសកូរ៉េខាងជើង បានធ្វើការប្រហារជីវិតបេសកជនពិសេសរបស់ខ្លួនគឺលោក Kim Hyok Chol និងមន្ត្រីក្រសួងការបរទេសជាច្រើននាក់ទៀត ដែលទទួលខុសត្រូវលើកិច្ចចរចារដើម្បីបើកផ្លូវអោយមានកិច្ចប្រជុំកំពូលលើកទី ២កាលពីខែកុម្ភៈកន្លងទៅនេះ ដោយដាក់កំហុសលើពួកគេថាបានធ្វើឲ្យកិច្ចប្រជុំកំពូលនោះបរាជ័យ។ នេះបើតាមការចេញផ្សាយរបស់កាសែតកូរ៉េខាងត្បូង Chosun Ilbo នៅថ្ងៃសុក្រនេះ។
ចំណែកលោក Kim Yong Chol មន្ត្រីជាន់ខ្ពស់កូរ៉េខាងជើង ដែលបានចរចារលើកចុងក្រោយជាមួយនឹង រដ្ឋមន្ត្រីការបរទេសអាមេរិចលោក Mike Pompeo មុនឈានដល់កិច្ចប្រជុំកំពូលរវាងដូណាល់ ត្រាំ និង គីម ជុងអ៊ុន ត្រូវបានគេនិយាយថាទទួលរងការពិន័យ និងឲ្យទទួលយកការអប់រំមនោគមវិជ្ជា។
កាសែតកូរ៉េខាងត្បូងដកស្រង់ប្រភពមិនបញ្ចេញឈ្មោះពីកូរ៉េខាងជើងថា “លោក Kim Hyok Chol ត្រូវបានគេស៊ើបអង្កេត និងប្រហារជីវិតនៅព្រលានយន្តហោះ Mirim ជាមួយនឹងមន្ត្រីក្រសួងការបរទេសចំនួន ៤នាក់ផ្សេងទៀត កាលពីខែមិនា”។ ពួកគេត្រូវបានចោទប្រកាន់ពីបទស៊ើបការណ៍អោយអាមេរិច។
ចំណែកលោក Kim Yong Chol ត្រូវបានគេដាក់ពិន័យដោយបង្ខំអោយធ្វើការនៅក្នុងខេត្ត Japang ក្រោយរូបលោកត្រូវបានដកពីដំណែង ខណៈដែលលោក Kim Song Hye ដែលបានធ្វើកិច្ចការផ្នែកចរចារជាមួយនឹងលោក Kim Hyok Chol ត្រូវបានគេបញ្ជូនទៅកាន់ជំរុំគុកនយោបាយ។
កាសែតកូរ៉េខាងត្បូងបញ្ជាក់ទៀតថា មន្ត្រីម្នាក់ទៀតឈ្មោះ Shin Hye Yong ដែលអ្នកបកប្រែអោយមេដឹកនាំកូរ៉េខាងគីម ជុងអ៊ុននៅក្នុងកិច្ចប្រជុំកំពូល នៅវៀតណាម ក៏ត្រូវបានគេបញ្ជាក់ថាត្រូវបានឃុំខ្លួននៅជំរុំគុកនយោបាយ ដោយសារតែបកប្រែមានកំហុស។
សូមរម្លឹកផងដែរថា កិច្ចប្រជុំកំពូលលើកទី ២នៅទីក្រុងហាណូយ ប្រទេសវៀតណាម បញ្ចប់ទៅដោយគ្មានកិច្ចព្រមព្រៀងអ្វីទាំងអស់។ ក្នុងកិច្ចប្រជុំ កូរ៉េខាងជើងចង់អោយអាមេរិចដកទណ្ឌកម្មខ្លះលើខ្លួន ប៉ុន្តែខាងអាមេរិចបដិសេធ ដោយអោយខាងកូរ៉េខាងជើងរំសាយអាវុធនុយក្លេអ៊ែរសិន៕
អត្ថបទប្រែសម្រួលដោយ ៖ សុភ័ក្រ
ប្រភព៖ Channelnewsasia