ខេត្តព្រះសីហនុ ៖ អភិបាលរងខេត្តព្រះសីហនុ លោក ម៉ាង ស៊ីណេត បានដឹកនាំក្រុមការងារកាកបាទក្រហមខេត្តព្រះសីហនុ នាំយកជំនួយ របស់សម្តេចគិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ទៅប្រគល់ជូនដល់ដៃឪពុកម្តាយ នៃគ្រួសារសពកុមារី និងកុមារា រងគ្រោះ ដែលត្រូវឃាតកវាយសម្លាប់យ៉ាងព្រៃផ្សៃ នៅភូមិគគី ឃុំបិតត្រាំង ស្រុកព្រៃនប់ ខេត្តព្រះសីហនុ កាលពីល្ងាចថ្ងៃទី២៩ ខែឧសភា ឆ្នាំ២០១៩។
ការនាំយកជំនួយទៅផ្តល់ជូនគ្រួសារសពខាងលើនេះ ធ្វើនៅថ្ងៃទី៣១ ខែឧសភាម្សិលមិញ ដឹកនាំដោយលោក ម៉ាង ស៊ីណេត អភិបាលរងខេត្ត និងជាអនុប្រធានគណៈកម្មាធិការសាខា កាកបាទក្រហមកម្ពុជាខេត្តព្រះសីហនុ ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។
នាឱកាសនោះ ទាំងលោក ម៉ាងស៊ីណេត និងក្រុមការងារ ក៏បានចូលរួមរំលែកទុក្ខដ៏ក្រៀមក្រំ ជាមួយគ្រួសារសពកុមារី ផា ស្រីល័ក្ខ អាយុ ១០ឆ្នាំ និងកុមារា ផា សុខលី អាយុ ២ឆ្នាំកន្លះ គឺត្រូវជាកូនគ្រួសារកម្មករសំណង់ទីទ័លក្រ បានបាត់បង់ជីវិត ដោយត្រូវឃាតករវាយ និងរំលោភសម្លាប់ នៅចំណុចភូមិគគី ឃុំបិតត្រាំង ស្រុកព្រៃនប់។
លោក ម៉ាង ស៊ីណាត មានប្រសាសន៍ថា ជំនួសមុខឲ្យ លោក យន្ត មីន អភិបាលខេត្តព្រះសីហនុ ប្រធានសាខាកាកបាទក្រហមខេត្ត ជាពិសេសសម្តេចគិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា មានការសោកស្ដាយអាឡោះអាល័យជាទីបំផុត ចំពោះការបាត់បង់កូនចៅ ជាទីស្រលាញ់នៅក្នុងគ្រួសារ និងសូមបួងសួងដល់វិញ្ញាណក្ខន្ធនៃសពអ្នកទាំងពីរ បានទៅកាន់សុគតិភព កុំបីឃ្លៀងឃ្លាតឡើយ។
បន្ថែមលើនេះ លោក ម៉ាង ស៊ីណេត ក្នុងនាមសាខាកាកបាទក្រហមខេត្តព្រះសីហនុ លោកក៏បានអំពាវនាវដល់ឲ្យសមត្ថកិច្ចគ្រប់ស្ថាប័ន ត្រូវរួមសហការគ្នា បន្តសកម្មភាពចុះស្រាវជ្រាវវែករកមុខឃាតករ ដើម្បីនាំខ្លួនយកមកផ្តន្ទោទោសទៅតាមច្បាប់ឲ្យបានឆាប់បំផុត។
សម្ភារៈ ដែលសាខាកាកបាទក្រហមខេត្តព្រះសីហនុ បាននាំយកទៅ ចូលរួមរំលែកទុក្ខគ្រួសារសពកុមារាកុមារីរងគ្រោះទាំងពីររួមមាន ៖ អង្ករ ១០០គីឡូក្រា មី ៥កេស ត្រីខ ៥០កំប៉ុង ទឹកក្រូច ៥កេស និងថវិកាមួយចំនួនទៀត៕ ដែន សីមា
