សៀមរាប ៖ គណៈកម្មាធិការប្រយុទ្ធប្រឆាំងផលិតផលក្លក្លែងក្លាយ (គ.ប.ផ.ក.)បានចុះឆែកឆេរ បង្ក្រាប ដកហូតវត្ថុតាង និងបិទទីតាំងផលិត ចែកចាយ និងស្តុកទុក នូវផលិតផល នំចំណី រំលោភកម្មសិទ្ធិបញ្ញាមួយកន្លែង នៅខេត្តសៀមរាប ។ នៅថ្ងៃទី ២ ខែមិថុនាឆ្នាំ ២០១៩ នេះ ជនសង្ស័យត្រូវបានលោក ជួន សុរាសី ចៅក្រមស៊ើបសួរនៃសាលាដំបូងខេត្ត ចេញដីការបង្គាប់ឲ្យឃុំខ្លួន បណ្ដោះអាសន្ននៅពន្ធនាគារខេត្តសៀមរាប។
កាលពីថ្ងៃទី៣០ ខែឧសភាឆ្នាំ២០១៩ ថ្មីៗនេះ នៅខេត្តសៀមរាប គណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក.)ដឹកនាំដោយលោក ឧត្តមសេនីយ៍ទោ តាន់ គុណតារា ប្រធានក្រុមការងារប្រតិបត្តិការ អនឡាញ (Online )បានសហការជាមួយមន្ត្រីជំនាញនៃស្នងការដ្ឋាននគរបាលខេត្ត ទីចាត់ការសាលាខេត្ត មន្ទីរឧស្សាហកម្មខេត្ត មន្ទីរពាណិជ្ជកម្មខេត្ត កាំកុងត្រូលខេត្ត អាជ្ញាធរមូលដ្ឋាន និងក្រោមការដឹកនាំសម្របសម្រួលដោយលោក ថេង សំណាង ព្រះអាជ្ញារងខេត្ត បានចុះឆែកឆេរ បង្ក្រាប ដកហូតវត្ថុតាង និងបិទទីតាំងផលិត ចែកចាយ និងស្តុកទុក នូវផលិតផល នំចំណី រំលោភកម្មសិទ្ធិបញ្ញាមួយកន្លែង ស្ថិតនៅក្នុងផ្សារបុរី សៀង ណាំ ១ ក្នុងភូមិខា្នរ សង្កាត់ជ្រាវ ក្រុងសៀមរាប តាមបណ្តឹងរបស់ក្រុមហ៊ុនដេីមដែលជាម្ចាស់កម្មសិទ្ធិបញ្ញាផ្តាច់មុខ នៅរាជធានីភ្នំពេញ ។
ជាលទ្ធផលគណៈកម្មាធិការចម្រុះបាន រកឃើញវត្ថុតាងរួមមាន ៖
ទី១.នំ Stick Biscuit កញ្ចប់ពណ៌ក្រហម លឿង ចំនួន ៤ពាន់៤៨០កញ្ចប់ ,ទី២.សំបកវេចខ្ចប់ ម៉ាក Good Taste (លឿង ខៀវ) ចំនួន០៨គីឡូក្រាម ,ទី៣សំបកវេចខ្ចប់ ម៉ាក Good Taste (លឿង បៃតង) ចំនួន១៨គីឡូក្រាម ,ទី៤.នំសរសៃមឹក (មិនទាន់វេចខ្ចប់) ១១គីឡូក្រាម ,ទី៥. មីសេះក្រហម ៤៨កេស ស្មើ២ពាន់៤០០កញ្ចប់គ្មានកាលបរិច្ឆេទ ,ទី៦.នំពាក់កណ្តាលការផលិត ស្មើ ៥៧៨គីឡូក្រាម ,ទី៧ សំបកវេចខ្ចប់ ម៉ាកShowka ពណ៌លឿង ១៤គីឡូក្រាម និង ទី៨ នំកងបំពង់មឹករួច ដែលមិនទាន់វេចខ្ចប់ ចំនួន ២៣ការុងធំ ។
បន្ទាប់ពីប្រតិបត្តិការចប់ គណៈកម្មាធិការចម្រុះបាន បានសម្រេចបិទទីតាំង ដកហូតវត្ថុតាងទាំងនោះ និងបានឃាត់ខ្លួនជនសង្ស័យឈ្មោះ ផុក ឆៃ ភេទប្រុស អាយុ៤៨ ឆ្នាំ (ជាម្ចាស់ទីតាំង)ដេីម្បីសាកសួរនៅស្នងការដ្ឋាននគរបាលខេត្ត និងបានបញ្ជូនបន្តទៅសាលាដំបូងខេត្តសៀមរាប។
សូមបញ្ជាក់ថា បច្ចុប្បន្ននេះ ជនសង្ស័យត្រូវបានលោក ជួន សុរាសី ចៅក្រមស៊ើបសួរនៃសាលាដំបូងខេត្ត ចេញដីការបង្គាប់ឲ្យឃុំខ្លួនបណ្ដោះអាសន្ននៅពន្ធនាគារខេត្តសៀមរាបដើម្បីបន្តអនុវត្តបន្តតាមនីតិវិធីច្បាប់៕ ដោយ៖កូឡាប
