ភ្នំពេញ ៖ បន្ទាប់ពីមានការចោទប្រកាន់ របស់ទណ្ឌិតសមរង្ស៊ី ដែលកំពុងរត់គេចខ្លួន នៅក្រៅប្រទេស ករណីចោទប្រកាន់សម្ដេចតេជោ ថាជាអ្នកសម្លាប់ លោកនាយឧត្តមសេនីយ៍ហុក ឡង់ឌី អតីតអគ្គស្នងការនគរបាលជាតិនោះ ត្រូវបានសម្តេចតេជោ ហ៊ុន សែន បានច្រានចោល នូវការលើកឡើងរបស់ទណ្ឌិត សមរង្ស៊ី ថា សម្តេច ជាអ្នកសម្លាប់លោក ហុក ឡង់ឌី ដែលជាដន្លងនឹងសម្តេច។
ក្នុងពិធីប្រគល់សញ្ញាបត្រ ដល់និស្សិតសាកលវិទ្យាល័យភូមិន្ទភ្នំពេញ (RUPP) ប្រមាណ ៣,១៦១ នាក់ នៅមជ្ឈមណ្ឌលកោះពេជ្រ ក្នុងរាជធានីភ្នំពេញ នាព្រឹកថ្ងៃទី៣ ខែមិថុនា ឆ្នាំ២០១៩ ។ សម្តេចតេជោ ហ៊ុន សែន លើកឡើងថា ទណ្ឌិត សម រង្ស៊ី បានលើកឡើងថា សម្តេចជាអ្នកសម្លាប់លោក ហុក ឡង់ឌី ហើយនៅពេលនេះ កូនប្រុសរបស់លោក ហុក ឡង់ឌី ដែលជាកូនប្រសាររបស់សម្តេច កំពុងសហការជាមួយសម្តេចសខេង ដើម្បីសងសឹកនឹងសម្តេចវិញ។ ក៏ប៉ុន្តែការលើកឡើងរបស់ទណ្ឌិតសមរង្ស៊ីដូច្នេះ ត្រូវបានសម្តេចតេជោ ហ៊ុន សែន ប្រកាសច្រានចោល ចំពោះការលើកឡើង ដែលគ្មានការពិតនេះ។ សម្តេចប្រកាសបបួល ទណ្ឌិតសមរង្ស៊ី ស្បថដាក់ជីវិតមួយពូជ ហើយបើទណ្ឌិត សមរង្ស៊ី មិនហ៊ានស្បថទេ ក៏ត្រូវបញ្ចេញភស្តុតាង តាមហ្វេសប៊ុក នូវការលើកឡើង របស់ខ្លួននោះមក។
កើតនៅថ្ងៃទី៣ ខែកុម្ភៈ ឆ្នាំ១៩៥៧ នៅខេត្តស្វាយរៀង លោកនាយឧត្ដមសេនីយ៍ ហុក ឡងឌី អតីតអគ្គស្នងការនគរបាលជាតិ មានភរិយាឈ្មោះ ម៉ែន ភក្ដី មានកូនចំនួន ៥នាក់ ( ប្រុសបី ស្រីពីរ)។ កូនស្រីម្នាក់ និងកូនប្រុសម្នាក់ របស់លោក ហុក ឡង់ឌី គឺជាកូនប្រសាររបស់សម្តេចតេជោ ហ៊ុន សែន។ នោះគឺលោក ឌី វិជ្ជា ជាស្វាមីរបស់លោកស្រី ហ៊ុន ម៉ាណា និងលោកស្រី ឌី សុខីទីឃាយុកោ ជាភរិយារបស់លោក ហ៊ុន ម៉ានិត។
អតីតអគ្គស្នងការនគរបាលជាតិនៃក្រសួងមហាផ្ទៃ លោកនាយឧត្ដមសេនីយ៍ ហុក ឡងឌី បានទទួលមរណភាព នៅយប់ ថ្ងៃអាទិត្យ ទី០៩ ខែវិច្ឆិកា ឆ្នាំ២០០៨ ក្នុងជន្មាយុ៥១ឆ្នាំ ដោយសារឧប្បត្តិហេតុធ្លាក់ឧទ្ធម្ភាគចក្រនៅឯខេត្តស្វាយរៀង។ សពលោក ហុក ឡងឌី ត្រូវដង្ហែចេញពីគេហដ្ឋាននារាជធានីភ្នំពេញ នៅវេលាម៉ោង៧ព្រឹក ថ្ងៃទី១៥ វិច្ឆិកា ឆ្នាំ២០០៨ ហើយត្រូវបញ្ចុះនៅវេលាម៉ោង៣រសៀល ថ្ងៃដដែល នៅភូមិបាវិត ឃុំបាវិត ស្រុកចន្ទ្រា ខេត្តស្វាយរៀង។
បើតាម facebook របស់ទណ្ឌិតសមរង្ស៊ី ដែលសរសេរ កាលពីថ្ងៃទី២ មិថុនា ២០១៩ បានលើកឡើងថា ” ហ៊ុន សែន ជាអ្នកសម្លាប់ ហុក ឡង់ឌី តាមរយៈការដាក់គ្រាប់បែកឲ្យផ្ទុះ ក្នុងឧទ្ធម្ភាគចក្រ (Helicopter) នៅពេលដែលកំពុងតែហោះហើរ លើខេត្តស្វាយរៀង កាលពីថ្ងៃទី ០៩ ខែវិច្ឆិកា ឆ្នាំ ២០០៨។ ហ៊ុន សែន បានសម្រេចចិត្តសម្លាប់ ហុក ឡង់ឌី ដោយសារតែ ហុក ឡង់ឌី ដឹងរឿងអាក្រក់របស់ ហ៊ុន សែន ច្រើនពេក។ ជាពិសេស ហុក ឡង់ឌី ត្រៀមលាតត្រដាង អំពីបញ្ជា ដែលគាត់បានទទួលពី ហ៊ុន សែន ឲ្យសម្លាប់ ជា វិជ្ជា ក្នុងឆ្នាំ ២០០៤។ នៅឆ្នាំ ២០០៨ ហុក ឡង់ឌី ត្រូវតែបញ្ជាក់ពីបញ្ជាខាងលើរបស់ ហ៊ុន សែន តាមការសាកសួររបស់សហព័ន្ធសហជីពអន្តរជាតិ ដែលតម្រូវឲ្យរកយុត្តិធម៌ឲ្យ ជា វិជ្ជា ដែលជាប្រធានសហជីពសេរីកម្មករ នៃព្រះរាជាណាចក្រកម្ពុជា រហូតដល់ពេលគាត់ស្លាប់។ លោក ឌី វិជ្ជា សព្វថ្ងៃជាអគ្គស្នងការរងនគរបាលជាតិ ជាកូនប្រុសច្បង របស់លោក ហុក ឡង់ឌី ដែលលោក ហ៊ុន សែន បានសម្លាប់ នៅឆ្នាំ ២០០៨ តាមរយៈការដាក់គ្រាប់បែកឲ្យផ្ទុះ ក្នុងឧទ្ធម្ភាគចក្រ។ ឥឡូវនេះ លោក ឌី វិជ្ជា ដឹងច្បាស់ពីឃាតកម្ម លើបិតារបស់លោក។ លោក ឌី វិជ្ជា កំពុងតែគិតគូរអំពីផែនការសងសឹក បិតារបស់លោក។ ផែនការនេះ មានការគាំទ្រពីលោក ស ខេង ពីព្រោះ លោក ស ខេង ដឹងខ្លួនថាលោក ហ៊ុន សែន កំពុងតែរៀបចំផែនការដកដំណែងរបស់គាត់ ឬក៏កម្ចាត់គាត់តែម្តង ដើម្បីឲ្យកូនប្រុសបង្កើតរបស់លោក ហ៊ុន សែន គឺលោក ហ៊ុន ម៉ាណែត, ហ៊ុន ម៉ានិត និង ហ៊ុន ម៉ានី មកបន្តវេនពីលោក ហ៊ុន សែន ដោយមិនមាននរណាអាចរារាំងបាន ចំពោះនយោបាយគ្រួសារនិយម របស់លោក ហ៊ុន សែន នេះ”៕ ដោយ ៖ កូឡាប
