ខេត្តព្រះសីហនុ ៖ ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានឲ្យប្រព័ន្ធផ្សព្វផ្សាយព័ត៌មានដឹងថា សមត្ថកិច្ចបានសម្រេចចុងក្រោយ ដោយមានគោលការណែនាំពីលោក នេត សាវឿន អគ្គស្នងការនគរបាលជាតិ គឺកម្លាំងសមត្ថកិច្ច របស់លោក មិនបញ្ជូនជនដៃដល់ដែលបានសម្លាប់ក្មេងប្រុសស្រីទាំងពីរនាក់ នៅភូមិគគីរ ឃុំបិតត្រាំង ស្រុកព្រៃនប់ ដើម្បីឲ្យទៅធ្វើត្រាប់នៅកន្លែងកើតហេតុនោះទេ ដោយសារតខណៈពេលនេះ មានប្រជាពលរដ្ឋជិត ១ពាន់នាក់ បានករង់ចាំជាស្រេចនៅកន្លែងកើតហេតុ។
លោក ជួន ណារិន្ទ បន្តថា សកម្មភាពរបស់ប្រជាពលរដ្ឋខាងលើ ទំនងជានឹងអាចព្រួតវាយសម្លាប់ជនសង្ស័យតែម្តង ព្រោះតែកំហឹងរបស់ពួកគាត់។
លោកស្នងការ ជួន ណារិន្ទ ឲ្យដឹងដូច្នេះ រួចបញ្ជាក់ថា “ពេលនេះសមត្ថកិច្ចសម្រេចដោយមិនបញ្ជូនជនសង្ស័យទៅធ្វើត្រាប់នៅកន្លែងកើតហេតុនោះឡើយ ដោយសារតែនៅទីនោះ មានប្រជាជនចន្លោះពី ៥០០ ទៅ ៦០០នាក់ កំពុងរង់ចាំនៅផ្ទះកើតហេតុ ហើយចំនួននេះ កំពុងតែបន្ដមកថែមទៀត។ ដូច្នេះពួកគាត់អាចផ្ទុះកំហឹងខ្លាំង ឈានដល់ការវាយសម្លាប់ជនសង្ស័យ នឹងអាចប៉ះពារ ជាមួយកងកម្លាំងសមត្ថកិច្ច របស់យើងថែមទៀតផង ទើបយើងសម្រេចមុនបញ្ជូនជនល្មើសទៅធ្វើត្រាប់នៅពេលនេះ”។
គិតមកដល់រសៀលថ្ងៃចន្ទ ទី៣ ខែមិថុនា ឆ្នាំ២០១៩នេះ មាន ប្រជាពលរដ្ឋរាប់រយនាក់ បានមករង់ចាំមើលមុខជនដៃ ដោយសង្កេតឃើញថា នៅក្នុងដៃប្រជាពលរដ្ឋមួយចំនួន ក៏មានកាន់ដំបង និងកាន់ដុំថ្មផង។
ប្រជាពលរដ្ឋមួយចំនួន បានឲ្យដឹងថា ពេលសមត្ថកិច្ចបញ្ជូនជនដៃដល់មកធ្វើត្រាប់នៅផ្ទះកើតហេតុ នឹងវាយសំពងជនដៃដល់រូបនោះឲ្យងាប់ ដើម្បីបញ្ចេញកំហឹងជូនក្រុមគ្រួសារ ក៏ដូចជាកុមារាកុមារីរងគ្រោះទាំងពីរនាក់បងប្អូនបង្កើត ដែលបានស្លាប់យ៉ាងតក់ស្លុតបំផុត និងវេទនាបំផុត។
ត្រង់ចំណុចនេះ លោក ជួន ណារិន្ទ បានបន្តទៀតថា ពេលនេះ ជនសង្ស័យក្នុងបទល្មើសខាងលើ ត្រូវបានរូបលោកសួរនាំផ្ទាល់ និងត្រៀមកសាងសំណុំរឿងបញ្ជូនទៅកាន់សាលាដំបូងខេត្តព្រះសីហនុ ផ្ដន្ទាទោសតាមនីតិវិធីច្បាប់។
លោកស្នងការ ជួន ណារិន្ទ ឲ្យដឹងបន្តថា រាមចម្លើយសារភាពបឋមរបស់ឃាតកសម្លាប់ក្មេងប្រុសស្រីទាំងពីរនាក់ នៅភូមិគគីរ ឃុំបិតត្រាំង នៅស្រុកព្រៃនប់ ខេត្តព្រះសីហនុខាងលើនេះ។ សមត្ថកិច្ចត្រូវបាន បញ្ជាក់អះអាងថា ផ្ដើមចេញពីគ្រឿងញៀន និងស្រា ដែលជននេះបានសេព រហូត ប្រព្រឹត្តអំពើឃាតកម្មដ៏ព្រៃផ្សៃមួយនេះកើតឡើង។
លោកបន្តថា មុនពេលកើតហេតុជនដៃដល់រូបនេះ បានអង្គុយផឹកស្រាស នៅផ្ទះបានកន្លះលីត្រ ក៏ប្រើឲ្យប្រពន្ធរបស់ខ្លួន ជាស្ដ្រីមេម៉ាយកូន ៥នាក់ ទៅទិញពងទាកូនសម្រាប់ក្លែម។ ដោយសារតែប្រពន្ធទៅយូរពេក ខ្លួនបានបន្ដផឹកស្រារហូតដល់មួយលីត្រកន្លះ រួចក៏ដើរទៅតាមប្រពន្ធស្រាប់តែឃើញ ក្មេងរងគ្រោះទាំងពីរនាក់ នៅក្នុងផ្ទះ ក៏ធ្វើសកម្មភាពចាប់រំលោភ ហើយឈានទៅវាយសម្លាប់ចោលតែម្ដង។
សូមបញ្ជាក់ថា ជនដៃដល់ដែលសម្លាប់ក្មេងប្រុសស្រីពីរនាក់ ដែលត្រូវជាបងប្អូនបង្កើតគ្នាខាងលើនេះ ត្រូវសមត្ថកិច្ចបញ្ជូនទៅស្នងការដ្ឋាននគរបាលខេត្តព្រះសីហនុ ដែលជាម្ចាស់ករណី នៅយប់ថ្ងៃទី២ ខែមិថុនា ឆ្នាំ២០១៩ ដើម្បីកសាងសំណុំរឿងបញ្ជូនទៅកាន់តុលាការផ្ដន្ទាទោសតាមនីតិវិធីច្បាប់។
ជនដៃដល់មានឈ្មោះ មាង វិចិត្រ ត្រូវបានកម្លាំងនគរបាលចាប់ខ្លួននៅរសៀលថ្ងៃទូ២ ខែមិថុនា ឆ្នាំ២០១៩ នៅស្រុកកំណើត ជនសង្ស័យ ឯស្រុកមេសាង ខេត្តព្រៃវែង។
សមត្ថកិច្ចបញ្ជាក់ថា អំពើឃាតកម្មនេះ បានកើតឡើងនៅល្ងាចថ្ងៃទី២៩ ខែឧសភា ឆ្នាំ២០១៩ ដោយកុមារារងគ្រោះមានឈ្មោះ ផា សុខលី អាយុ២ឆ្នាំ និងកុមារីជាបងមានឈ្មោះ ផា ស្រីល័ក្ខ អាយុជិត១០ឆ្នាំ ត្រូវជនល្មើសសម្លាប់នៅក្នុងផ្ទះកុមាររងគ្រោះ អំឡុងពេលឪពុកម្តាយក្មេងៗទាំងមិននៅផ្ទះ៕ ដែន សីមា