ភ្នំពេញ៖ លោកគង់ គាំ ប្រធានកិត្តិយសគណបក្សឆន្ទៈខ្មែរ នៅថ្ងៃទី៣ ខែមិថុនា ឆ្នាំ២០១៩ ដោយសរសេរនៅ លើហ្វេសប៊ុក ផ្លូវការរបស់លោក ដោយរៀបរាប់ពីឆាកនយោបាយ របស់ប្រទេសកម្ពុជា ដែលកំពុងឆ្លងកាត់ជាក់ស្តែង របស់ដំណើរប្រជាធិបតេយ្យ សេរី ពហុបក្ស ហើយមានតែតាមរយៈការបោះឆ្នោត ពីប្រជាពលរដ្ឋកម្ពុជា ទាំងអស់គ្នាតែមួយគត់ និងជាទៀងទាត់តែប៉ុណ្ណោះ ដែលអាចធានាសន្តិភាព។
លោកគង់ គាំ បានលើកឡើងថា ទាំងនៅប្រទេសប្រជាធិបតេយ្យជឿនលឿន ទាំងនៅបណ្តាប្រទេសកំពុងអភិវឌ្ឃន៍ ពិសេសនៅប្រទេសកម្ពុជា (ចន្លោះពីឆ្នាំ១៩៩៣ដល់ឆ្នាំ២០១៨) ប្រព័ន្ធព័ត៌មានឯករាជ្យ(អាចមានតែឈ្មោះទេដែលច្បាស់)។ តាមខ្ញុំយល់ គឺគ្រាន់តែមានប្រព័ន្ធព័ត៌មាន ប្រកាន់វិជ្ជាជីវៈខ្លាំង និងខ្សោយតែប៉ុណ្ណោះ ។
លោក បានបន្តថា តាមការឆ្លងកាត់ជាក់ស្តែងរបស់ដំណើរប្រជាធិបតេយ្យ សេរី ពហុបក្ស នៅកម្ពុជា ខ្ញុំសម្គាល់ថាប្រព័ន្ធព័ត៌មានលំអៀងស្តាំ មានចរិតបំពុលសន្សំរឿង និងដុតឲ្យខ្លោចរោចឲ្យឆៅ។ ឯប្រព័ន្ធព័ត៌មានលំអៀងអំណាចគ្រប់គ្រង ប្រទេសជាធម្មតា មានចរិតទាត់ចោលដោយមិនពិចារណា ឬខិតខំការពារភាពត្រឹមត្រូវ និងកិត្តិយសរបស់រដ្ឋាភិបាលជានិច្ច ។
ក្នុងការបោះឆ្នោតតំណាងរាស្ត្រឆ្នាំ២០១៨ ប្រជាពលរដ្ឋខ្មែរដែលកាលពីមុន គាំទ្រគណបក្សប្រជាជនកម្ពុជា តែជាងពាក់កណ្តាលនគរប៉ុណ្ណោះ ហើយខ្ញុំមិនយល់ថាសំឡេងគាំទ្រគណបក្សប្រជាជន ជិតមួយនគរកន្លងមកជាការក្លែងក្លាយទេ ។
នីតិកាលទី៦ (ឆ្នាំ២០១៨-ឆ្នាំ២០២៣) គណបក្សប្រជាជន ដែលស្ថិតក្នុងស្ថានភាព ជាអំណាច”ឯកបក្ស”បានជំនះអន្តរកាលប្រកបដោយ (ការរំខាន)ទាំងពីក្រៅ និងក្នុងប្រទេសដោយខំបង្កើនទំនាក់ទំនង (ស៊ីជម្រៅគ្រប់ជ្រុងជ្រោយ) ជាមួយមហាមិត្តចិនក្នុងភាពជឿជាក់ថា ទាំងភាពរឹងមាំនៃអំណាចដឹកនាំ ទាំងភាពការពារកសាង ប្រទេសបម្រើប្រជាពលរដ្ឋកម្ពុជា ប្រាកដជាឈ្នះដាច់លើអតីតគណបក្សសង្គ្រោះជាតិ និងអន្តរជាតិ (EU និងUSA) ដែលព្យាយាមរារាំងគាបសង្កត់ ។
ពីវេទិកាក្នុងប្រទេសជប៉ុន (ទោះជាសង្គ្រោមភាសា) តែបានបង្ហាញថា (ខាងណារក្សាជំហរតទល់ជាចំហ និងជាសកល ហើយខាងណាដែលលលឹបៗពីឲ្យ EU/EBA និង USA/GSP សំពងឲ្យ ហ៊ុន សែន ទ្រមនិងប្រើយុទ្ធសាស្ត្របំផុសឲ្យ ប្រជាពលរដ្ឋក្រៅ និងក្នុងប្រទេស អោយពលទាហានបំបែរកាណុង(ចាប់ហ៊ុនសែន) ផ្តួលរំលំរដ្ឋាភិបាលឈូសឆរ អ្វីៗហើយប្រគល់សងជូនអ្នករងគ្រោះ (បែបអនាធិបតេយ្យ បែបបដិវត្តន៍ និងបែបសង្គ្រោមនោះ គឺកំពុងរលាស់គេចបង្វិល ពីការទទួលខុសត្រូវខាងលើទៅវិញយ៉ាងកំសាក)។
លោកបានលើកឡើងថា តាមភាពប្តូរផ្តាច់របស់រដ្ឋាភិបាលកម្ពុជា ពីវេទិកានៅប្រទេសជប៉ុននេះ (ខ្លាចតែវាសនាមេដឹកនាំ និងក្រុមអ្នកនយោបាយ អតីតគណបក្សសង្គ្រោះជាតិ ដែលជាប់ទោសត្រូវបន្ត ស្ថិតនៅក្រៅស្រុក ដូចក្រុមស្តេចសង្ឃទីបេ ដាឡៃឡាម៉ាដ៏ល្បីរន្ទឺ គឺមិនអាចងើបមុខជាថ្មីវិញ បាននៅកម្ពុជា តាមភាពរវើរវាយទាំងឡាយ របស់ពួកគេនោះឡើយ។ សម័យ ប៉ុល ពត មុនយកអ្នកភូមិទៅសម្លាប់ គេធ្វើនំបញ្ចុកជប់លៀងបោកឲ្យទៅស្លាប់។ ក្រោយអំណាចសាលដីកាតុលាការកំពូលកម្ពុជា តកំណត់នៅចុងឆ្នាំ២០២២ (ជាប់បម្រាមបន្ត ឬមានទោសបន្ថែម) ចំពោះអតីតសមាជិកគណបក្សសង្គ្រោះជាតិ តាមសកម្មភាពជាក់ស្តែង គឺជាចំណោទមិនអាចដឹងជាមុននោះទេ ។ ប៉ុន្តែអ្វីដែលយើងអាចដឹងយ៉ាងច្បាស់ គឺគ្មានទេគណបក្សសង្គ្រោះជាតិជាថ្មីឡើងវិញ និងអាចថាគណបក្សនយោបាយថ្មីណា (ដែលអាចមានកម្លាំង អ្នកគាំទ្រអតីតគណបក្សសង្គ្រោះជាតិដដែលនោះ) មិនបានត្រូវគេអនុញ្ញាតឲ្យបង្កើតទេ ។
ចូលរួមការបោះឆ្នោតនៅឆ្នាំ២០១៨ នៅឆ្នាំ២០១៩ និងនៅឆ្នាំខាងមុខ ជាបន្តបន្ទាប់ជាប់មិនដាច់ គណបក្ស ឆន្ទៈខ្មែរ ជាប៉ូលនយោបាយថ្មី ដែលមានក្រុមអ្នកនយោបាយស្រករក្រោយ (ជាអតីតសមាជិកគណបក្សសង្គ្រោះជាតិ) និងក្រុមអ្នកនយោបាយវ័យក្មេង (ជាស្ថាបនិក) និងអ្នកចង់ឲ្យមានការផ្លាស់ប្តូរនៅកម្ពុជា (ជាអ្នកចូលរួម) គឺជាជម្រើសថ្មី ជាសេចក្តីសង្ឃឹមថ្មី តាមវប្បធម៌នយោបាយថ្មី ឆ្ពោះអនាគតថ្មី សម្រាប់របបប្រជាធិបតេយ្យសេរីពហុបក្ស និងសិទ្ធិមនុស្សពិតប្រាកដនៅកម្ពុជា។
លោកគង់ គាំ បានថ្លែងថា មានតែតាមរយៈការបោះឆ្នោត ពីប្រជាពលរដ្ឋកម្ពុជា ទាំងអស់គ្នាតែមួយគត់ និងជាទៀងទាត់តែប៉ុណ្ណោះ ដែលអាចធានាសន្តិភាព ប្រជាធិបតេយ្យ ការគោរពសិទ្ធិមនុស្ស និងការអភិវឌ្ឍន៍ចីរភាពរីកចម្រើនរឹងមាំយូរអង្វែង ៕ ដោយ៖កូឡាប
