ទីក្រុងប៉េកាំងកំពុងរៀបចំដាក់ក្រុមហ៊ុនបរទេសជាច្រើនចូលក្នុងបញ្ជីខ្មៅរបស់ខ្លួន ខណៈពេលដែលភាពតានតឹងពាណិជ្ជកម្មជាមួយអាមេរិចនៅតែក្តៅខ្លាំង។
រដ្ឋាភិបាលចិនកំពុងធ្វើកិច្ចការរបស់ខ្លួនដើម្បីបង្កើតបញ្ជីឈ្មោះក្រុមហ៊ុនដែលមិនគួរឲ្យទុកចិត្តបាន ដោយរួមមានក្រុមហ៊ុនបរទេស បុគ្គល និងអង្គការជាដើម។ នេះបើតាមសេចក្តីប្រកាសរបស់ក្រសួងពាណិជ្ជកម្មចិននៅថ្ងៃសុក្រកន្លងទៅ។
ក្រុមហ៊ុនទាំងឡាយដែលល្មើសនឹងច្បាប់ទីផ្សារ នឹងត្រូវដាក់បញ្ជូលក្នុងបញ្ជីខ្មៅ។ ចិនក៏មានគោលដៅដាក់បញ្ជូលក្រុមហ៊ុនផ្សេងទៀតដែលរាំងខ្ទប់ការផ្គត់ផ្គងឧបករណ៍ដល់ក្រុមហ៊ុនចិន ដោយគ្មានហេតុហេតុផលពាណិជ្ជកម្ម ឬក៏ប៉ះពាល់ដល់ផលប្រយោជន៍របស់ខ្លួន។
សេចក្តីប្រកាសបញ្ជាក់ថា សេចក្តីលំអិតនៃគំរោងនោះនឹងត្រូវប្រកាសឲ្យដឹងនៅពេលឆាប់ៗ។
សូមបញ្ជាក់ថា គ្រោងការចិនក្នុងការដាក់ក្រុមហ៊ុនបរទេសក្នុងបញ្ជីខ្មៅរបស់ខ្លួន កើតឡើងក្រោយពេលសហរដ្ឋអាមេរិចបានដាក់ទណ្ឌកម្មលើក្រុនហ៊ុនបច្ចេកវិទ្យាយក្សចិន Huawei ដោយធ្វើការហាមប្រាមមិនឲ្យក្រុមហ៊ុនអាមេរិចទាំងអស់ធ្វើជំនួញជាមួយនឹង Huawei ឡើយ។
រដ្ឋបាលដូណាល់ ត្រាំ បានថ្លែងថា ឧបករណ៍របស់ Huawei អាចនឹងត្រូវបានរដ្ឋាភិបាលចិនប្រើប្រាស់ដើម្បីធ្វើចារកម្ម ប៉ុន្តែការចោទប្រកាន់នោះ ត្រូវបាន Huawei បដិសេធចោលជាញឹកញយ ដោយបញ្ជាក់ថា ក្រុមហ៊ុនខ្លួនជាក្រុមហ៊ុនឯករាជ្យ មិនជាប់ពាក់ព័ន្ធនឹងរដ្ឋាភិបាលចិនឡើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN