ខេត្តស្វាយរៀង ៖ លោកស្រី ដួង វណ្ណា អនុប្រធានកិត្តិយសសាខា និងលោកស្រី ពៅ សុភាព ហេរញ្ញឹកគណៈកម្មាធិការសាខា
នាព្រឹកថ្ងៃទី ៣១ ខែ ឧសភា ឆ្នាំ ២០១៩ បានដឹកនាំក្រុមការងារសាខាកាកបាទក្រហមកម្ពុជា ខេត្តស្វាយរៀង នាំយកនូវបច្ច័យ និងទេយ្យទាន ចូលរួមរំលែកទុក្ខគ្រួសារនៃសពកុមារលង់ទឹកស្លាប់ចំនួន ៣ នាក់ នៅភូមិចុងព្រែក សង្កាត់ស្វាយរៀង ក្រុងស្វាយរៀង កាលពីល្ងាចថ្ងៃទី ៣០ ខែ ឧសភា ឆ្នាំ ២០១៩ ដោយសារនាំគ្នាទៅលេងទឹកស្រះរណ្តៅដី ។ កុមាររងគ្រោះ ៖ ១- ឈ្មោះ ហូ សុគន្ធារី អាយុ ១១ ឆ្នាំ ភេទស្រី ២- ឈ្មោះ ខាន់ យ៉ាធីតាវល័ក្ខ អាយុ ១២ ឆ្នាំ ភេទស្រី និង ៣- ឈ្មោះ ចាប ម៉ាទី អាយុ ៦ ឆ្នាំ ភេទប្រុស ។
ក្នុងឱកាសនោះលោកស្រី ដួង វណ្ណា បាននាំបណ្តាំសួរសុខទុក្ខ និងចូលរួមរំលែកទុក្ខយ៉ាងក្រៀមក្រំ ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចំពោះគ្រួសារនៃសពដែលបានបាត់បង់កូនជាទីស្រឡាញ់ និងសូមផ្តាំផ្ញើដល់បងប្អូនដទៃទៀត សូមមានការប្រុងប្រយ័ត្នចំពោះកូនចៅ កុំឲ្យទៅលេងទឹកស្រះ ឬត្រពាំង ក្រែងមានករណីលង់ទឹកដូចជាពេលនេះ ។ បច្ច័យ និងទេយ្យទានដែលបានផ្តល់ជូនគ្រួសារសពក្នុង ១ គ្រួសារទទួលបាន៖ អង្ករ ៥០ គក្រ ទឹកក្រូច ១ កេស ទឹកបរិសុទ្ធ ១ កេស តែ ៥ កញ្ចប់ ស្ករស ២ គក្រ ទឹកដោះគោ ៥ កំប៉ុង ទៀន ១ គក្រ ធូប ១ ដុំធំ និងថវិកា ១០០, ០០០ រៀល និងថវិកាចំនួនទៀតរបស់លោកជំទាវកិត្តិសង្គហបណ្ឌិត ម៉ែន សំអន លោកជំទាវ ដួង វណ្ណា លោកជំទាវ ពៅ សុភាព និងក្រុមការងារសាខាកាកបាទក្រហមកម្ពុជា ខេត្តស្វាយរៀង ៕ វ៉ៃកូ