រដ្ឋមន្ត្រីការពារជាតិចិន នៅថ្ងៃអាទិត្យម្សិលមិញនេះ បានថ្លែងឲ្យដឹងថា ប្រទេសចិនបានត្រៀមខ្លួនរួចរាល់ហើយសម្រាប់សង្គ្រាមពាណិជកម្មជាមួយនឹងសហរដ្ឋអាមេរិច ប៉ុន្តែចិនបញ្ជាក់ថា ទ្វារនៅតែបើកចំហសម្រាប់កិច្ចចរចា។
លោកឧត្តមសេនីយ៍ Wei Fenghe បានថ្លែងថា “បញ្ហាពាណិជ្ជកម្មជាអ្នកចាប់ផ្តើមដោយអាមេរិច ៖ ប្រសិនអាមេរិចចង់ចរចា ពួកយើងនៅតែបើកទ្វារចំហ ។ បើអាមេរិចចង់តទល់គ្នា ពួកយើងត្រៀមខ្លួនរួចរាល់ហើយ”។
សូមបញ្ជាក់ថា ទីក្រុងប៉េងកាំង និងវ៉ាស៊ីនតោន កំពុងលេងសង្គ្រាមពាណិជកម្មដាក់គ្នា ដែលភាគីទាំងពីរ បានធ្វើការដំឡើងពន្ធដាក់គ្នាទៅវិញទៅមក លើទំនិញនាំចូលដែលមានតម្លៃជាទឹកប្រាក់ ៣៦០ពាន់លានដុល្លារ ។
អាមេរិចបានប្រកាសដំឡើងពន្ធរហូតដល់ ២៥ភាគរយ លើមុខទំនិញនាំចូលពីចិនដែលមានតម្លៃជាទឹកប្រាក់ ២០០ពាន់លានដុល្លារ ខណៈចិន ក៏បានធ្វើការប្រកាសពីការដំឡើងពន្ធលើទំនិញអាមេរិចផងដែរ ចាប់ពីខែមិថុនានេះ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
